APINAATAMU

Biibiliya onihimya wira: Muluku ‘khopattunxe elapo ehirina etthu, masi upale wira ekhaleke-mo atthu’.—YESAYA 45:18.

ELAPO

Biibiliya onihimya wira: “Atthu anniyariwa, atthu annokhwa: vano olumwenku onnikhala enamuna emosaru [mahiku otheene]”. —MUSUWELI 1:4.

EYO ENITAPHULELA EXEENI: Biibiliya onihimya wira elapo khenrowa opwetexiwa ni atthu anrowa okhalaka valaponi mahiku otheene. Ontaphulela exeeni omala wa olumwenku?

NWEHE ELA: Biibiliya onnilikanyiha omala wa olumwenku ni etthu yiiraneyale mahiku a Nowe. Okathi ole, elapo yotheene ‘yahisareya owali’ wala otakhala. (Maphattuwelo 6:13) Masi Nowe aari naxariya. Nto orumeelaka Epula ya Mutaaseke, Muluku aahaapwetexa atthu otheene ootakhala murima, masi aahimoopola Nowe ni emusi awe, yaawo yaari anaxariya. Ohimyaka itthu siiraneyale okathi ole, Biibiliya onihimya wira: “Itthu iyo saahaapwetexa atthu a mahiku ale. Eyo yaahiiraneya okathi yoole maasi yaakhunenle aya elapo yotheene ya vathi”. (2 Pedru 3:6) Etthu ele yiiraneyale waari omala wa olumwenku wa okathi ole. Exeeni yaapwetexiwe? Khahiyo yaapwetexiwe elapo, masi yaapwetexiwe atthu ootakhala yaakhala valaponi. Nto vaavo Biibiliya onilavula awe sa omala wa olumwenku, owo khonihimya opwetexiwa wa elapo. Masi onihimya opwetexiwa wa atthu otheene ootakhala murima anikhala valaponi.

MIXANKIHO NI OTAKHALA

Biibiliya onihimya wira: “Atakhali anorimela nananoru: nyuwo munimwaphavela muhaphwanyé. Vano atthu òmàla anoreriwa vathí-va: anokhala-mu ni murettele womalela”.—ESALIMO 37:10, 11.

EYO ENITAPHULELA EXEENI: Mutaaseke a mahiku a Nowe khaamalinhe itthu sotheene sootakhala. Maana nuumala Mutaaseke, atthu ootakhala murima yaanikumiherya mixankiho sinceene. Moohipisa, Muluku onimwaapwetexa atthu otheene ootakhala. Nasaalimo aahimmye wira “atakhali anorimela nananoru”. Orumeelaka Omwene awe, ekuvernu ya wiirimu yeeyo enrowa waalamulelaka anaxariya, Muluku onoomaliha otakhala wotheene.

NWEHE ELA: Niireke anamalamulela a mulaponi anookhaliherya Omwene wa Muluku? Biibiliya onihimya wira nnaari. Awo anrowa owana ni Omwene wa Muluku. (Esalimo 2:2) Nto etthu xeeni enrowa okhumelela? Omwene wa Muluku onrowa oranttela ikuvernu sotheene ni “onrowa okhalaka wa mahiku othene”. (Daniyeli 2:44) Xeeni vanireerela aya opwetexiwa ikuvernu sa apinaatamu?

Biibiliya onihimya wira: “Mutthu khansuwela emalelo awe: owo khanwerya wettiha mavalo awe”.—YEREMIYA 10:23.

EYO ENITAPHULELA EXEENI: Apinaatamu khapattuxiwe wira yiilamuleleke. Awo khaniwerya walamulela atthu mwa xariya ni omaliha mixankiho.

NWEHE ELA: Eliivuru Britannica Academic enihimya wira ikuvernu sa apinaatamu “khasiniwerya omaliha mixankiho ntoko ohaawa, etala, iretta, ihasara sa ephattu, ikhotto ni ikrime”. Nave enihimya so: “Atthu akina . . . anoona wira yakhala ekuvernu emosa paahi olumwenku wothene, enoowerya omaliha mixankiho iyo sotheene”. Masi, hata ikuvernu sotheene sa apinaatamu siiraanale ene, akhala wira olumwenku wotheene onrowa olamuleliwaka ni apinaatamu, mixankiho nilavunle ahu khasinrowa omala. Omwene wa Muluku paahi torina owerya wa omaliha mixankiho sa olumwenku wotheene.

Biibiliya onihimya wira khivanireerela woova omala wa olumwenku ola wootakhala. Ohiya-vo, omala wa olumwenku ihapari sooreera, mwaha woowi Muluku onrowa orantteliha olumwenku ola wootakhala ni elapo esya!

Eyo enrowa wiiraneya silini? Mwaha onittharelana, ninrowa oweha moota Biibiliya onaakhula awe nikoho nno.