“Muthipeleleke owehaweha, okhala wira khamunsuwela nihiku, nnakhala ewoora”.—MATHEYO 25:13.

“Muthipeleleke owehaweha, muhirupe, okhala wira khamunsuwela okathi ene othanliwe”.—MARKO 13:33.

Khuuvo mutthu valaponi onisuwela okathi onrowa aya omala olumwenku ola wootakhala. Masi, Muluku oothanla “nihiku nene ni ewoora ene” onrowa awe omaliha olumwenku ola wootakhala. (Matheyo 24:36) Niireke yookhala etthu ennikhaliherya osuwela wira wanikisa ohaattamela? Aayo. Yesu aahaaleela awiixutti awe itthu saarowa waakhaliherya osuwela wira wanikisa ohaattamela.

Itthu iyo saarowa okhumelela, yaarowa okhala “ethoonyeryo ya . . . omala wa olumwenku”. Yesu aahimmye so: “Nloko ninrowa owana ni nloko nikina, elapo ni elapo ekina, nave-tho enoothowaka yoolya ni sinookhumelela itetere mapuro oovirikana”. (Matheyo 24:3, 7) Nave Yesu aahimmye wira saamukhumelela “ikwerere” wala iretta sinceene. (Luka 21:11) Niireke munniweha siiraneyaka itthu iyo Yesu aahimmye awe?

Olelo-va, atthu annihaawa mwaha wa ikhotto, etala, itetere, ni ikwerere wala irette sinceene. Mwa ntakiheryo, mwaakha wa 2004, etetere yuulupale yaahihonona Isisiro sa oceano Índico, nave tsunami aahiwiiva atthu 225.000. Mwaakha moosa paahi, oretta wa koronaviru wala COVID-19 woowiiva atthu anivikana imilyau 2.6, olumnweku wotheene. Yesu aahimmye wira itthu ntoko iyo saarowa wooniherya wira olumwenku ola wootakhala ohanle omala.

Okathi vakhaani ohalaka ophiya wanikisa, Biibiliya oniihimya okhala “mahiku ookiserya”. (2 Pedru 3:3, 4) 2 Timootheyo 3:1-5, Biibiliya onihimya wira atthu khiyaarowa ottharaka malamulo a xariya a Muluku. (Nwehe ekaaxa eni: “ Ohalaka Okathi Vakhaani Omala Olumwenku”.) Niireke munnaaweha atthu oowiisoona, otakhala murima ni ahinaaphenta akhwaaya? Akhala wira munnaaweha, eyo enooniherya wira ninkhala wattamela wanikisa wa olumwenku ola.

Mahiku ookiserya anrowa omala silini? Biibiliya onihimya wira ohanle “okathi vakhaani paahi”. Nuumala-vo, Muluku onrowa waapwetexa “ale anihonona elapo”.—Wiisuupulula 11:15-18; 12:12.

Muluku oothanla nihiku ni okathi onrowa awe omaliha olumwenku ola wootakhala. (Matheyo 24:36) Nave sookhala ihapari sooreera. Ihapari sene tiiya: Muluku “khoniphavela wira mutthu opwetexiwe, nnakhala mmosa”. (2 Pedru 3:9) Nto owo ohaavaha okathi apinaatamu wira amusuwele ni wiiwelela malamulo awe. Mwaha wa xeeni? Mwaha woowi, owo oniphavela wira noopowe vaavo onrowa awe opwetexa olumwenku ola wira nakhaleke elapo esya. Okathi owo, elapo yotheene enrowa okhala eparayiisu.

Muluku oniphavela wira atthu otheene asuwele etthu akhanle aya oopaka wira yakhaleke elapo esya alamuleliwaka ni Omwene awe. Yesu aahimmye wira ihapari sooreera sa Omwene wa Muluku saamulaleiwa “elapo yotheene”. (Matheyo 24:14) Mwaakha wa 2019, Anamoona a Yehova a olumwenku wotheene yaahiviriha iwoora ibilyau 2 yaalaleeryaka ni owiixuttiha atthu muhupi wa mBiibiliyani. Tthiri Yesu aahimmye wira muteko owo woolaleerya wanvariwa ohinatthi olumwenku omala.

Okathi wa olamulela wa apinaatama ohanle omala. Masi sookhala ihapari sooreera, nyuwo pooti woopowa okathi olumwenku ola onrowa aya opwetexiwa wira mwakhaleke Mparayiisu, yeeyo Muluku oleihenrye awe. Mwaha onittharelana, ninrowa oweha etthu mukhanle anyu oopaka wira mwakhaleke elapo esya.