1, 2. Ekhotto xeeni arina aya arumeyi a Yehova?

OKHUMA okathi wa Abeli, murumeyi eettela exariya a Muluku mpakha arumeyi otheene oororomeleya a mahiku ala, anniwana ekhotto. Murummwa Paulo aahaahimeerya maKristau aHeeberi wira ‘yahivilela ekhotto yulupale’ vaavo yaamananiha aya weemereriwa ni Yehova ni ophwanya mareeliho. (aHéberi 10:32-34) Paulo aahilikanyiha ekhotto ya maKristau ni axooku a ovothana yiiriwa ni atthu a oGresia, ntoko otthimaka, ni owana wa inamuna soovirikana. (aHéberi 12:1, 4) Olelo-va, ninnitthimaka wira naphwanye okumi woohimala, ni nookhalana anyokhani yaawo aniphavela onooceeliha ohakalala vano ni ophwanya mareeliho muhoolo.

² Ekhotto eniwana ahu ti yuulupale, maana ‘ninwana’ ni Satana ni olumwenku awe. (aÉfeso 6:12) Ti vootthuneya osyaka aahiiso okhootta sowiixuttiha sa elapo ela, ifilosofia, soolema soohiloka ntoko orupihana woohiloka, ompaha soona, ohapaliwa, olya aahiiso owurya mirette soohapala. Nave nihaana ovikaniha wiimananiha wira nixintte okhulumuwa  ni sootteettheya sahu.​—2 aKorinto 10:3-6; aKolosi 3:5-9.

3. Muluku onnikhaliherya sai owana ni awanani ahu?

³ Niireke vanniweryaneya waaxintta awanani awo ootupa? Aayo, masi vanitthuneya wiimananiha! Paulo aahiilikanyiha ni mutthu oniwana ebookisi, oriki: “Miyo-tho kinnitthimaka, nto kosuwela ontthimakelaka-wo: kinniwana, nto khahiyó ntoko kimmana epheyo”. (1 aKorinto 9:26) Ntoko mulipa-oniwana ebookisi oniwana awe ni nabookisi mukhwaawe, nihaana owana ni awanani ahu. Yehova onninikhaliherya ni oniixuttiha moota woowana. Owo onniixuttiha omurumeelaka Biibiliya. Nave, onninikhaliherya orumeelaka iliivuru sahu, mithukumano sa eKristau, asembeleya ni akongresu. Niireke munnirumeela malakiheryo awo anivahiwa anyu? Akhala wira khamunirumeela, khamunrowa owerya omuxintta nwanani inyu, ntoko siisaale mutthu oniwana ebookisi ommana awe epheyo.

4. Ninrowa opaka exeeni wira nihixinttiwe ni sootakhala?

⁴ Nihaana wiipasoopa okathi wotheene. Nthowa xeeni? Nthowa noowi awanani ihu pooti ontuphela okathi nihinlipelela ahu aahiiso okathi onitteettheya ahu. Biibiliya onninlopola ni onlipiha vaavo vanihimya awe wira: “Muhìhiyé muxinttiwaka ni sotakhala, masi muxintte sotakhala mwiraka sorera”. (aRoma 12:21) Akhala wira nnoovikaniha owanana sootakhala, nnoowerya oxintta! Masi, nooceya nnahiya owana, Satana, olumwenku awe ni otteettheya wahu, onrowa onixintta. Nto, nihooceye. Tivonto, muhikhulumuwe ni muhoolowihe miyoono sanyu!​—1 Pedru 5:9.

5. (a) Wira neemereriwe ni Muluku ni ophwanya mareeliho, nihaana wuupuwela exeeni? (b) Arumeyi xeeni a Muluku anrowa ahu waathokorerya?

⁵ Wira naaxintte awanani ihu, nihaana wuupuwelaka nthowa ninniiriha owana. Hiyo ninniwana maana nimphavela weemereriwa ni Muluku ni ophwanya mareeliho. AHéberi 11:6, onihimya so: “Ole onimwattamela Muluku ohana wamini wira Muluku òkhala ni wira onnatthuvela ale animphavela”. Omphavela Yehova ontaphulela wiimananiha vanceene, akhala wira nimphavela weemereriwa ni yena. (Miteko 15:17) MBiibiliyani, aakhala matakiheryo manceene ooloka a alopwana ni athiyana yaapanke eyo. Yakobe, Rakheli, Yosefe ni Paulo yaahikumana mixankiho suulupale mookumini mwaya. Hata vari siiso, atthu awo yaahixintta. Matakiheryo aya anooniherya wira naimananiha vanceene, nnoowerya waakhela mareeliho a Yehova. Nrowe noone.

6. Exeeni yaamukhalihenrye Yakobe ovilela, ni aatthuveliwe sai? (Nwehe elatarato yoopacerya.)

⁶ Mulopwana oororomeleya Yakobe aahiwana khuvilela, okhala wira aanimphenta Yehova ni aanivaha efaita wataana wawe ni yena. Owo animwaamini Yehova wira aamureeliha osuulu awe. (Maphattuwelo 28:3, 4) Okathi Yakobe aarina awe iyaakha 100, aahiwana ni nlaikha ni aahaakhela mareeliho a Muluku. (Musome Maphattuwelo 32:25-29.) Niireke Yakobe aahikhalana ikuru wira owane ni nlaikha nne? Nnaari! Masi aahilakela ni aahooniherya wira aaniimananiha wira aakhele mareeliho! Yehova  aahimureeliha Yakobe mwaha wa ovilela wawe ni khunvaha nsina na Isarayeli, nsina nenno nintaphulela: “Owana ni Muluku, Khuvilela”. Yakobe aahitthuveliwa. Nto hiyo ninniphavela otthuveliwa, eyo piiyo, weemereriwa ni Yehova ni oreelihiwa.

7. (a) Muxankiho xeeni wooriipiha murima aarina awe Rakheli? (b) Exeeni Rakheli aapanke awe, ni aareelihiwe sai?

⁷ Nave, Rakheli, mwaara a Yakobe, aaniphavela vanceene woona moota Yehova aarowa awe omureeliha iyawe. Masi waahikhala muxankiho. Rakheli khaayara. Khalai, ohiyara wanaaxankiha vanceene athiyana. Moota xeeni Rakheli aavikaninha awe owana nnaamwi aariipiwe murima? Owo khaakhulumunwe. Masi aahivikaniha owana onvekelaka Yehova ikwaha sinceene. Yehova aahiwiriyana mavekelo a Rakheli khumureeliha onvahaka anamwane. Ti nthowa naya Rakheli aahimmye awe wira: “Kowana . . . Komuxintta!”​—Maphattuwelo 30:8, 20-24.

8. Mixankiho xeeni Yosefe aarina awe, ni ntakiheryo xeeni nooloka onivanha awe?

⁸ Ntakiheryo na ororomeleya wa Yakobe ni Rakheli, naahimukhaliherya Yosefe okathi aarina awe mixankiho. Vaavo Yosefe aarina awe iyaakha 17, itthu saahiturukeya mookumini mwawe. Annawe, yaanimukhalela nrina, khumutumiha ntoko epottha. Ohoolo waya, aahiviriha iyaakha sinceene oryeene mukhatteya wEjiitu, nnaamwi ahaatthenke. (Maphattuwelo 37:23-28; 39:7-9, 20, 21) Masi Yosefe khaakhulumunwe aahiiso onyoonyiheya, nnakhala kheerenrye owunlela ikuhu. Nthowa xeeni? Nthowa noowi Yosefe aanivaha efaita wataana aarina awe ni Yehova ni aanimwaamini ni murima awe wotheene. (Onamukuttho 19:18; aRoma 12:17-21) Ntakiheryo na Yosefe nnoowerya onikhaliherya. Hata  nihuuwale ene etthoko yoohiloka aahiiso noonaka wira khanrina nlipelelo, nihaana ovikaniha owana ni ovilela. Napaka eyo, nikupaliki wira Yehova onrowa onreeliha.​—Musome Maphattuwelo 39:21-23.

9. Ninrowa omutakiha sai Yakobe, Rakheli ni Yosefe?

⁹ Olelo-va, ninnivilela mixankiho suulupale. Waaniheryasa, munnihaawa mwaha wa ohikhala exariya, nthalu aahiiso othweiwa ni okhaleliwa nrima. Ohiya okhulumuwa, muupuweleke etthu yaamukhalihenrye Yakobe, Rakheli ni Yosefe wira avikanihe omurumeela Yehova moohakalala. Muluku aahaavaha ikuru ni waareeliha mwaha woowi atthu awo yaanivaha efaita yuulupale wataana yaarina aya ni yena. Awo yaahivikaniha owana ni opaka itthu moovarihana ni mavekelo aya. Okhala wira ninkhala mahiku ookiserya, vannitthuneya ovikaniha olipiha nlipelelo nahu! Niireke munniphavela owana, niire so, wiimananiha vanceene wira mweemereriwe ni Yehova?

10, 11. (a) Xeeni vanitthuneya ahu owana wira naakhele mareeliho a Muluku? (b) Exeeni enrowa onikhaliherya opaka soothanla sooloka?

¹⁰ Xeeni vanitthuneya ahu owana wira nreelihiwe ni Muluku? Mwaha wookhala alipa-oottheka, pooti wira sookhala soophavela soohiloka siniwanana ahu. Anna akina anniimananiha wira akhalane moonelo wooloka muteko woolaleerya, ni akina annihaawa mwaha woowereyasiwa ni omeekha. Nave akina vannaavila waalevelela ale yaatthekenle. Hata nimurumeelaka Yehova okhuma khalai, otheene ahu nihaana owanana itthu sinnikhoottiherya omurumeela Muluku, yoowo onaatthuvela ale oororomeleya.

¹¹ Mwekeekhai, eri etthu yoovila vanceene okhala muKristau ni opaka soothanla sooloka, otepexa wene akhala wira ninniwanana soophavela soohiloka. (Yeremiya 17:9) Akhala wira munoona siiso, munvekele Yehova ni nvekele munepa awe wootteela. Munepa wootteela ni nivekelo sinimookhaliheryani ophwanya ikuru wira mpakeke itthu sooloka ni waakhela mareeliho a Muluku. Mmananihe opaka itthu moovarihana ni mavekelo anyu. Mweererye omusoma Biibiliya khula nihiku, okhalana yoosoma anyu ni omulompa Muluku vatthokoni.​—Musome Esalimo 119:32.

12, 13. Exeeni yaakhalihenrye maKristau manli owanana soophavela soohiloka?

¹² Aakhala matakiheryo manceene anooniherya moota Nuulumo na Muluku, munepa awe ni iliivuru sa otthokeya wahu, saakhalihenrya aya anna ni arokora oxintta soophavela saya soohiloka. Mmiravo mmosa aahisoma mwaha oni: “Como vencer desejos errados”, ori erevista Despertai! 8 a Dezembro, 2003. Owo oonenle sai? “Kinniwana ni muupuwelo aka woohiloka. Nuumala osoma mwaha ole kaahoona wira ‘anna anceene anniwanana soophavela soohiloka’, nave kihoona wira nkikhanle mekhaka. Tthiri kiniirela mpantta nikhuuru na anna a olumwenku wotheene”. Mmiravo ola aahikhaliheriwa-tho ni mwaha oni: “Deus aprova estilos de vida alternativos?”, yoowo ori erevista Despertai! 8 a Outubro, 2003. Nuumala osoma mwaha ole, owo aahoona wira anna akina aakhalana ekhotto ehinimala, ntoko “ohawa mwerutthuni”. (2 aKorinto 12:7) Masi, vaavo  anvikaniha aya wiimananiha wira akhalane mweettelo wooloka, awo annikhalana nlipelelo neekeekhai. Nave aahincererya oriki: “Mwaha wa yeeyo, kinnoona wira khula nihiku ninvira kinoowerya okhala oororomeleya. Kinnimuxukhuru vanceene Yehova mwaha woorumeelaka otthokeya wawe wira onikhaliherye ovilela khula nihiku olumwenku ola wootakhala”.

¹³ Muthokorerye-tho yowiiraneya ya murokora mmosa a wEstados Unidos. Owo olempe wira: “Kinnixukhurela mwaha woowi okathi wotheene munninivaha yoolya yomunepani okathi wooreerela. Ikwaha sinceene, kinoona wira myaha iya kilepeliwe miyo. Mwa iyaakha sinceene, kinniwanana soophavela soohiloka seiyo sihinimusivela Yehova. Ikwaha sikina, kinnuupuwela otthikela ottuli aahiiso ohiya owana. Kinnisuwela wira Yehova toomoriwa ikharari ni toolevelela, masi okhala wira vamurimani vaka itthu iyo sinnikisivela, kinoona wira nkimphwanela waakhela nikhaliheryo. Ekhotto ela ehinimala ennikixankiha vanceene. . . . Nuumala osoma mwaha oni: ‘Nyuwo mookhalana “murima wa omusuwela” Yehova?’, waakumiheriwe erevista Owehaweha 15 a Março, 2013, kaahoona wira Yehova onniphavela tthiri okikhaliherya”.

14. (a) Paulo oonela sai ekhotto aawana awe? (b) Ninrowa oxintta sai sootteettheya sahu?

¹⁴ Mmusome aRoma 7:21-25. Paulo aanisuwela saana wira ti voovila owanana soophavela soohiloka ni sootteettheya sahu. Masi, aanikupali wira anwerya oxintta onvekelaka Yehova nikhaliheryo ni aaminiki mukuttho onoopola wa Yesu. Ankhi hiyo? Niireke nnoowerya owanana sootteettheya sahu? Aayo, akhala wira nnoomutakiha Paulo, nimulipanaka Yehova ni murima ahu wotheene ni waamini mukuttho wa Yesu, ohiya ikuru sahu.

15. Moota xeeni Yehova onnikhaliherya awe ovikaniha okhala oororomeleya ni ovilela soweeha?

¹⁵ Ikwaha sikina Muluku onneemererya onikhumelela muxankiho wira owehe moonelo ahu aahiiso murima ahu. Mwa ntakiheryo, akhala wira hiyo aahiiso mutthu mukina a emusi ahu onniwereyasiwa aahiiso othokoreriwa moohixariya, munrowa woonela sai? Akhala wira nnoomuroromela Yehova ni murima ahu wotheene, ninrowa onvekela ikuru sinrowa onikhaliherya okhala oororomeleya, ohakalala ni olipiha wataana wahu ni yena. (aFilipi 4:13) Aakhala matakiheryo manceene a maKristau a khalai ni a mahiku ala, anooniherya wira nivekelo nnoowerya onivaha ikuru ni olipa murima wira nivikanihe ovilela.

16, 17. Exeeni elakenle anyu opaka?

¹⁶ Diabo aamusiveliwa woowehani mukhulumunwe ene, muhin’ye ene omurumeela Yehova ni moolowinhe ene miyoono sanyu. Tivonto, mmananihe ‘oweha itthu sothene, ni muthanleke sorera’. (1 aTesalonika 5:21) Tthiri munoowerya omuxintta Satana, olumwenku awe wootakhala ni soophavela soohiloka! Munooxintta ekhotto eyo, akhala wira munniroromela wira Yehova onimoovahani ikuru ni wookhaliheryani.​—2 aKorinto 4:7-9; aGalasia 6:9.

¹⁷ Tivonto, nvikaniheke owana. Muhooceye. Mwiilipihe. Nvikanihe ovilela. Tthiri mukupaliki wira Yehova onrowa ‘womorihelani watta wa sorera sa khula enamuna’, eyo piiyo, mareeliho manceene.​—Malakhiya 3:10.