Mwaha ovinre, ohooniherya wira moohipisa Muluku onoopwetexa olumwenku ola wootakhala ni onoomaliha mixankiho sotheene. Hiyo ninnikupali ni murima wotheene wira eyo enimwiiraneya. Mwaha wa xeeni? Mwaha woowi Nuulumo na Muluku, Biibiliya onnihimya eyo:

“Olumwenku ola onoomala”.—1 YOHANI 2:17.

Musuweleke wira aakhala atthu anrowa woopowa, mwaha woowi 1 Yohani 2:17, onnileiherya eyo:

“Ole oneettela ele Muluku oniphavela awe, onookhala mahiku otheene”.

Naaphavelaka woopowa nihaana opaka ele Muluku oniphavela awe. Nto wira nisuwele ele Muluku oniphavela awe, nihaana opacerya omusuwela.

Yesu aahimmye so: “Wira awo aphwanye okumi woohimala, ahaana woosuwelani oratteene nyuwo, Muluku mmosa-ru eekeekhai”. (Yohani 17:3) Wira noopowe okathi onrowa aya opwetexiwa olumwenku ola ni okhala mahiku otheene, nihaana ‘omusuwela’ Muluku. Masi musuweleke wira omusuwela Muluku khahiyo paahi osuwela wira owo ookhala wala osuwela itthu vakhaani paahi voohimya sa Muluku. Nihaana okhala mpatthani awe. Wira nilipihe ompatthani ahu ni atthu akina, nihaana oviriha okathi niri ene ni apatthani ahu awo. Nto nihaana opaka etthu emosaru naaphavelaka olipiha ompatthani ahu ni Muluku. Nwehe ikeekhai vakhaani nniixutta ahu mBiibiliyani sinrowa onikhaliherya okhalana ni olipiha ompatthani ahu ni Muluku.

Wira nikhale akumi, nihaana olya khula nihiku. Yesu aahimmye so: “Mutthu khonikhala mukumi mwaha wa ephaawu paahi, masi onnikhala mukumi ni khula nuulumo ninkhuma wa Yehova”.—Matheyo 4:4.

Olelo-va, nuulumo na Yehova nimphwanyaneya mBiibiliyani. Vaavo munimusoma anyu Biibiliya, munoosuwela itthu Muluku aapanke awe khalai, onipaka awe niinaano-va, onrowa awe opaka muhoolo ni okhala mpatthani awe.

Muhaana opaka exeeni akhala wira munniphavela wiiwelela malamulo a Muluku masi vanoovilani ohiya opaka itthu soohiloka? Etthu enrowa wookhaliheryani ori omusuwela oratteene Muluku.

Nwehe yowiiraneya ya muthiyana ninrowa ahu omwiihanaka Sakura, yoowo aarina mweettelo woohiloka. Nuumala opacerya omusoma Biibiliya, owo aahiixutta yooruma ya Muluku enihimya wira: “Mutthyawe orupihana woohiloka!” (1 aKorinto 6:18) Sakura aahinvekela Muluku wira onvahe ikuru ni omukhaliherye ohiya opaka itthu soohiloka. Masi mpakha-va, owo onniwanana muxankiho owo. Owo onihimya so: “Vaavo kinuupuwela aka orupihana woohiloka, kinninvekela Yehova. Maana kinnisuwela wira nkinrowa owerya owanana muxankiho aka mekhaka. Nivekelo ninnikikhaliherya omwaattamela Yehova”. Ntoko Sakura, atthu imilyau sinceene aamusuwela Muluku. Owo ohaavaha ikuru saakhalihenrye opaka marukunuxo mookumini mwaya wira amuhakalaliheke.—aFilipi 4:13.

Vaavo munimusuwela anyu oratteene Muluku, nyuwo munrowa otepaka ‘osuweliwa ni Muluku’ ni okhala mpatthani awe. (aGalasia 4:9; Esalimo 25:14) Mwiira siiso, nyuwo munimoopowa wira mwakhaleke elapo esya. Masi elapo esya enrowa okhala sai? Mwaha onittharelana nnooweha.