1-3. (a) Nyuwo amiravo, okumi anyu onlikana ni exeeni? (Nwehe elatarato yoopacerya.) (b) Exeeni enrowa waakhaliherya amiravo maKristau?

NKAHAYA muupuwele mphavelaka orowa epooma yoorakamela mwaha wa etthu yootepa otthuneya. Wira mweette mukwaha owo, munitthuneya onwela karera. Nuumala ophiya nipuro onweliwa karera nyuwo munnixanka, maana aakhala atthu anceene ni akarera anceene. Masi voohakalaliha, nyuwo munnisuwela opuro munrowa anyu ni karera onitthuneya anyu onwela. Tthiri khamunrowa onwela khula karera munimphwanya anyu, okhala wira munnisuwela wira onimooroihani opuro mukina.

² Okumi onoolikana ni weetta mukwaha. Nto nyuwo amiravo munlikana ni atthu ari opuro onweliwa karera. Okathi mukina sinnikhala soothanla ni malakiheryo manceene, nto eyo pooti waakanyerya muupuwelo anyu. Masi, akhala wira munnisuwela etthu eniphavela anyu, vanimookhweelani opaka yoothanla yooloka. Yoothanla xeeni munrowa anyu opaka?

³ Mwaha ola, onrowa waakhula nikoho nna ni onrowa wootumereryani okhalana soolukama sinimuhakalaliha Yehova. Eyo enitaphulela wira muhaana otthara malakiheryo a Yehova okathi  wotheene munipaka anyu soothanla, ntoko osoma, muteko, othela aahiiso otheliwa ni waayara anamwane aahiiso nnaari. Nave enitaphulela wira muhaana wiimananiha wira mphwanye soolukama sanyu somunepani seiyo sinrowa wookhaliheryani omwaattamela Yehova. Akhala wira munniluttuweliwa omurumeela Yehova, mukupaliki wira Yehova onimooreelihani ni wookhaliheryani okhumela saana.​—Musome Miruku 16:3.

4. Mwaha ola ninrowa othokorerya exeeni?

⁴ Ti vooloka okhalana soolukama somunepani. Nthowa xeeni? Ninrowa othokorerya mathowa mararu. Nthowa noopacerya ni na nenli, nnimookhaliheryani woona wira wiimananiha ophwanya soolukama somunepani, sinoowiirihani okhala mpatthani oolokexa a Yehova. Nthowa na neeraru, nnimooniherya otthuneya waya okhalana soolukama somunepani muyenve ene.

5. Nthowa xeeni nuulupalexa ninniiriha okhalana soolukama somunepani?

⁵ Nthowa nuulupalexa ninniiriha okhalana soolukama somunepani, mwaha woowi nimphavela omuxukhurela Yehova mwaha wooniphenta wawe ni itthu onipakenle awe. Namalepa mmosa a Esalimo ohimmye wira: “Etthu yorera wattottopela Apwiya [Yehova]: . . . Apwiya! Miteko sanyu sovuwa sinnikitteliha murima: kinnikhuwela n’utthapa, kivuwihaka itthu sìralyanyu”. (Esalimo 92:2, 5) Nkahaya muupuwele itthu sotheene Yehova oovanhaaweni: okumi anyu, waamini, Biibiliya, muloko ni nlipelelo na okhala mahiku otheene mParayiisu. Mwakhalana soolukama somunepani, munnimooniherya Yehova wira munnimuxukhurela mwaha wa itthu iyo sotheene, nto eyo enoowiirihani otepa omwaattamela.

6. (a) Moota xeeni soolukama somunepani sinlipiha aya waataana wanyu ni Yehova? (b) Soolukama xeeni mukhanle anyu ookhalana muri ene mmiravo?

⁶ Nthowa na nenli ninwiirihani okhalana soolukama somunepani, mwaha woowi vaavo muniimananiha anyu ophwanya soolukama iyo, munninvarela muteko wooloka Yehova, nto eyo enoowiirihani otepa omwaattamela. Murummwa Paulo oleihenrye wira: “Vekekhai, Muluku naxariya: owo khanliyala miteko sanyu sorera n’umphenta wanyu, weiwo othonyenryanyu” mwaha wa nsina nawe. (aHéberi 6:10) Muhuupuweleke wira mootepa oyeva vahinitthuneya anyu okhalana soolukama somunepani. Mwa ntakiheryo, okathi Christine aarina awe iyaakha 10, aahilakela osoma mahiku otheene sowiiraneya sa Anamoona oororomeleya. Nave okathi Toby aarina awe iyaakha 12, aahilakela omusoma Biibiliya ootheene ohinatthi obatiziwa. Nave-tho, Maxim obatiziwe orina ene iyaakha 11, nto murokorawe oniihaniwa Noemi obatiziwe orina ene iyaakha 10. Otheene aya yaahikhalana yoolukama ya orumeela oBetheli. Wira ahiliyale yoolukama aya, awo yaahithomeya eformulaario ya oBetheli mpaani mwaya. Ankhi nyuwo? Niireke mookhalana soolukama sanyu somunepani muniphavela anyu ophwanya?​—Mmusome aFilipi 1:10, 11.

7, 8. (a) Xeeni okhalana soolukama onikhaliherya aya opaka soothanla? (b) Exeeni yaamwiirinhe mwali mmosa ohirowa wuniversidade?

⁷ Xeeni nthowa na neeraru nri aya nootthuneya okhalana muri ene mmiravo? Okhala wira mwa mmiravo, nyuwo mookhalana itthu sinceene soothanla. Mwa ntakiheryo, muhaana othanla ekalaase munrowa anyu omalela ni muteko muniphavela anyu ovara. Soothanla iyo sinlikana ni weetta mukwaha munaphwanya opuro onimwalana iphiro. Akhala wira munnisuwela opuro munrowa anyu, vannikhweya  othanla ephiro yootthara. Moolikanasa, akhala wira munnisuwela soolukama sanyu, vanimookhweelani opaka soothanla mwa miruku. Miruku 21: 5 onihimya so: “Ovara muteko n’utthokelela onnisarya nikuphi”. Mwakhalana soolukama sooloka muyenve ene, moohipisa itthu sinooweettelani saana. Eyo ti etthu yaamwiranenle Damaris okathi aaphavela awe opaka yoothanla yuulupale ori ene mwali.

⁸ Damaris, aahipasari oxikola segundaaria ni inoota sooloka. Nto eyo yammukhaliherya orowa osoma malamulo wuniversidade voohiliva etthu wira okhale advogada. Ohiya-vo, owo aathanlale orowa ovaraka obanko. Nthowa xeeni? Nthowa noowi, okathi aari awe mwaana, aahilakela okhala pioneera. Damaris onihimya so: “Kaahaana ovaraka muteko aka okathi vakhaani. Vaakhanle wira koorowa osoma malamulo wuniversidade, eyo yaamukiphwanyiha musurukhu munceene. Masi vanvila ophwanya muteko wa okathi vakhaani”. Damaris ooviriha iyaakha 20 ori ene pioneera. Niireke onoona wira aahikhalana yoolukama yooloka ni oopaka yoothanla mwa miruku ori ene mmiravo? Aayo. Obanko aavara awe muteko, aanikumana maadvogado manceene asomme malamulo, muteko yoowo aarowa awe ovaraka vaakhanle wira aahirowa wuniversidade. Masi owo onihimya wira aanaaweha maadvogado manceene yahaahakalala ni muteko aya. Damaris ohoona wira okathi wotheene ovinre orumeelaka ntoko pioneera, womphwanyiha ohakalala wuulupale ni woomukhaliherya osyaka oriipiwa murima ntoko maadvogado ale.

9. Xeeni nintthuneya ahu waattottopela amiravo?

⁹ Amiravo anceene olumwenku wotheene annipaka soothanla sooloka, nto ahaana ottottopeliwa. Okhalana soolukama somunepani ni ompatthani ni Yehova teri etthu yuulupale mookumini mwaya. Tthiri amiravo ala annihakalala vanceene ni anniixutta otthara malakiheryo a Yehova okathi wotheene, ohela muhina osoma, muteko, othela aahiiso otheliwa. Mwene Salomoni aahimmye wira: “Mwaroromeleke Apwiya ni murim’anyu wothene”. Nave aahincererya oriki: “Nwupuwele Apwiya mothene munettanyu: awo anolokiha iphiro sanyu”. (Miruku 3:5, 6) Nyuwo amiravo, musuweleke wira Yehova onnoophentani vanceene! Nyuwo tootthuneya vamaithoni vawe, nto owo onimookhapelelani, woolakiheryani ni wooreelihani.

10. (a) Xeeni muteko woolaleerya onitthuneya aya okhala nipuro noopacerya mookumini mwahu? (b) Munrowa owerya sai otthokiherya saana sookupali sanyu?

¹⁰ Vaavo muniimananiha anyu omusiveliha Yehova, munoophavelaka waaleela akina voohimya sa yena. Yesu Kristu aahimmye wira “ehapari yorera ehana olaleiwa toko mulaponi mothene”. (Marko 13:10) Tivonto, muteko woolaleerya ohaana opakiwa moowaakuveya ni ohaana okhala wootepa otthuneya mookumini mwahu. Niireke nyuwo pooti okhalana yoolukama ya olaleerya ikwaha sinceene? Munoowerya okhala pioneero? Masi, ankhi  akhala wira muteko woolaleerya khonoosivelani vanceene? Munrowa owerya sai otthokiherya saana sookupali sanyu? Itthu piili sinoowerya wookhaliheryani: Yoopacerya, mwiilokiheryeke saana. Ya nenli, muhooceyeke waaleela akina ele enisuwela anyu voohimya sa Yehova. Nto munimoona wira muteko woolaleerya onimoosivelakani vanceene.

11, 12. (a) Munrowa wiilokiherya sai wira mwaaleele akina voohimya sa Yehova? (b) Eparakha xeeni munna mmiravo aarina awe wira olavule voohimya sa Yehova oxikola?

¹¹ Mwiilokiheryeke wira mwaakhule makoho anipakiwa ni anaxikola akhwiinyu. Mwa ntakiheryo, awo pooti okoha so: “Kiireke Kihaana Okupali Wira Atthu Aroothatuwa?” Ebroxura Makoho Muloko ennaakhula nikoho nna, nto nyuwo pooti orumeela wira nwaakhule. Aahiiso pooti oweha eviidiyu eri va websaite ahu jw.org mpantta oni: SOWIIXUTTIHA SA BIIBILIYA > AMIRAVO. Nto munoophwanya mpantta oni: Omwaamini Muluku. Nave soolepa iya tthaaru pooti wookhaliheryani: aHéberi 3:4, aRoma 1:20, ni Esalimo 139:14. Nave sookhala ikaruma sikina sikhanle oowookhaliheryani waakhula makoho makina.​—Mmusome 1 Pedru 3:15.

¹² Mwaaleeleke ale anisomana anyu wira pooti oweha mmensaya itthu sikina va jw.org. Eyo ti etthu Luca aapanke awe. Anaxikola aasomana awe yaalavula sa ovirikana wa itiini. Luca aahoona wira itthu saalavuliwa voohimya sa Anamoona a Yehova khahiyo saari sekeekhai. Nnaamwi Luca aaxankale, aahinvekela prusoore wira aatthokiherye anaxikola akhwaawe wira itthu yaahimya aya saari sowoothiwa. Nto prusoore ole aahimweemererya Luca otthokiherya sookupali sawe. Nave Luca aahiwooniherya anaxikola ootheene websaite ahu. Nto prusoore aahaavekela anaxikola otheene oweha eviidiyu eni: Muxintte Sookhanyererya sa Apatthani! Niireke  munniwerya woona moota Luca aahakalanle awe nuumala olaleerya voohimya sa Yehova oxikola?

13. Xeeni vahintthuneya ahu okhulumuwa okathi ninkumana ahu mixankiho?

¹³ Okathi munikumana anyu mixankiho, muhikhulumuweke, masi nvikaniheke wira mphwanye soolukama sanyu. (2 Timótheyo 4:2) Eyo ti etthu Katharina aapanke awe. Okathi aarina awe iyaakha 17 aahilakela waalaleerya atthu otheene aavarana awe muteko. Ikwaha sinceene aamakela oveehiwa ni namuteko mukhwaawe. Masi Katharina khaaliyanle yoolakela awe. Mweettelo awe wooloka, waahimusivela namuteko iihaniwa Hans. Owo aahipacerya osoma iliivuru sahu, muhoolo mwaya onamusoma Biibiliya mpakha obatiziwa. Okhala wira Katharina aahithaamela opuro mukina khaasuwela wira Hans aahibatiziwa. Tivonto, Katharina aahitikinihiwa nuumala iyaakha 13 omphwanya Hans ni emusi awe omuthukumanoni. Nto mulipa-oolavula mwaha aari Hans! Katharina aahihakalala vanceene mwaha woohihiya yoolakela awe ya waalaleerya anamuteko akhwaawe.

14, 15. (a) Muupuweleke exeeni okathi atthu akina anookhanyereryayani opaka itthu anipaka aya? (b) Munrowa olipa sai okathi munikhanyereriwa anyu opaka itthu iyo?

¹⁴ Okhuma wanipacerya, mwaha ola ohootumereryani orumeela okumi anyu wira mmusiveliheke Yehova ni okhalana soolukama somunepani. Masi amiravo akhwiinyu aniphavela opaka itthu sikina aniphavela aya. Nto awo pooti wootumereryani opaka itthu anipaka aya. Moohipisa aahiiso muhoolo, munimwaakhaliherya akina oweha wira munnoona otthuneya waakhwaniherya soolukama sanyu. Nto muhiweemererye atthu akina wooliyalihani soolukama sanyu. Vaakhanle wira muri opuro onweliwa karera, ntoko nihimmye ahu wanipacerya wa mwaha ola, niireke mwaamunwela karera mukina mwaha woowi atthu akina anninwela? Nnakhala vakhaani!

¹⁵ Nto, exeeni enrowa wookhaliheryani ovikaniha okhala oolipa hata atthu akina yookhanyereryakani opaka itthu anipaka aya? Musyakeke okhala opuro waarowa oxankiha okhootta sookhanyererya iyo. (Miruku 22:3) Muupuweleke owereya onikhumelela mwaha woopaka itthu soohiloka. (aGalasia 6:7) Moowiiyeviha muhaana weemererya miruku munivahiwa anyu. Mwaawiriyaneke anamuyari anyu, anna ni arokora oolipa momunepani okathi anoovahaayani miruku.​—Mmusome 1 Pedru 5:5, 6.

16. Yowiiraneya ya Christoph, enooniherya sai otthuneya waya wiiyeviha?

¹⁶ Wiiyeviha waahimukhaliherya Christoph weemererya miruku aavahiwa awe. Moohipisa nuumala obatiziwa, aahipacerya orowa nipuro nniiniwa nikuruta. Opuro ole amiravo akina yaahimulattula okela ekiipa aya. Owo aahimuleela mwaha ole mutokweene mmosa. Nto mutokweene ole aahimuleela wira ohaana wuupuwela itthu sikhanle ookhumelela, ntoko ophavela oxinttana. Hata vari siiso, Christoph aahithanla okela ekiipa ele. Nuuvira okathi, owo aahoona wira xooku yaamwiira aya aari ootakhala ni oowoopiha. Nave Christoph aahitthikela olavula ni axitokweene, nto awo yaahinvaha miruku amurumeelaka Biibiliya. Vano Christoph onihimya wira: “Yehova aahikivaha miruku sooloka aarumeelaka axitokweene nto kaahiiwelela hata waavinre okathi munceene”. Niireke munniiyeviha wira mweemererye miruku munivahiwa anyu?

17, 18. (a) Olelo-va, Yehova oniphavela wira nyuwo amiravo mpakeke exeeni? (b) Munrowa osyaka sai othanana mwaha wa soothanla sanyu mwannuwa? Muhimye yowiiraneya emosa.

 ¹⁷ Biibiliya onihimya wira: “Nyuwo mmiravo [ni mwali], mpuheke omiravo anyu: mutteliweke murima mahiku òmiravo anyu”. (Musuweli 11:9) Tthiri Yehova oniphavela wira mpuheke nlelo muri ene mmiravo. Mwaha ola, nyuwo muhiixutta wira enamuna emosa ya ophwanya ohakalala ti okhalana soolukama somunepani ni otthara miruku sa Yehova okathi munaapaka anyu apalano ni soothanla sanyu. Akhala wira munoopaka eyo nlelo muyenve ene, moohipisa munimoona wira Yehova onimookhapelelani, woolakiheryani ni wooreelihani. Muupuweleke miruku sotheene onoovahaaweni omurumeelaka Biibiliya ni mutthareke miruku iya: “Muhimuliyaleké Muluku òpattunxeni nlelo muri mmiravo”.​—Musuweli 12:1.

¹⁸ Amiravo waakuva wunnuwa. Mooriipiha murima, nuumala wunnuwa, atthu anceene annithanana mwaha woowi khiyaarina soolukama sooloka okathi yaari aya amiravo. Masi akhala wira munimwiimananiha ophwanya soolukama sanyu somunepani, munoohakalala mwannuwa vale mwaha woopaka soothanla sooloka. Ti siiso onoona awe Mirjana. Ori ene mwali, aanisuwela oweetta axooku. Nave aahilattuliwa wiirela mpantta Jogos Olímpicos de Inverno. Masi yena aahithanla omurumeela Yehova muteko wa okathi wotheene. Nuuvira iyaakha 30, Mirjana ni iyawe onnivikaniha ovara muteko wa Muluku wa okathi wotheene. Owo onihimya wira atthu yaale aniphavela ovuwa, ottittimihiwa, okhala oowerya ni othaaciri, khanihakalala. Nave onihimya wira yoolukama yooloka ti omurumeela Muluku ni waakhaliherya atthu omusuwela yena.

19. Xeeni vari aya vootthuneya okhalana soolukama somunepani muyenve ene?

¹⁹ Nyuwo amiravo, munniphwanela ottottopeliwa, maana hata mukumanaka mixankiho, munnivikaniha omurumeela Yehova okumi anyu wotheene. Nyuwo mookhalana soolukama somunepani ni munnoona wira muteko woolaleerya ti wootepa otthuneya mookumini mwanyu. Nave-tho, khamuneemererya olumwenku ola wooliyalihakani soolukama sanyu. Tthiri, mukupaliki wira muteko muninvarela anyu Yehova khahiyo wa mahala. Nave mookhalana anna ni arokora anoophentani ni wookhaliheryani. Tivonto “muhele mmatatani mw’Apwiya miteko sanyu sothene: khamunojela muteko anyu nnakhala mmosá”.