Yehova oniphavela wira ale anithelana ahakalaleke ni akhalaneke waataana wooloka mahiku otheene. (Math. 19:4-6) Akhala wira nyuwo muniphavela othela wala otheliwa, munrowa omphwanya sai mutthu munireerela anyu othelana? Okhala wira Mpattuxa, Yehova onnisuwela etthu ninreerela ahu opaka wira nikhalane ekasamento yoohakalala. Nto akhala wira nyuwo munootthara malakiheryo onnivaha awe, nyuwo munoophwanya ohakalala wekeekhai. Nrowe niwehe malakiheryo vakhaani.

Yoopacerya, nihaana osuwela oratteene mmansihu ekeekhai ela ya mBiibiliyani eni: “T’ani onwerya otokosa murima wa mutthu? Khivo etthu yotakhala envikana murima wowotha”. (Yer. 17:9) Vaavo atthu anli aniphavela othelana anisuwelana aya, anapacerya onamorari awo annaataana ni annisivelana vanceene. Nto vannivila wuupuwela oratteene. Ale anipaka soothanla voohimya sa ekasamento mwaha wa moonelo aya wala mwaha wa okhummwa murima, anoophwanya maxakha, niire so, anooriipiwa murima. (Mir. 28:26) Nto khahiyo etthu ya miruku atthu anli ahinisuwelana oratteene opacerya osivelana mukina ni mukhwaawe. Nave ti vooloka atthu anli aniphavela othelana osuwelana oratteene mukina ni mukhwaawe.

Miruku 22:3 onihimya so: “Mulipa-ànkhili onnona yowopiha, anahuluwa: mulolo onnikumana vohupuwela, khutakhaliwa”. Xeeni vari aya voohiloka orumeela isaite wala redes sociais wira mumphavele mutthu munireerela anyu othelana? Mooriipiha murima, atthu akina sihaakhumelela mixankiho ni aawokiwa mwaha wa orumeela interneti wira amphavele mutthu oothelana. Nave atthu akina ootakhala murima annirumeela ikontha sowoothereriwa munternetini wira yaawoke ni awiiyerye atthu musurukhu aya. Nto okathi mukina anawoothe awo annoothererya wira Anamoona a Yehova.

Nwehe itthu sikina sootakhala sikhanle ookhumelela. Isaite sikina sa atthu ansuwelana aya wira athelane sinnirumeela enamuna eniihaniwa algoritmos wala orumeela ikontha sa Matemática wira asuwele akhala wira atthu anli yathelana anookhumela saana. Masi khasikhanle itthu sinooniherya oratteene wira enamuna eyo ti yooloka. Nkahaya muupuwele ela, ekasamento etthu ya efaita yinceene. Munoona wira vaarowa okhala vooloka omwaavya mutthu oothelana murumeelaka iprokrama sa komputatore sipakiwe ni apinaatamu? Munoona wira itthu apinaatamu apanke aya sinnilikana ni malakiheryo a mBiibiliyani?—Mir. 1:7; 3:5-7.

Eliivuru ya Miruku 14:15 ninniphwanya malakiheryo makina oovara murima. Yoolepa eyo enihimya so: “Ohipasopa onnikupali sothene sinihimeriwawe:  mulipa-ànkhili onniwehaweha mwettelo awe wothene”. Wira musuwele akhala wira mutthu owo onookhala mulopwana oothela ooloka wala muthiyana ootheliwa ooloka, muhaana toko omusuwela oratteene. Nto vannivila opaka eyo murumeelaka interneti. Ekeekhai wira nyuwo pooti orumeela iperfili, ifootu ni olavula murumeelaka mensagem. Masi munoona wira itthu iyo paahi sinniphiyerya wira mmusuwele oratteene mutthu? Atthu akina yuupuwela wira yaahimphwanya mutthu ooreerela othelana, masi yaahixanka vanceene ni oriipiwa murima ekwaha yoopacerya yaakumanne aya ni mutthu owo.

Mulipa-oolepa Esalimo emosa aahimmye so: “Miyo nkikilanthe n’alavilavi: nkìranne n’atthu a mirima mili”. (Esal. 26:4) Wira akhaleke ntoko tooreera, atthu akina annootha wala annihela ifootu sowoothereriwa iperfili saya musaitini wala aplikativo anirumeeliwa wira mutthu omphwanye mutthu onireerela awe othelana wala onamorari. Nto vannireerela wuupuwela oratteene itthu sikina. Hata mutthu owo ohimyaka wira Namoona a Yehova, niireke tthiri muKristau oopatisiwa? Mutthu oolipa momunepani? Ookhalana waataana wooloka ni Yehova? Onnittittimihiwa mmulokoni ni onnaavaha ntakiheryo nooloka atthu akina? Khahiyo ‘mpatthani oohiloka?’ (1 aKor. 15:33; 2 Tim. 2:20, 21) Niireke tthiri owo ootaphuwa wira othelane ni mutthu mukina moovarihana ni malakiheryo a mBiibiliyani? Wira musuwele waakhuliwa wa makoho awo, woonasa wene muhaana olavula ni Namoona a Yehova onimusuwela oratteene mutthu owo muniphavela anyu onamorarana wala othelana. (Mir.  15:22) Ekeekhai wira khuuvo murumeyi oororomeleya a Yehova aarowa othelana ni mutthu ‘ohinaamini’.—2 aKor. 6:14; 1 aKor. 7:39.

Ntoko niwenhe ahu, orumeela isaite wala aplikativo atthu anaarumeela aya wira amphwanye mutthu oothelana, etthu yootakhala. Masi sookhala inamuna sooloka sa omusuwela mutthu mukina munireerela anyu othelana. Munrowa omphwanya woowi mutthu munireerela anyu othelana? Akhala wira khonikhoottihiwa othukumana vamosa, Anamoona a Yehova, annithukumana mmulokoni, asembeleya ni akonkresu.

Akhala wira khivaniweryaneya othukumana vamosa wira apake mithukumano iyo ntoko okathi ola wa eretta ya olumwenku wotheene ya koronaviru aahiiso COVID-19, Anamoona a Yehova annirumeela interneti wira apake mithukumano saya. Nto okathi wa mithukumano iyo nirumeelaka interneti, anna ni arokora oohitheliwa annikhalana eparakha ya osuwelana mukina ni mukhwaawe. Nave annikhalana eparakha ya oweha moota mutthu onipaka awe mipantta sawe ntoko olavula myaha ni wiiwa moota onooniherya awe waamini wawe vaavo onivaha awe ikomentaario sawe. (1 Tim. 6:11, 12) Nave nuumala mithukumano, vanniweryaneya orumeela isaala sikina wira nivaanele ni anna ni arokora. Nto vaavo munithukumana anyu ni Anamoona akina murumeelaka interneti, vanniweryaneya onweha mutthu muniphavela anyu othelana, moota onaathokorerya awe atthu akina ni eyo enimookhaliheryani osuwela omutthu awe wala mikhalelo sawe. (1 Ped. 3:4) Nuuvira okathi, nyuwo munoowerya omusuwela oratteene mutthu owo. Osuwela soolakela sawe ni mikhalelo sawe sikina ni oweha akhala wira vanooreerela othelana.

Okathi anna ni arokora oohithela anitthara aya malakiheryo ari mBiibiliyani vaavo anipaka aya soothanla voohimya sa ekasamento, woonasa wene anookhalana ekasamento yoohakalaliha. Eliivuru ya Miruku 18:22 enihimya so: “Onimuthela mwar’awe onniphwanya oreriwa: Apwiya t’animureriha ni yovah’eyo”.