1, 2. (a) Moota xeeni marukunuxo ootutuxerya akhanle aya oonivara? (Nwehe efootu yoopacerya.) (b) Moovarihana ni Esalimo 131, exeeni enrowa onikhaliherya ophwanya murettele wa mmuupuweloni?

NUUMALA Lloyd ni Alexandra orumeela oBetheli iyaakha sinivikana 25, yaahithanleliwa orowa okhala mapioneero. Wanipacerya, awo yaahiriipiwa murima. Lloyd onihimya wira: “Koona wira orumeela oBetheli waari ti mukhalelo aka. Miyo kaanoona mathowa yiirinhe opakiwa marukunuxo ale, masi nuuvira isumana ni myeeri, koona wira nkaaphaveliwa”. Okathi mukina Lloyd aanikhalana moonelo wooloka voohimya sa marukunuxo ale, masi ikwaha sikina nnaari.

² Okathi mukina, anookhumelelaka marukunuxo nahaalipelela ahu, nto awo pooti onixankiha aahiiso onriipiha murima. (Miruku 12:25) Nihaana opaka exeeni wira nikhalane murettele, vaavo vanivila aya weemererya marukunuxo?  (Musome Esalimo 131:1-3.) Nrowe niwehe ele arumeyi a Yehova a khalai ni a mahiku ala apanke aya okathi itthu saaturukeyale aya mootutuxerya wira akhalane murettele wa mmuupuweloni.

3. Moota xeeni okumi wa Yosefe waaturukeyale aya mootutuxerya?

³ Nkahaya muupuwele ntakiheryo na Yosefe. Yakobe aanimphenta vanceene Yosefe waavikana anaawe akina. Eyo yaahiwiiriha annawe omukhalela nrima Yosefe. Okathi Yosefe aarina awe iyaakha 17, annawe yaahimutumiha. (Maphattuwelo 37:2-4, 23-28) Nave okathi Yosefe aari awe wEjiitu, aahiviriha iyaakha 13 ohaawaka, wanipacerya ntoko epottha nuumala-vo aahitthukweliwa mukhatteya. Tthiri owo aari ottaiwene wa apapawe, yaawo yamphenta vanceenexa. Mukhalelo ole khiwaamwiirinhe Yosefe onanariwa ni ohikhalana nlipelelo. Exeeni yaamukhalihenrye?

4. (a) Okathi aari awe mukhatteya, Yosefe aapanke exeeni? (b) Moota xeeni Yehova aakhunle awe mavekelo a Yosefe?

⁴ Ori ene mukhatteya, Yosefe aahivikaniha wuupuwelela moota Yehova aamukhalihenrye awe. (Maphattuwelo 39:21; Esalimo 105:17-19) Woonasa wene, Yosefe aahuupuwela sooloha aarina awe oyenve ene, seiyo saathoonyerya itthu saarowa wiiraneya muhoolo, nto saahimukhaliherya woona wira Yehova aari ni yena. (Maphattuwelo 37:5-11) Pooti wira, Yosefe aaninvekela Yehova ikwaha sinceene omuleelaka khula etthu yaamuxankiha. (Esalimo 145:18) Nto Yehova aanimwaakhula Yosefe ni omulipiherya wira aarowa okhala “ni yowo” hata okathi wa mixankiho.—Miteko 7:9, 10. * (Nwehe enoota.)

5. Moota xeeni “murettele wa Muluku” onnikhaliherya aya?

⁵ Hata muxankiho ahu ori ene muulupale, nnoowerya okhalana “murettele wa Muluku” wira okhapelele “mirima” sahu. (Mmusome aFilipi 4:6, 7.) Vaavo ninxanka ahu aahiiso oriipiwa murima, “murettele wa Muluku” onoonikhaliherya ovikaniha omurumeela Yehova wala ohikhulumuwa. Anna ni arokora a mahiku ala sihaaphwanya mixankiho sinceene. Vano nrowe niwehe ele anniixuttiha aya.

6, 7. Moota xeeni mavekelo annikhaliherya aya ophwanya murettele wa mmuupuweloni? Nvahe ntakiheryo.

⁶ Vaavo Ryan ni Juliette yaaleeliwe aya wira muteko aya wa opioneero wa vameekhaaya a okathi vakhaani waahimala, awo yaahikhulumuwa. Ryan onihimya so: “Moohipisa, naahinvekela Yehova. Naahoona wira ele yaari eparakha ya wooniherya omuroromela wahu Yehova. Okhala wira atthu anceene a muloko ahu yiixuntte niinaano ekeekhai, naahinvekela Yehova wira onikhaliherye waavaha ntakiheryo nooloka na waamini”.

⁷ Yehova aakhunle sai mavekelo aya? Ryan onihimya wira: “Moohipisa nuumala ovekela, muupuwelo ole woohiloka ni woova naarina ahu waahipacerya olakaseya. Murettele wa Muluku waahikhapelela  mirima sahu ni muupuwelo ahu. Naahoona wira nanvikaniha orumeeliwa ni Yehova nakhalana moonelo wooloka”.

8-10. (a) Munepa wa Muluku onnikhaliherya sai vaavo ninxanka ahu? (b) Yehova onnikhaliherya sai vaavo ninvikaniha ahu omurumeela?

⁸ Munepa wa Muluku onoowerya oniphwanyiha omaaleleya ni wuupuwela soolepa sa mBiibiliyani sinnikhaliherya osuwela ele eri yootthuneya mookumini. (Mmusome Yohani 14:26, 27.) Nwehe yowiiraneya ya Philip ni Mary, anamathelana yaahanle wiiriha iyaakha 25 arumeelaka oBetheli. Eriyari ya myeeri 4 akhumme ene oBetheli, aximaama aya yaahikhwa, nave mmusi awe Philip aahikhwa. Nto Philip ni Mary yaahaana omukhapelela paapa awe Mary, yoowo aavahunwe.

⁹ Philip onihimya wira: “Kuupuwela wira itthu saaneetta saana, masi yookhala yahaalonke. Kisomaka Owehaweha, erevista yoosoma, kaahiphwanya yoolepa ya aKolosi 1:11. Ekeekhai wira kaanivilela, masi kaahoona wira nkaavilela moomalela. Tivonto, kaahaana ‘okhalana nthiti n’uvilela mohawani mothene’ moohakalala. Yoolepa ela, yookuupuxerya wira ohakalala waka khonlipa ni makhalelo aka, masi onlipa ni moota munepa wa Muluku onkikhaliherya aya”.

¹⁰ Okhala wira Philip ni Mary yaahivikaniha omurumeela Yehova, owo ohaareeliha mwa inamuna sinceene. Moohipisa, nuumala okhuma oBetheli, awo ahaaphwanya atthu anaasomiha aya Biibiliya ni anikela vahoolo, atthu awo aavekela osoma ikwaha sinceene vasumanani. Mary onihimya so: “Ninnihakalala woona wira eyo enamuna Yehova onikhalihenrye awe osuwela wira itthu sinneetta saana”.

11, 12. (a) Yehova aareelinhe sai wiimananiha wa Yosefe? (b) Yehova aamutthuvenle sai Yosefe?

¹¹ Vaavo itthu sinturukeya aya mootutuxerya, ninnixanka nnuupuwela mixankiho sahu paahi. Eyo yanwerya omwiiraneela Yosefe. Masi Yosefe aahiimananiha opaka ele aawerya awe moovarihana ni mukhalelo awe. Ntoko siisaale aimananiha awe onvarela muteko Potifari, Yosefe aaniimananiha-tho ovara khula etthu aavahiwa awe ni muulupale a mukhatteya.—Maphattuwelo 39:21-23.

¹² Nihiku nimosa, Yosefe aahithanleliwa waaweherya apereso anli yaawo yaarumenle etthoko ya Farawo. Yosefe aanaareerela  murima, nto eyo yaaniwiiriha apereso ale otaphuwa ni omuleela khula etthu yaaxankiha. Tivonto yaamulenle aya itthu yaalonhe aya ohiyu. (Maphattuwelo 40:5-8) Hata ahaasuwela etthu yaarowa wiiraneya muhoolo, ovaanela waya wammwiiriha Yosefe otaphuliwa. Iyaakha piili muhoolo mwaya, Yosefe aahikumihiwa mukhatteya khukhala namalamulela oowerya a wEjiitu. Mutthu aarina owerya onvikana Yosefe aari Farawo paahi!​—Maphattuwelo 41:1, 14-16, 39-41.

13. Hata nikhalanaka muxankiho, nipakeke exeeni wira Yehova onreelihe?

¹³ Moolikanasa ni Yosefe, pooti onikhumelela muxankiho nihinwerya ahu weettiherya. Masi, akhala wira nnoopixa murima ni opaka ele eniwerya ahu, Yehova onoonireeliha. (Esalimo 37:5) Hata nixankale ene wala nihisuwelaka yoopaka, hiyo “khannojeya” aahiiso ohikhalana nlipelelo. (2 aKorinto 4:8) Yehova onookhala ni hiyo, akhala wira ninniluttuweliwa olaleerya.

14-16. Hata makhalelo a Filipe namalaleya yaaturukeyale, aavikaninhe sai oluttuweliwa olaleerya?

¹⁴ Filipe namalaleya, ntakiheryo nooloka na mutthu iimananiha olaleerya hata makhalelo awe yaaturukeyale. Waahikhala okathi aavara awe moohakalala muteko aathanleliwe awe oYerusalemu. (Miteko 6:1-6) Moohipisa, makhalelo awe yaahiturukeya. Nuumala wiiviwa Siteefano, maKristau yaanilupatthiwa vanceene mpakha otthyawa oYerusalemu. Okhala wira Filipe aaphavela ovikaniha olaleerya, aahirowa oSamariya weiwo atthu anceene yaaphavela aya wiiwa ihapari sooreera.​—Matheyo 10:5; Miteko 8:1, 5.

¹⁵ Nave, Filipe aaniphavela orowa khula opuro aathoonyeriwa awe ni munepa wa Muluku. Nto Yehova aahimuruma orowa waalaleerya atthu yahaatonko wiiwa ihapari sooreera. AYuda anceene yaanaanyokha aSamariya. Masi Filipe khaanyokha ni aahaalaleerya ihapari sooreera. Vano aSamariya yaahinwiriyana ni “murima mmosá”!​—Miteko 8:6-8.

¹⁶ Moottharelana, munepa wa Muluku waahimuroiha Filipe epooma ya wAxidodi ni oKesareya, ipooma seiyo yahaareere aya Amalapo. (Miteko 8:39, 40) Nuumala-vo, makhalelo a Filipe yaahiturukeya-tho. Owo aahimaka ni aahikhalana etthoko. Hata makhalelo awe yaaturukeyale, Filipe aaniluttuweliwa olaleerya, nto Yehova aanivikaniha omureeliha Filipe ni etthoko awe.​—Miteko 21:8, 9.

17, 18. Vaavo makhalelo ahu aniturukeya aya, oluttuweliwa olaleerya onrowa onikhaliherya sai?

¹⁷ Anna anceene ari muteko wa Muluku  wa okathi wotheene, anihimya wira oluttuweliwa olaleerya onnaakhaliherya ohakalala ni okhalana moonelo wooloka, hata makhalelo aya aturukeyaka. Mwa ntakiheryo, okathi yaakhumme aya oBetheli anamathelana a wÁfrica do Sul aniihaniwa Osborne ni Polite, awo yuupuwela wira yamphwanya muteko wa okathi vakhaani ni opuro wookhala. Masi Osborne onihimya so: “Ntoko nuupuwela ahu, khinaaphwannye muteko moowaakuveya”. Polite onihimya wira: “Saahivira myeeri miraru nihiphwannye muteko, vano musurukhu ahu waahimala. Nto naahixanka vanceene”.

¹⁸ Exeeni yaamukhalihenrye Osborne ni Polite okathi ole wooxankiha? Osborne onihimya wira: “Olaleerya vamosa ni muloko waahinikhaliherya ovikaniha okhalana moonelo wooloka”. Ohiya okhala owaani yiikhupanyeryaka, awo yaaniluttuweliwa olaleerya. Nto opaka eyo, waanaaphwanyiha ohakalala wuulupale! Nave Osborne onincererya oriki: “Naahiphavelasa muteko mapuro manceene, nto muhoolo mwaya naahiphwanya”.

19-21. (a) Ninrowa ovikaniha sai okhalana murettele wa mmuupuweloni? (b) Ninttottela sai mureerelo vaavo ninkhala ahu moovarihana ni makhalelo ahu masya?

¹⁹ Ntoko niwenhe ahu, opaka ele ninwerya ahu moovarihana ni makhalelo ahu ni omuroromela Yehova, onooniphwanyiha murettele wa mmuupuweloni, hata nikhalanaka mixankiho. (Mmusome Mikeya 7:7.) Nuuvira okathi, nnimoona wira okhala moovarihana ni makhalelo ahu masya onnilipiha waataana wahu ni Yehova. Polite onitthokiherya wira okhuma oBetheli woomukhaliherya woona ele enitaphulela aya omulipana Yehova hata simukhumelelaka mixankiho. Owo oni: “Waataana waka ni Yehova wootepa olipa”.

 ²⁰ Mary, yoowo nimulavunle ahu, onnivikaniha waakhapelela apapawe oowuuluvala ni onnirumeela ntoko pioneera. Owo onihimya so: “Kihoona wira okathi kinixanka aka, kihaana ovekela nuumala-vo ophumurya. Etthu yuulupale kiixuntte aka, omuroromela Yehova ni murima wotheene kikupaliki wira mahiku otheene onookikhaliherya khula etthu”.

²¹ Lloyd ni Alexandra anihimya wira marukunuxo ale aheehererya waamini waya mwa enamuna yahaalipelela aya. Masi, annoona moota yowiiraneya ele yaakhalihenrye aya. Vano, aasuwela wira waamini waya woolipa vanceene ni onniwerya waakhaliherya okathi wa mixankiho. Nave ahoona wira aalipa momunepani.

22. Napaka itthu moovarihana ni makhalelo ahu, nikupaliki exeeni?

²² Olumwenku ola, makhalelo ahu pooti oturukeya mootutuxerya. Hiyo pooti ovahiwa muteko mukina mmutthenkesoni mwa Yehova, owereiwa aahiiso orowa waakhapelela amusi ahu. Moohicikha etthu enrowa wookhumelelani, mukupaliki wira Yehova onimookhapelelani ni wookhaliheryani okathi wooreerela. (aHéberi 4:16; 1 Pedru 5:6, 7) Nto mwiimananiheke opaka itthu moovarihana ni makhalelo anyu. Munvekeleke Tiithi inyu Yehova ni mmuroromeleke ni murima wotheene. Mwiira siiso, hata makhalelo anyu aturukeyaka, okathi wotheene munookhalana murettele wa mmuupuweloni onikhuma wa Yehova.