1-3. Itthu xeeni sa vameekhaaya siiraneya nihiku na Pentekoositi, nto itthu iyo sinaakhwaniherya sai itthu saahimmwe vahinatthi? (Nwehe elatarato yoopacerya.)

YAARI Ettiminku vaasiisu, oYerusalemu. Ettiminku ela, yaari ya vameekhaaya, maana naari nihiku na pentekoositi nenlo naapakiwa okathi waapacerya ohemphwa etrigu. Voosisu yoole mpaani mwa Muluku, mukhulupale aalipa a mukuttho aahivaha mikuttho saaruuhiwa. Iwoora seettaka 9, mukhulupale a anamukuttho aahivaha iphaau piili sooheliwa miropo, seiyo saapakiwe ni etrigu yoopacerya ohemphwa. Soovaha iyo saaniteexeriwa ninno-ninno, sivareleliwe ene mmatatani. (Onam. 23:15-20) Nto itthu sotheene iya siiraneya nihiku na Pentekoositi, mwaakha wa 33 EC.

² Mwa iyaakha sinceene, mukhulupale a anamukuttho aahaana ovaha mukuttho ola, ekwaha emosa vamwaakhani. Yoovaha eyo yaathoonyerya etthu yuulupalexa yiiraneyale nihiku na Pentekoositi a 33 EC. Eyo yahiwiiraneela awiixutti 120 a Yesu, yaawo yaavekela hoothe musaala ya empa emosa, oYerusalemu. (Mit. 1:13-15) Iyaakha 800 ottuli, profeta Yoweli aahilepa voohimya sa yowiiraneya ela. (Yow. 3:1-5; Mit. 2: 16-21) Etthu xeeni yiiraneyale nihiku nle, eri yootepexa otthuneya?

³ Musome Miteko 2:2-4. Nihiku nle, Muluku aahaavaha munepa awe wootteela atthu ale yaathukumanne musaala mme. (Mit. 1:8) Nto yaahipacerya waavaha atthu onamoona, voohimya sa itthu sootikiniha sa Muluku soonale aya ni yaiwale aya. Nuumala orwa muttitthi muulupale wa atthu, murummwa Pedru aahipacerya otthokiherya ele yiiraneyale nihiku nle. Nto aahaaleela atthu awo oriki: “Murukunuxe murima. Khula mutthu abatiziwe ni nsina na Yesu Kristu, wira muleveleliwe itampi sanyu. Siso munimwakhela eroho yowarya [munepa wootteela], eri yovaha ya Muluku”. Nihiku nle, atthu oowiiraka 3.000 yaahibatiziwa, nto naawo-tho yahaakhela munepa wootteela.​—Mit. 2:37, 38, 41.

4. (a) Xeeni vanitthuneya aya othokorerya oratteene itthu siiraneya nihiku na Pentekoositi? (b) Etthu xeeni yiiraneyale iyaakha sinceene vahinatthi, nihiku nimosaru nenno niiriwa Pentekoositi? (Nwehe enoota.)

⁴ Exeeni mukhulupale a anamukuttho ni mukuttho aavaha awe nihiku na Pentekoositi saataphulela aya? Mukhulupale a anamukuttho aamuthoonyerya Yesu. Iphaau, saathoonyerya awiixutti a Yesu oopacerya woottihiwa ni munepa wootteela. Awiixutti ale vamosa ni atthu akina yoottihiwe ni munepa muhoolo mwaya, aathanliwa eriyari ya apinaatamu oottheka wira akhale ntoko milipu, wala ipyo soopacerya. (Yak. 1:18) Muluku ohaakhaliha anaawe, ni ohaathanla wira yalamuleleke wiirimu vamosa ni Yesu, Momweneni mwa Muluku. (1 Ped. 2:9) Yehova onrowa orumeela Omwene awe wira aavahe mareeliho apinaatamu. Nto, hata nilipelelaka okhala wiirimu ni Yesu wala mparayiisu valaponi, Pentekoositi a 33 EC, tootthuneya vanceene. ^[1]

5. Ninsuwela sai wira maKristau otheene oowoottihiwa khahiyo anoottihiwa mwa enamuna emosa?

⁵ Vaakhanle wira muri musaala mwa empa ele nihiku nle na Pentekoositi, nyuwo khimwaarowa oliyala. Khula mutthu aahikhalana etthu vamuru vawe, yaalikana ni malumi a mooro. Yehova aahaavaha owerya olavula mattaava oovirikana. Nto awo khiyaahoverya wira yaahoottihiwa ni munepa wootteela. (Mit. 2:6-12) Nto niireke atthu otheene anoottihiwa ni munepa wootteela enniwiiraneela etthu emosaru yaawiiranenle maKristau ale 120 yaathukumanne? Nnaari. Biibiliya onnooniherya wira, nihiku nenle-tho, atthu akina yahaakhela munepa wootteela okathi yaabatiziwe aya. (Mit. 2:38) Atthu awo akina khiyaarina etthu vamuru vaya yaalikana ni malumi a mooro. Ohiya-vo, khahiyo wira maKristau otheene anoottihiwa ni munepa okathi yoole anibatiziwa aya. Atthu a oSamariya yaakhenle munepa wootteela nuuvira okathi abatiziwe ene. (Mit. 8:14-17) Ekwaha emosa ya vameekhaaya, Kornelio ni atthu yaathukumanne vatthokoni vawe, yaahoottihiwa ni munepa wootteela, nlelo ahinatthi obatiziwa.​—Mit. 10:44-48.

6. Etthu xeeni maKristau otheene oowoottihiwa anaakhela aya, nto eyo enaakupaliha exeeni?

⁶ Tthiri, maKristau annoottihiwa ni munepa mwa inamuna soovirikana. Akina annisuwela moohipisa wira ahoottihiwa, masi akina onnivira okathi nlelo ahisuwelenxe. Hata vari siiso, murummwa Paulo onnihimya ele enimwiiraneela khula mutthu oowoottihiwa ni munepa. Owo ohimmye so: “Nyuwo muhamini ehapar’iyo: siso motthittiwa murohoni ni nlepa na eroho yowarya [munepa wootteela] yeyo Muluku yanlaihenryawe. Eroho yeyo ti nemexeryo [ekanyeryo] na sorera sinrowahu wakhela”. (aÉf. 1:13, 14) Tthiri Yehova onnirumeela munepa awe wootteela wira aasuwelihe maKristau aathanlale awe orowa okhalaka wiirimu. Tivonto, munepa wootteela ori ntoko neemexeryo wala ekanyeryo yoowi atthu awo anrowa okhalaka  wiirimu ohiya valaponi.​—Mmusome 2 aKorinto 1:21, 22; 5:5.

7. Wira aakhele etthuvo awe wiirimu, khula muKristau oowoottihiwa opakeke exeeni?

⁷ Niireke muKristau onaakhela ekanyeryo eyo, enitaphulela wira opuro awe woosukiwa wiirimu tthiri? Nnaari. Ekeekhai wira owo oosuwela tthiri wira oothanliwa orowa wiirimu. Masi onrowa waakhela etthuvo awe akhala wira onoovikaniha okhala oororomeleya. Murummwa Pedru ootthokiherya mwaha ola oriki: “Tivó, axinn’aka, mutepeke olipiha wihaniwa wanyu n’uthanliwa wanyu: mwira siso, khamunira-tho sotakhala. Siso-tho munotthuniheriwa vokhweyaxa okela momweneni mohimala mwa Yesu Kristu, Pwiy’ahu ni Mòpoli ahu”. (2 Ped. 1:10, 11) Tivonto, khula muKristau oowoottihiwa ohaana wiilipiha wira ovikaniheke okhala oororomeleya. Aahiire siiso, khonirowa waakhela etthuvo awe.​—aHéb. 3:1; Wis. 2:10.

8, 9. (a) Xeeni atthu anceene vanaavila aya wiiwexexa moota mutthu onoottihiwa awe? (b) Mutthu onisuwela sai wira oothanliwa orowa wiirimu?

⁸ Arumeyi anceene a Muluku vannaavila osuwelexa moota mutthu onoottihiwa awe. Eyo pooti wiiraneya maana mutthu owo khoottihiwe ni munepa wootteela. Muluku ompattuxaka pinaatamu, aalakenle wira okhalaneke okumi woohimala valaponi, ohiya wiirimu. (Maph. 1:28; Esal. 37:29) Masi Yehova ohaathanla akina wira yarumeeleke ntoko mamwene ni alipa a mukuttho. Eyo eparakha ya vameekhaaya. Tivonto okathi mutthu onoottihiwa awe nroromelo nawe, muupuwelo awe ni moonelo awe sinniturukeya.​—Mmusome aÉfeso 1:18.

⁹ Mutthu onisuwelexa sai tthiri wira oothanliwa orowa wiirimu? Nkawehani ele murummwa Paulo aalavunle awe voohimya sa anna oowoottihiwa a oRoma, yaawo ‘yathanleliwe okhala atthu a Muluku’. Owo aahimmye so: “Tthiri, eroho yakhenlyanyu khinokhalihani-tho ipottha, walá khinoruhelani-tho wova: eroho yakhenlyanyu enokhalihani àna a Muluku. Tivó hiyo vankhuwelelahu wa Muluku, wira: ‘Abbá-Tithi!’ Eroho yeyo ennilavula mmurimani mwahu, enikupalihaka wira hiyo n’àna a Muluku”. (aRom. 1:7; 8:15, 16) Ohimya mookwasa, Muluku onirumeela munepa awe wootteela wira omusuwelihe mutthu wira oothanliwa orowa olamulelaka wiirimu ni Yesu.​—1 aTes. 2:12.

10. Yoolepa ya 1 Yohani 2:27 eniphavela ohimya exeeni, yiiraka maKristau oowoottihiwa khanitthuneya wiixuttihiwa ni mutthu mukina?

¹⁰ Ale yoottihiwe ni munepa wootteela khanlipelela oleeliwa ni mutthu mukina wira ahoottihiwa. Khanilipelela wira mutthu mukina orwe aatokose oratteene. Yehova onnaasuweliha saana wira awo ahoottihiwa tthiri. Murummwa Yohani onnaaleela maKristau awo oowoottihiwa wira: “Vano, nyuwo muhakhela eroho yowarya, erummwe ni Kristu: siso, nyuwo othene munnisuwela”. Nuumala-vo aahincererya oriki: “Nto nyuwo, eroho yowarya evahiwanyu ni Kristu, enkhala mwa nyuwo: tivó nyuwo khamumphavela wixuttihiwa n’atthu. Vano, eroho awe enniwixuttihani sothene, ewixuttihakani ekekhai: eyo khenotha. Nanso, mukhaleke mwa Kristu, ntoko sixuttihiwanyu n’iroho”. (1 Yoh. 2:20, 27) MaKristau oowoottihiwa ahaana wiixuttihiwa ni Yehova, sisaale ntoko atthu akina aniixuttihiwa aya. Masi khanilipelela wira mutthu mukina aakupalihe wira ahoottihiwa tthiri. Yehova onirumeela munepa awe wootteela wira aakupalihe ale aathanlale awe.

11, 12. Etthu xeeni muKristau oowoottihiwa okhanle awe oowiikohaka, masi exeeni yena ohinihoverya awe?

¹¹ Nuumala muKristau woottihiwa ni munepa wootteela, anniiraneya marukunuxo  manceene mookumini mwawe. Yesu ohimmye wira mutthu owo ‘onniyariwa vasyá’. ^[2] (Yoh. 3:3, 5) Aahitthokiherya-tho oriki: “Muhitikinihiwe mwaha wo wohimeryakani wira muhana oyariwa vasyá. Epheyo enòpela ontthunaya-wo: nyuwo munnìwa oruma waya, vano khamunsuwela onkhumaya-wo, walá onkelaya. Siso t’aryaya othene ale ayariwe n’iroho [munepa]”. (Yoh. 3:7, 8) Tthiri vannivila omutthokiherya mutthu ohoottihiwe, ele eniiraneya mookumini mwa mutthu oowoottihiwa.

¹² Ale athanliwe ni munepa wootteela, pooti wiikohaka so: ‘Xeeni Yehova ohalaka okithanla miyo? Xeeni ohimuthanlaka mutthu mukina?’ Ikwaha sikina pooti wiikohaka akhala wira onniphwanelela ovahiwa muritti owo. Masi khonihoverya akhala wira oothanliwa wala nnaari; owo onnisuwela tthiri. Ohiya-vo, onnihakalala ni oxukhurela eparakha eyo. Awo anoonela siisaale Pedru oonela awe: “Nimuttottopele Muluku, Tithi awe Pwiy’ahu Yesu Kristu! Owo, n’umoriwa wawe ikharari wulupale, ònivaha ekumi ya nanano mwaha w’ohihimuwa wa Yesu Kristu mw’alipa-òkhwa. Siso nokhalana ororomela w’ekekhai: ninniroromela wakhela yohiyeriwa ehimpweteya, ehinvukuwa, ehinrimela. Muluku ohosukeryani yohiyeriwa ela wirimu”. (1 Ped. 1:3, 4) Vaavo ale oowoottihiwa anisoma aya moolumo ala, annisuwela tthiri wira Tiithi aya a wiirimu onilavula naawo.

13. Moota xeeni muupuwelo wa mutthu oowoottihiwa oniturukeya aya, ni exeeni eniiriha eyo wiiraneya?

¹³ Ahinatthi othanliwa wira yakhaleke wiirimu, maKristau awo yaalipelela okhalaka valaponi mookathi woohimala. Yaanilipelela okathi Yehova aarowa awe omaliha otakhala valaponi ni okhaliha eparayiisu. Waaniheryasa, yaanuupuwela okathi yaarowa aya owaakhelaka mparayiisu amusi aya akhwiiye. Yaanilipelela oteka ipa saya khiyakhala-mo, waala miri saya khiyalya mihokorokho sene. (Yes. 65:21-23) Nto xeeni ahalaka oturuka muupuwelo aya? Khahiyo wira aroophweeleya ni nlipelelo nlo. Khaturunke muupuwelo aya mwaha wa mixankiho. Hata khahiyo wira yuupuwela wira yaamwaakuva ophweeleya okhalaka valaponi mahiku otheene; hata khiyaaphavela paahi woona moota vaarowa aya oreera okhalaka wiirimu. Ohiya-vo, awo aaturuka muupuwelo aya ni nlipelelo naya mwaha wa munepa wootteela wa Muluku waalattunle.

14. MaKristau oowoottihiwa anoonela sai okumi aya valaponi?

¹⁴ Nto niireke eyo enitaphulela wira maKristau awo aniphavela okhwa? Paulo onaakhula so: “Vekekhai, nikhalaka mmuxaxani-mu, ninnìpulela, niweriwaka n’uhawa: tthiri khinatthuna ohiya erutthu ila, nto nintthuna owarihiwa-tho vamosá erutthu ya nanano, wira erutthu ila enipweteya ewarihiwe n’ikumi”. (2 aKor. 5:4) Khaphweeliwe ni okumi valaponi-va, nto khiyaphavela okhwa mowaakuveya. Ohiya-vo, anniphavela orumeela okumi aya wira amurumeeleke Yehova vamosa ni apatthani ni amusi aya. Masi hata vari siiso, awo khaniliyala eparakha aya yoovuwa, yeeyo Muluku aasukenrye awe muhoolo.—1 aKor. 15:53; 2 Ped. 1:4; 1 Yoh. 3:2, 3; Wis. 20:6.

15. Itthu xeeni sihinooniherya wira mutthu owo ohoottihiwa ni munepa wootteela?

¹⁵ Woonasa wene munniikoha akhala wira moothanliwa orowa wiirimu. Akhala wira munoona wira moothanliwa, xontte muupuwelele makoho ala ootthuneya: Niireke munoona wira munnikhalelexa nthiti muteko woolaleerya? Munniluttuweliwa osoma Nuulumo na Muluku ni munnitokosa “itthu sotikiniha sa Muluku”? (1 aKor. 2:10) Niireke munnoona wira Yehova onnireeliha muteko anyu woolaleerya mwa enamuna ya vameekhaaya? Munnisiveliwa vanceene opaka yootthuna ya Yehova?  Munnoona wira mookhalana muritti muulupale wa waakhaliherya atthu akina momunepani? Niireke mootoko woona wira Yehova onnookhaliheryani mookumini mwanyu? Nto akhala wira munnaakhula wira ‘aayo’ makoho ala otheene moohihoverya, niireke wira eyo ethoonyeryo yoowi moothanliwa orowa wiirimu? Nnaari. Mwaha wa xeeni? Mwaha woowi arumeyi otheene a Muluku pooti woonela siiso, hata ahoottihiwe ni munepa wootteela. Yehova onnaavaha munepa awe wootteela arumeyi awe otheene wira avareke miteko sawe, ohiwehaka nlipelelo arina aya. Mutthu onaanyiherya akhala wira ohoottihiwa wala nnaari, eyo ethoonyeryo yoowi mutthu owo khothanliwe orowa wiirimu. Ale athanliwe tthiri, khanaanyiherya akhala wira aathanliwa wala nnaari. Awo annisuwela!

16. Ninsuwela sai wira mutthu waakhela munepa wootteela khonitaphulela wira oothanliwa orowa wiirimu?

¹⁶ MBiibiliyani aakhala matakiheryo a arumeyi oororomeleya a Muluku, yaawo yaakhenle munepa wootteela, masi khiyaarina nlipelelo noorowa wiirimu. Mmosa aari Yohani Mbatiza. Yesu aanimuttottopela vanceene Yohani, masi aahihimya wira Yohani khaarowa othanliwa wira alamuleleke wiirimu. (Math. 11:10, 11) Murumeyi mukina aakhaliheriwa ni munepa wootteela ti Davidi. (1 Sam. 16:13) Davidi aari mulopwana aathokorerya vanceene itthu somunepani, nave-tho aahikhaliheriwa ni munepa wootteela wira olepe ipantte sikina sa Biibiliya. (Mar. 12:36) Hata vari siiso, nihiku na Pentekoositi, Pedru aahimmye wira Davidi “khawenle wirimu”. (Mit. 2:34) Munepa wootteela waahaakhaliherya vanceene arumeyi awo, masi munepa owo khiwaavahale onamoona wira aathanliwa orowa okhalaka wiirimu. Eyo khenitaphulela wira alopwana ale khiyaarina efaita yuulupale wala khiyaaphwanelela. Masi yaataphulela wira Yehova aarowa waahihimuxa wira yakhaleke mparayiisu valaponi.​—Yoh. 5:28, 29; Mit. 24:15.

17, 18. (a) Nlipelelo xeeni arina aya arumeyi anceene a Muluku? (b) Makoho xeeni anrowa othokoreriwa mwaha onittharelana?

¹⁷ Anamunceene animurumeela Yehova olelo-va, khanilipelela orowa wiirimu. Awo arina nlipelelo nimosaru aarina awe Davidi, Yohani Mbatiza ni alopwana ni athiyana akina oororomeleya a khalai. Sisaale ntoko Abrahamu, awo annilipelela okhala valaponi alamuleliwaka ni Omwene wa Muluku. (aHéb. 11:10) Atthu vakhaani paahi oowoottihiwa tahanle valaponi-va, mahiku ala ookiserya. (Wis. 12:17) Eyo enitaphulela wira anceene a 144.000 oowoottihiwa, ahookhwa moororomeleya.

¹⁸ Nto ale arina nlipelelo nookhala valaponi, amooneleke sai mutthu onihimya wira oothanliwa orowa wiirimu? Akhala wira mutthu mmosa mmulokoni mwanyu oopacerya okhuura ephau ni owurya eviinyu ya nthoonyeryo nihiku na Niira na Wuupuwelela, munrowa omoonelaka sai? Niireke muhaana oxankiheya mwaha wa wuncerereya nummuru na atthu anilya ithoonyeryo, molumwenkuni motheene? Makoho ala anrowa waakhuliwa mwaha onittharelana.