1. Xeeni Paulo ohalaka waatumererya maKristau aHeeberi otepa olipihana mukina ni mukhwaawe?

ESEEKULU yoopacerya, murummwa Paulo aahaatumererya maKristau a muloko wa eHeeberi wira: “Nùpuxeryaneke mukina ni mukhw’awe, wira nakuviheryaneke ophenta n’uvara miteko sorera. Nihijompeleké orowa omuthukumanoni, nihatthariheké ale ahinrowa-tho. Ohiya vo, nlipiheryaneke, votepa-tho vavo vanònanyu wira nihiku n’Apwiya nri vakhiviru”. (aHéberi 10:24, 25) Waaniheryasa anna ale yaaniikoha nthowa naamwiirinhe Paulo waatumererya otepa olipihana mukina ni mukhwaawe. Nuuvira iyaakha 5, yaahoona etthu yaamwiirinhe Paulo waatumererya. Maana okathi owo, yaahoona naattamelaka nihiku Yehova aarowa awe omphukela Yerusalemu. Awo yaahaana otthyawa epooma ele ntoko Yesu aahimmye awe. (Luka 21:20-22; Miteko 2:19, 20) Nihiku noophukela na Yehova naahiphiya mwaakha wa 70 EC, vaavo aRoma yaapwetenxe aya epooma ya oYerusalemu.

2. Olelo-va, xeeni vanitthuneya ahu otepa olipihana?

 ² Olelo-va, mukhalelo ahu onoolikana ni maKristau ale. Maana “nihiku n’Apwiya [nri vakhiviru, nave] ti nulupalexa ni ti notepa wopiha”. (Yoweli 2:11) Nto, moolumo a profeta Sofoniya annivareleya muteko olelo-va, yaawo ani: “Nihiku nulupale n’Apwiya nri vakhiviru: nihanle ophiya vowakuveya”. (Sofoniya 1:14) Tivonto nintumereriwa ahu wira “nùpuxeryaneke mukina ni mukhw’awe, wira nakuviheryaneke ophenta n’uvara miteko sorera”. (aHéberi 10:24) Nihaana waathokorerya vanceenexa anna wira niweryeke waalipiha okathi onireerela aya.

3. Exeeni Paulo oonihenrye awe voohimya sa olipihana? (Nwehe elatarato yoopacerya.)

³ Biibiliya onihimya wira: “Ovelavela onnimuripiha murima mutthu: nulumo nowepesa ninnimuhihimuxa”. (Miruku 12:25) Otheene ahu ninnitthuneya olipihiwa. Paulo aahooniherya wira hata atthu yaale anaalipiha akina annitthuneya olipihiwa. Paulo aahaalepela anna ooRoma wira: “Kinniphavelexa wowehani, wira kokaweleni sovaha sikina s’eroho [munepa], wira mulipihiwe. Walá kihimye wira ni miyo-tho kilipihiwe vamosá ni nyuwo, eriyari anyu, nlipihiwaka ni wamini omosaru, ori wawinyu ni wawaka”. (aRoma 1:11, 12) Tivonto, ikwaha sikina murummwa Paulo aanitthuneya olipihiwa.​—Mmusome aRoma 15:30-32.

4, 5. Olelo-va, tani anitthuneya ahu waalipiha ni nthowa xeeni?

⁴ Olelo-va, nihaana waalipiha ale anivara muteko wa Yehova okathi wotheene ntoko mapioneero oororomeleya. Anamunceene a yaawo aaleva itthu sinceene saasivela wira akhale pioneero. Nave nihaana waalipiha mamisionaario, maBethelita, axitokweene a esirkwiitu ni axaaraya ni ale anivara mapuro anitaphuleliwa iliivuru oottaivela oBetheli. Otheene aya annileva itthu sikina wira aviriheke okathi munceene amurumeelaka Yehova. Tivonto, nihaana waalipiha nave. Nto, aakhala atthu anceene aniphavela ovikaniha muteko wa orummwa wa okathi wotheene, masi ahinawerya. Awo-tho annixukhurela vaavo annaalipiha ahu.

⁵ Tani-tho anitthuneya olipihiwa? Nihaana waalipiha anna ni arokora yaawo anivikaniha ohithela aahiiso ohitheliwa aphavelaka omwiiwelela Yehova ni aniphavela ‘othelana aKristu-ru’. (1 aKorinto 7:39) Arokora ootheliwa annixukhurela vaavo axiiyaya anaaleela aya wira annaaphenta ni annixukhurela itthu sotheene anipaka aya. (Miruku 31:28, 31) Nave maKristau anivilela olupatthiwa ni owereyasiwa annitthuneya olipihiwa. (2 aTesalonika 1:3-5) Yehova ni Yesu annaalipiha arumeyi otheene oororomeleya.​—Mmusome 2 aTesalonika 2:16, 17.

6. Exeeni eniixutta ahu ni muteko wa axitokweene onilavuliwa Yesaya 32:1, 2?

⁶ Mmusome Yesaya 32:1, 2. Okhala wira ninkhala okathi wooxankiha, ti vookhweya oriipiwa murima ni okhulumuwa. Tivonto, Yesu Kristu onaarumeela awe annawe oowoottihiwa ni “makhulupale” a ipwittipwitthi sikina wira yaalipiheke ni waalakiherya ale akhulumunwe mahiku ala. Masi axitokweene awo a mmulokoni khahiyo ‘anene’ waamini wahu masi awo anivara “muteko vamosá” wira nihakalaleke. Awo aniphavela wira nihakalaleke ni ovikaniha okhala oororomeleya.​—2 aKorinto 1:24.

7, 8. Axitokweene anrowa waalipiha sai akina ni moolumo ni miteko saya?

 ⁷ Axitokweene ahaana omutakiha murummwa Paulo, yoowo okathi wotheene aamananiha waalipiha annawe. Owo aahaalepela maKristau a oTesalonika yaawo yaalupatthiwa, wira: “Miyo kihophentani vanjene, mpakha ophavela okawana ni nyuwo vohikhala ehapari yorera ya Muluku pahi, kaniphavela-tho wovahani hatá ekumi aka. Tthiri nyuwo mokisiveliha vanjene”.​—1 aTesalonika 2:8.

⁸ Axitokweene anoowerya onlipiha vanceene ni masu aya. Niireke okathi wotheene masu paahi anniphiyerya? Paulo aahaaleela axitokweene a muloko a wEefeso wira: “Mwa sothene kowoniheryani wira nivaraka sisa, ti nrinahu wakhaliherya atthu òthoiwa, nùpuwelaka molumo Pwiya Yesu ohimalyawe wira: ‘Mulipa-òvaha onoreriwa [onoohakalala] onvikana mulipa-òvahiwa’”. (Miteko 20:35) Paulo aaniileva “vomalela wira” aakhaliherye annawe. Miteko sawe saanooniherya wira aaniileva wira aakhaliherye. (2 aKorinto 12:15) Moolikanasa, axitokweene ahaana waalipiha ni waamaaliha anna ohiya paahi ni moolumo masi ni miteko saya. Eyo tenooniherya wira anninikhapelela.​—1 aKorinto 14:3.

9. Axitokweene anrowa ovaha sai miruku moolipiha?

⁹ Wira yaalipihe anna, okathi mukina axitokweene pooti waavaha miruku. Axitokweene pooti wiixutta moota woopaka eyo amurumeelaka Biibiliya. Nuumala okhwa ni ohihimuxiwa, Yesu oovaha ntakiheryo nooloka na moota woovaha miruku okathi aaroihale awe muhupi miloko saari wAsia Menor. Yesu aahivaha miruku soolopola miloko sa wEefeso, oPergamo ni oTiyatira. Masi ohinatthi waavaha miruku, Yesu aapacenrye waattottopela mwaha wa itthu sooloka yaapaka aya. (Wisupulula 2:1-5, 12, 13, 18, 19) Olavulaka sa Muloko wa oLawodiseya, Yesu aahimmye so: “Miyo kinniwulumela othene ale anaphentaka, kinattaruxa. Vano, mukhalaneke nthiti, murukunuxe mirima sanyu”. (Wisupulula 3:19) Tthiri axitokweene annimananiha omutakiha Kristu okathi anivaha aya miruku.

10. Ninrowa olipihana sai mukina ni mukhwaawe?

¹⁰ Khahiyo paahi axitokweene tanitthuneya waalipiha atthu akina. Paulo aahaatumererya maKristau otheene wira alavuleke ‘molumo òrera, yawo anakhaliherya akhwaya, anaphwanyiha murerelo’ anna akina. (aÉfeso 4:29) Khula mmosa a hiyo ohaana wuupuwela etthu nikhanle ahu oopaka wira naakhaliherye atthu akina. Paulo aahaalepela maKristau aHeeberi wira: “Mòkolole matata akhulumunwe, mulipihe makutha attèttheiye: mokolole iphiro sinviranyu, wira nnawu nrakanle nihituthunye, masi nivolé”. (aHéberi 12:12, 13) Otheene ahu nnoowerya olipihana mukina ni mukhwaawe ni moolumo ahu hata niyenve ene.

11. Exeeni yaamukhalihenrye Martha okathi aakhulumunwe awe?

¹¹ Waahikhala okathi, murokora oniitthaniwa Martha aakhulumunwe awe. * (Nwehe enoota.) Owo olempe so: “Nihiku nimosa kaahivekela kiphavelaka olipihiwa. Nto kaahikumana murokora oowuuluvala yoowo aakithokorenrye moophenta ni aakoonenle othunku, itthu seiyo kaaphavela aka okathi ole. Nave aahikileela yooweeha aakumanne  awe, yeeyo kaawanana aka. Nto kaahoona wira nkikhanle mekhaka”. Woonasa wene, murokora ole khaasuwela moota moolumo awe yaarowa aya omulipiha Martha!

12, 13. Munrowa ovarihela sai muteko miruku siri aFilipi 2:1-4?

¹² Paulo aahaalepela maKristau a oFilipi wira: “Axinn’aka, vakhalaka wira munnihakalala mwa Kristu, walá wophentani wawe onnilipiha makhuv’anyu; vakhalaka wira mothukumanyiwa n’iroho yowarya [munepa wootteela], walá mwakhalanaka ophentana n’umoriwa ikharari, nanso musarihele otteliwa waka murima, mwiwananaka vomalela. Mukhalaneke ophentana omosaru, murima mmosaru ni mukhalelo mmosaru yowo. Ehikhale etthu enìranyu mphavelaka oxinttana walá wittottopa: nto mwiyeviheke, khula mutthu awonelaka vatthu akhw’awe vowivikana mmansawe. Khula mutthu ahiphavelé sinimurerela yowo pahi, nto àphaveleleke-tho oreriwa akhw’awe”.​—aFilipi 2:1-4.

¹³ Otheene ahu nihaana woona moota nikhanle ahu ookhaliheryana mukina ni mukhwaawe. Napaka eyo, nnoowerya olipihana ‘mophenta’, ‘othukumanyiwa’ momunepani, ni okhalana “ophentana n’umoriwa ikharari” wira naalipiheke anna ni arokora.

14. Enamuna xeeni nikhanle ahu oowaalipiha akina?

¹⁴ Ninnihakalala wiiwa wira ale naakhalihenrye ahu khalai annivikaniha omurumeela Yehova moororomeleya. Murummwa Yohani olempe so: “Kaiwaka wira an’aka annettela ekekhai, kinnitteliwa murima vanjene: khivo etthu ekina enkitteliha murima siso”. (3 Yohani 4) Mapioneero manceene  annihakalala vaavo animphwanya aya mutthu yaamukhalihenrya aya wiixutta ekeekhai khalai, ovikanihaka omurumeela Yehova moororomeleya, nto woonasa wene orumeelaka ntoko pioneero. Tthiri akhala wira mapioneero awo annikhulumuwa, nihaana owuupuxerya itthu sotheene sooloka apanke aya yaakhaliheryaka akina.

15. Nihaana opaka exeeni wira naalipihe atthu animurumeela Yehova moororomeleya?

¹⁵ Axitokweene anceene a esirkwiitu ni axaaraya ahimmye wira annilipa, vaavo anaakhela aya ikarta sooxukhurela nuumala oxukurya muloko. Nave eyo, ennaalipiha axitokweene, mamisionaario, mapioneero, maBethelita ni otheene ale animurumeela Yehova moororomeleya. Awo anoolipa vanceene vaavo nnaaxukhurela ahu mwaha wa muteko anivara aya.

16. Itthu xeeni saamukhaani nikhanle ahu oopaka wira nimulipihe mutthu mukina?

¹⁶ Ankhi akhala wira vannoovilani waaleela akina moota muniwoonela anyu? Okhala wene, khahiyo etthu yootepa ovila waalipiha akina. Nyuwo pooti weererya omutheela mutthu. Akhala wira mutthu owo-tho khontheya, musuweleke wira yookhala enimuxankiha, nto mweererye ovaanela ni yena. Nyuwo pooti omulipiha mwaha wonwiriyana paahi.​—Yakobo 1:19.

17. Exeeni yaamulipinhe munna mmiravo?

¹⁷ Munna mmiravo oniihaniwa Henri aahinyoonyiheya nuumala amusi awe ohiya omurumeela Yehova. Mmosa a yaawo aari tiithi awe, yoowo aarumeela ntoko mutokweene. Vano mutokweene a esirkwiitu, aahoona wira Henri aahiriipiwa murima.  Nto aahirowa owurya ekafe hoothe. Mutokweene ole aahinwiriyana saana Henri vaavo aamutthokiherya awe muxankiho awe. Nuumala ovaanela, Henri aahoona wira enamuna emosa yowaakhaliherya amusi awe otthikela wa Yehova, waari ovikaniha okhala oororomeleya. Nave aahilipa nuumala osoma Esalimo 46, Sofoniya 3:17, ni Marko 10:29, 30.

18. (a) Exeeni Mwene Salomoni olempe awe voohimya sa olipiha? (b) Miruku xeeni murummwa Paulo ovanhe awe?

¹⁸ Exeeni nikhanle ahu oowiixutta ni yowiiraneya ya Martha ni Henri? Nniixutta wira otheene ahu nnoowerya omulipiha munna ni murokora onitthuneya olipihiwa. Mwene Salomoni olempe wira: “Osuwela wakhula otteliha murima: nulumo nowatta okathi worera ti vareranxe. Maitho òtteliwa annatteliha murima: ihali sorera sinnilipiha [makhuva]”. (Miruku 15:23, 30) Niireke munnimuupuwela mutthu onimusuwela anyu oriipiwe murima aahiiso okhulumunwe? Sai weererya omusomela Owehaweha aahiiso websaite ahu? Nave, Paulo ohimmye wira wiipa hoothe isipo sa Omwene ni mutthu owo pooti omwiiriha okhala saana. Paulo olempe so: “Mwixuttihaneke, mulakiheryaneke n’ankhili othene. Mutthapeleni Muluku: mwipeleni ni murim’anyu wothene mw’eroho isipo ni masalmo òtthapa”.—aKolosi 3:16; Miteko 16:25.

19. Xeeni voohipisa-va olipihana onrowa aya okhala wootepa otthuneya? Nto nihaana opaka exeeni?

¹⁹ Vaavo nintepa aya waattamela nihiku na Yehova, ti vootepa otthuneya olipihana mukina ni mukhwaawe. (aHéberi 10:25) Nnoohakalala akhala wira nnootthara ele Paulo ohimmye awe wira: “Mulipihaneke murima, mukhaliheryaneke ntoko sinìranyu vano”.​—1 aTesalonika 5:11.