1, 2. (a) Etthu xeeni Yehova aahimmye awe wira yaarowa wiiraneya mahiku ala? (b) Makoho xeeni anrowa waakhuliwa muru ola? (Nwehe elatarato yoopacerya.)

YEHOVA aahihimya vahinatthi wira mahiku ahu ala “wa khula mutthu òYuda, amalapo mulokó a maloko othene anonvara metto emuhimeryaka wira: ‘Nimphavela wottharani, mana nokupali wira Muluku ori ni nyuwo’”. (Zak. 8:23) Ntoko alopwana ale muloko a nthoonyeryo, olelo-va, ale arina nlipelelo na okhala mparayiisu valaponi annivara nlaya na muYuda. Awo annihakalala ovara muteko vamosa ni ale oowoottihiwa, asuwelaka wira Yehova onnireeliha nikhuuru nle na maKristau oowoottihiwa.—aGal. 6:16.

² Ntoko saahimmye awe Zakariya, nave-tho Yesu aahittittimiherya wira arumeyi a Muluku yaarowa wiiraana. Ahimmye wira atthareli awe yaari igrupu piili: “nikoto namukhani” ni “ipwittipwitthi sikina”, masi otheene aya yaarowa okhala “nikoto nimosa ni makampusi aya mmosá”. (Luka 12:32; Yoh. 10:16) Masi wiiraana wa igrupu iya piili onnikumiherya makoho ala: (1) Ale aniirela mpantta ipwittipwitthi sikina ahaana osuwela masina a axinna otheene oowoottihiwa anikhala olelo-va? (2) MaKristau oowoottihiwa yiixooneke sai? (3) Akhala wira mutthu  mmosa mmulokoni mwanyu oopacerya olya ithoonyeryo nihiku na Niira na Wuupuwelela, munrowa omoonelaka sai? (4) Niireke nihaana oxankiheya mwaha wa wuncerereya wa atthu anilya ithoonyeryo sa Niira na Wuupuwelela? Nrowe nithokorerye makoho ala.

3. Xeeni vahiniweryaneya aya omuhimya ti pani tthiri onrowa wiirela mpantta egrupu ya 144.000?

³ Niireke ale aniirela mpantta ipwittipwitthi sikina ahaana osuwela masina a axinna otheene oowoottihiwa anikhala olelo-va? Waakhuliwa waya ti wira nnaari. Mwaha wa xeeni? Mwaha woowi hata mutthu oottihiwe ene ni munepa wootteela, khivaniweryaneya osuwela akhala wira mutthu owo onootthuveliwa tthiri. Tivonto Biibiliya onihimya awe wira Satana ‘onimwakumiherya atthu òwìpaka . . . maprofeta . . . wira ewotothe hatá atthu òthanliwa’. (Math. 24:24) Khuuvo oniwerya osuwela akhala wira muKristau mmosa oowoottihiwa onimwaakhela etthuvo awe wiirimu, mpakha Yehova onweha wira mutthu owo onniphwanelela tthiri. Yehova onnipaka eyo okathi wa othanliwa wookiserya, eyo piiyo, okathi vakhaani mutthu owo ohinatthi okhwa, wala ahinatthi opacerya maxakha maalupale. (Wis. 2:10; 7:3, 14) Tivonto, khivaniweryaneya nenna-va, mutthu ohimya ti pani tthiri onrowa wiirela mpantta egrupu ya ale 144.000. ^[1]

4. Ninrowa owerya sai waatthara ale oowoottihiwa anikhala valaponi, akhala wira khaninsuwela masina aya otheene?

⁴ Atthu a ‘ipwittipwitthi sikina’ anrowa waatthara sai ale oowoottihiwa anikhala valaponi, akhala wira khanisuwela masina aya otheene? Nkahaya nwehe ele eprofesia ya Zakariya enilavula aya voohimya sa atthu ale muloko a nthoonyeryo. Eyo eniira wira atthu awo “anonvara metto [muYuda] emuhimeryaka wira: ‘Nimphavela wottharani, mana nokupali wira Muluku ori ni nyuwo’”. Nnaamwi oromoliwaka muYuda mmosa, masi vannooneya wira anihimmwa atthu anceene. Nto muYuda, onithoonyerya egrupu ya maKristau oowoottihiwa. Nto khivanitthuneya ophavela omusuwela khula munna wala murokora oowoottihiwa wira nimutthareke yoowo. Nohaana waasuwela ntoko egrupu ni waakhaliheryaka. Biibiliya khonitumererya omutthara pinaatamu. Yesu tori Muhooleli ahu.​—Math. 23:10.

5. Yoolopola xeeni ale oowoottihiwa anireerela aya otthokelela saana? Mwaha wa xeeni?

⁵ Ale anilya ithoonyeryo sa Niira na Wuupuwelela, ahaana otthokelela saana yoolopola eri va 1 aKorinto 11:27-29. (Mmusome.) Exeeni murummwa Paulo aaphavela awe ohimya? MuKristau oowoottihiwa aamoolya ithoonyeryo voohiphwanelela akhala wira khorina wataana wooloka ni Yehova ni khoniroromeleya-tho. (aHéb. 6:4-6; 10:26-29) Yoolopola eyo enniwuupuxerya ale oowoottihiwa wira nlelo khaphwannye etthuvo aya. Awo ahaana ovikaniha wiimananiha wira ‘aphwanye otthuveliwa oniwihanelawe Muluku wirimu oryawe, mwa Yesu Kristu’.​—aFil. 3:13-16.

6. MaKristau oowoottihiwa yiixooneke sai?

⁶ Paulo onnaatumererya maKristau oowoottihiwa wira ‘yetteleke makhalelo òrera, yawo yihaneliwaya’. Moota xeeni? Paulo onitthokiherya so: “Okathi wothene mukhaleke òwìyeviha ni òmàla ni òvilela. Nvilelaneke mukina ni mukhw’awe, mwakhelaneke n’uphenta. Muthokoreryeke okhapelela wiwanana omosaru onvahiwanyu n’iroho yowarya [munepa  wootteela] ni murettele onothukumanyani”. (aÉf. 4:1-3) Munepa wa Yehova onimwiiriha mutthu wiiyeviha, ohiya wiixinnuuha. (aKol. 3:12) Nto, maKristau oowoottihiwa khaniixoona okhala ootthuneya wala okhalana munepa wootteela munceene waavikana akina. Khaniihimya osuwela, wala wira Muluku onnaaleela itthu seiyo akina ahinisuwela aya. Nnakhala khanaaleela akina wira ahaana opacerya olya ithoonyeryo sa Niira na Wuupuwelela, maana anoona wira atthu awo ahoottihiwa ni munepa wootteela. Masi, mowiiyeviha annisuwela wira Yehova paahi tonimulattula mutthu orowa wiirimu.

7, 8. Etthu xeeni maKristau oowoottihiwa ahinilipelela aya? Nthowa xeeni?

⁷ Hata eryeene eparakha yuulupale othanliwa orowa wiirimu, masi ale oowoottihiwa khanlipelela wira athokoreriweke mwa enamuna ya vameekhaaya. (aÉf. 1:18, 19; mmusome aFilipi 2:2, 3.) Awo annisuwela wira okathi Yehova aathanlale awe, khuuvo-tho mutthu mukina aasuwela. Tivonto, awo khanitikhina akhala wira atthu akina annipisa okupali wira mutthu owo ohoottihiwa ni munepa wootteela. Awo annisuwela wira Biibiliya onihimya wira nihaakuveleke omukupali khula mutthu onihimya wira oovahiwa eparakha ya vameekhaaya ni Muluku. (Wis. 2:2) Mutthu oothanliwa khonirowa omuleelaka khula mutthu onikumana awe wira owo towoottihiwa. Ikwaha sinceene, hata khanilavulasa mwaha ene owo, wira akina ahiwooneleke okhala atthu a vameekhaaya; nnakhala khaniikukumiha mwaha wa nlipelelo arina aya.​—1 aKor. 1:28, 29; mmusome 1 aKorinto 4:6-8.

⁸ Ohiya-tho vo, khaniixoona okhala egrupu ya atthu a vameekhaaya. Khaniwaavyasa atthu akina aniihimya okhala oothanliwa, wira athukumaneke poromosa wira apakeke igrupu sinimutokosa Biibiliya. (aGal. 1:15-17) Maana opaka eyo, onookawanya muloko ni waarowa okhala okhootta weettihiwa ni munepa wootteela, yoowo onikumiherya murettele ni wiiraana.—Mmusome aRoma 16:17, 18.

9. Xeeni vanitthuneya aya okhalana ephoole ni moota oniwoonela ahu ale anilya ithoonyeryo sa Niira na Wuupuwelela? (Nwehe ekaaxa eni: “ Ole Oniphenta Khonipaka Itthu Soohiloka”.)

⁹ Nimooneleke sai mutthu onilya ithoonyeryo sa Niira na Wuupuwelela? Yehova onihimya wira ‘othene na axinna’. Onnincererya-tho oriki: “Ole onisinnuwiha, onoyevihiwa: ole onìyeviha, onottittimihiwa”. (Math. 23:8-12) Tivonto, khivanireerela waavuwiha atthu, hata aryeene anna oowoottihiwa a Kristu. Olavulaka sa axitokweene a mmulokoni, Biibiliya onitumererya wira nihaana otakiha waamini waya, ohiya onvuwiha pinaatamu ntoko muhooleli ahu. (aHéb. 13:7) Ekeekhai wira Biibiliya onihimya wira atthu akina anniphwanela “ottittimihiwa valupale”. Masi atthu awo anittittimihiwa mwaha wa ‘wettiha orattene muloko’ ni okhalela nthiti “muteko w’olaleya ni wo wixuttiha”, ohiya mwaha wookhala oowoottihiwa. (1 Tim. 5:17) Tivonto, muKristau oowoottihiwa aarowa wuuliwa muru akhala wira akina anninvuwiha wala otepana omuttittimiha. Nave-tho, wira siiso waarowa owiiriha okhala oowiixinnuuha. (aRom. 12:3) Tthiri hiyo khanimphavela waatthekiha anna awo!​—Luka 17:2.

10. Ninrowa wooniherya sai wira ninnaattittimiha maKristau oowoottihiwa?

¹⁰ Ninrowa wooniherya sai wira ninnaattittimiha ale Yehova onaathanla awe wira arowe wiirimu? Hiyo khaninrowa waakoha anna awo wira anileele itthu voohimya sa woottihiwa waya. Wira siiso, nnoosyaka olavula myaha sihikhanle sawihu. (1 aTes. 4:11; 2 aTes. 3: 11) Nihuupuweleke wira okhala wira mutthu ole ohoottihiwa, nto ole othelanne awe, anamuyari awe wala amusi akina, nave-tho ahaana okhala oowoottihiwa. Woottihiwa ni munepa khonihiyeraniwa wala khoniravihaniwa. (1 aTes. 2:12) Nihimukoheke ole othelanne ni muKristau oowoottihiwa moota onoonela awe, okhala wira owo onrowa ohala mParayiisu valaponi mekhawe. Ohiya omakelaka omukoha itthu saarowa onwereiha murima mukina, nohaana okupaliki wira Yehova onrowa otthukula ntata nawe wira ‘avahe khula etthu atthu othene onaphentawe’.​—Esal. 145:16.

11. Itthu xeeni sinrowa ahu osyaka akhala wira ninnaathokorerya maKristau oowoottihiwa moophwanelela?

¹¹ Ale anaathokorerya maKristau oowoottihiwa moophwanelela, nave-tho anniikhapelela. Okhala wira Biibiliya onihimya wira pooti okhumelela mmulokoni “axinn’ihu òwòtha”. (aGal. 2:4, 5; 1 Yoh. 2:19) Anawoothe awo pooti wiihimyaka wira toowoottihiwa. Ohiya-vo, maKristau makina oowoottihiwa annihiya ororomeleya. (Math. 25:10-12; 2 Ped. 2:20, 21) Akhala wira nnoosyaka ‘owepesa [waavuwiha] atthu’, khaninrowa ohapuxiwa mwekeekhaini; hata khaninrowa ohiya omwaamini Yehova akhala wira muKristau mmosa a khalai onnihiya omurumeela Yehova.​—Yuda 16.

12, 13. Xeeni vahinireerela aya oxankiheyaka mwaha wa mwaattelo wa atthu anilya ithoonyeryo sa Niira na Wuupuwelela?

¹² Mahiku ala, nummuru na atthu anilya ithoonyeryo sa Niira na Wuupuwelela nnootepa nincerereyaka. Ela ennivirikana ni ele yiiraneya iyaakha sinceene ottuli, vaavo nummuru nlo naatepa aya ovukuwa. Nto niireke wuncerereya iwo ohaana onixankiha? Nnaari. Nrowe noone itthu kamosa-kamosa sinireerela wuupuwelelaka.

¹³ “Apwiya [Yehova] annasuwela atthu ari awaya”. (2 Tim. 2:19) Ale anaakontari atthu nihiku na Niira na Wuupuwelela, khaniwerya omusuwela tthiri ole othanliwe. Nto nummuru nlo nnaahela muhina ale anuupuwela wira aathanliwa, masi ahithanliwe. Atthu akina yaalya ithoonyeryo khalai, muhoolo mwaya yaahittharuwa. Mwaha woohikhala saana mmuupuweloni mwaya atthu akina annoolya ithoonyeryo sa Niira na Wuupuwelela yoonaka wira aathanliwa wira aroweke olamulela wiirimu ni Kristu. Tivonto wuncerereya wa atthu anilya ithoonyeryo khonitaphulela wira atthu otheene toothanliwa.

14. Biibiliya onilavula-ni voohimya sa nummuru na atthu oowoottihiwa anrowa ophwanyaneyaka valaponi okathi onipacerya aya maxakha maalupale?

 ¹⁴ MaKristau oowoottihiwa anrowa ophwanyaneyaka mapuro oovirikana okathi Yesu onirwa awe waathukumanya wira arowe wiirimu. Olavulaka sa okathi owo, Biibiliya onihimya so: “N’uruma wa nlope nulupale, Muluku onoruma malaikh’awe, wira yathukumanye atthu àthanlalyawe, okhuma wopajeryani w’erimu ni w’elapo mpakha wokiseryani waya”. (Math. 24:31) Biibiliya onihimya wira mahiku ookiserya, maKristau oowoottihiwa vakhaani paahi tanrowa ophwanyaneyaka valaponi. (Wis. 12:17) Masi Biibiliya khonihimya nummuru nene na maKristau anrowa ohala valaponi okathi anirowa aya opacerya maxakha maalupale.

15, 16. Exeeni enireerela ahu osuwela voohimya sa ale 144.000, Yehova aathanlale awe?

¹⁵ Yehova tonisuwela okathi ene woomuthanla mutthu. (aRom. 8:28-30) Yehova aapacenrye waathanla atthu nuumala Yesu okhwa ni ohihimuxiwa, nto vanikhala wira maKristau otheene a eseekulu yoopacerya yaari oowoottihiwa ni munepa. Okhuma eseekulu yoopacerya mpakha wuupaceryani wa mahiku ookiserya, anamunceene yaihimya okhala atthareli a Kristu, yaari maKristau oowootha; ti yaawo Yesu aalikanyihale awe ni “nthakathaka”. Hata vari siiso, Yehova aahivikaniha owoottiha maKristau makina oororomeleya yaakhala okathi ole, nto awo yaari ntoko “etrigu”. (Math. 13:24-30) Mahiku ala ookiserya, Yehova onnivikaniha waathanla atthu anrowa wiirela mpantta wa ale 144.000. ^[2] Akhala wira Yehova onnithanla ovikaniha waathanla atthu anrowa wiirimu mpakha nenna-va, hiyo khanikhanle onvaanyiha. (Yes. 45:9; Dan. 4:32; mmusome aRoma 9:11-13, 16.) ^[3] Nohaana okhalana ephoole wira nihikhale ntoko anamuteko ale yaamukhupannye pwiya aya mwaha wowaaliva musurukhu mmosaru ale yaalattuliwe vahalaka wiila.​—Mmusome Matheyo 20:8-15.

¹⁶ Khahiyo wira otheene anirowa wiirimu anniirela mpantta “murumeyi òroromeleya ni ànkhili”. (Math. 24:45-47) Ntoko siiraneya aya eseekulu yoopacerya, olelo-va Yehova ni Yesu annaalyiha atthu anceene, aarumeelaka atthu vakhaani paahi. Eseekulu yoopacerya, maKristau oowoottihiwa vakhaani paahi ti yaarumeeliwe wira alepe Soolempwa sa eGriki. Moolikanasa, olelo-va maKristau oowoottihiwa vakhaani paahi tathanliwe wira yaavaheke akhwaaya yoolya yomunepani, okathi wooreerela.

17. Exeeni niixuntte ahu ni mwaha ola?

¹⁷ Exeeni niixuntte ahu ni mwaha ola? Nihiixutta wira Yehova oothanla itthuvo piili wira aavahe arumeyi awe. Ale ari ntoko muYuda, eyo piiyo, maKristau oowoottihiwa anrowa waakhela okumi wiirimu, nto ale ari ntoko alopwana muloko a nthoonyeryo, eyo piiyo, muttitthi munceene wa atthu, anrowa waakhela okumi woohimala valaponi. Masi, igrupu soopiili sihaana ovikaniha ororomeleya. Otheene aya ahaana okhala oowiiyeviha. Otheene aya ahaana omurumeela Yehova mowiiraana. Atthu otheene ahaana wiimananiha wira akumiheryeke murettele mmulokoni. Vaavo vanaattamela ahu wanikisa, otheene ahu nilakele omurumeela Yehova ntoko nikoto nimosa, neettihiwaka ni Kristu.