1. Xeeni Yehova ohininlikanyiha awe ni atthu akina?

YEHOVA onnisiveliwa ovirikana wa itthu. Eyo ennooneya ni itthu opattunxe awe waahela muhina apinaatamu. Khula mmosa a hiyo ookhalana mikhalelo sa vameekhaaya. Tivonto Yehova ohinoolikanyihaaweni ni atthu akina. Owo onnitokosa mirima sa atthu ni onniweha ele eri vamurimani vahu. (1 Sam. 16:7) Nave owo onniweha itthu sooloka muniwerya anyu opaka, itthu muhiniwerya anyu opaka ni moota muhuuwale anyu. Yehova khonoovekelani opaka etthu muhiniwerya anyu. Nto nihaana wiixutta wiithokorerya ntoko Yehova onnithokorerya awe. Akhala wira nnoopaka eyo, hiyo khaninrowa wuupuwelaka wira na atthu ootepexa oloka waavikana atthu akina wala khanirina efaita.—aRom. 12:3.

2. Xeeni vari aya vooloka ohiilikanyiha ni atthu akina?

² Khahiyo vootakhala wiixutta etthu ni matakiheryo ooloka a atthu akina. Mwa ntakiheryo, anna ni arokora akina anisuwela olaleerya, pooti oniixuttiha etthu yuulupale. (aHeeb. 13:7) Opaka eyo, pooti onikhaliherya oweha inamuna nikhanle ahu oolokiherya muteko ahu woolaleerya. (aFil. 3:17) Masi wookhala ovirikana wuulupale eriyari ya otthara ntakiheryo na mutthu ni wiilikanyiha ni atthu akina. Mutthu oniilikanyiha ni atthu akina pooti opacerya waakhalela nrima wala okhulumuwa ni pooti wuupuwela wira khorina efaita. Nave ntoko niwenhe ahu mwaha ovinre, wiilikanyiha ni anna ni arokora akina a mmulokoni, pooti onikumiherya mixankiho mukhalelo wa omunepani. Tivonto moophenta, Yehova onnitumererya awe oriki: “Khula mutthu ovareryeke miteko sawe. Siiso, onootteeliwa murima mwaha wa miteko sawe, ohiya mwaha wowiilikanyiha ni atthu akina”.—aGal. 6:4.

3. Mipantta xeeni sinoohakalalihani munoona anyu wira mookela vahoolo?

³ Yehova oniphavela wira muhakalaleke mwaha wa okela wanyu vahoolo momunepani. Mwa ntakiheryo, akhala wira moopatisiwa, muhakalaleke mwaha woophwanya yoolukama eyo. Maana nyuwo  mmensinyu muthanlale opaka eyo mwaha woowi munnimphenta vanceene Muluku. Nave nkahaya muupuwele moota mukenle anyu vahoolo okhuma okathi mpatisiwe anyu. Mwa ntakiheryo, niireke onnoosivelani omusoma Biibiliya ni opaka yoosoma anyu? Niireke mahiku ala munnivekela ni murima wotheene? (Esal. 141:2) Niireke vano onnoosivelani olaleerya ni munnirumeela ikaruma sinnikhaliherya olaleerya? Akhala wira mookhalana etthoko, niireke munoona wira Yehova ohookhaliheryani okhala mulopwana oothela ooloka, muthiyana ootheliwa ooloka wala anamuyari ooloka? Akhala wira mookela vahoolo mipantta iyo, muhakalaleke ni muxukhureleke vanceene.

4. Mwaha ola, ninrowa wiixutta exeeni?

⁴ Hiyo nihaana waakhaliherya atthu akina ohakalala mwaha wa okela waya vahoolo momunepani. Nave hiyo pooti waakhaliherya ohiilikanyiha ni atthu akina. Mwaha ola, ninrowa wiixutta moota anamuyari akhanle aya oowaakhaliherya anaaya, moota anamathelana akhanle aya ookhaliheryana mukina ni mukhwaawe ni moota axitokweene akhanle aya oowaakhaliherya anna ni arokora mmulokoni ohakalala mwaha wa okela waya vahoolo momunepani. Wanikisa, ninrowa othokorerya malakiheryo a mBiibiliyani anrowa onikhaliherya okhalana soolukama ninwerya ahu ophwanya moovarihana ni makhalelo ahu.

5. Moovarihana ni aEefeso 6:4, anamuyari ahaana ohipaka exeeni?

⁵ Anamuyari, ahaana okhalana ephoole wira ahaalikanyiheke anaaya ni anamwane akina ni ahaavekeleke opaka itthu ahiniwerya aya. Maana eyo pooti okumiherya mixankiho. Mwaana owo pooti onyoonyiheya vanceene. (Mmusome aEefeso 6:4.) Murokora oniitthaniwa Sachiko * onihimya so: “Maprusoore aka yaaphavela wira kikhale naxikola oolokexa waavikana anaxikola akhwaaka. Nave maama aka, aaphavela wira kikhumeleke saana oxikola wira kaavahe onamoona maprusoore aka ni paapa aka ohikhanle Namoona a Yehova. Ohimya ekeekhai, awo yaaphavela wira okathi wa iprova kimphanyeke 20, etthu yeeyo koona aka wira khiyaaweryaneya. Nnaamwi sivinre ene iyaakha sinceene okhuma vaavale miyo kimalinhe aka oxikola, mpakha olelo-va miyo kinniikoha akhala wira konvarela Yehova muteko wooloka”.

6. Esalimo 131:1, 2, eniwiixuttiha exeeni anamuyari?

⁶ Esalimo 131:1, 2 (Musome), enniwiixuttiha etthu anamuyari? Mwene Davidi ohimmye wira murima awe ‘khaphavela itthu sulupale’, seiyo ahaawerya awe ophwanya. Mwaha wa  wiiyeviha ni wiisuumaaliha, Davidi ‘ahimaliha ni witthyaliha murima awe’. Moolumo ala a Mwene Davidi aniwiixuttiha exeeni anamuyari? Anamuyari ahaana wiiyeviha ni wiisumaaliha. Ohiya paahi ele akhanle aya oopaka, masi-tho ele anlipelela aya wira anaaya apakeke. Musuweleke wira sookhala itthu aniinyu anwerya aya ni ahinwerya aya opaka ni mwaakhaliheryeke okhalana soolukama anrowa aya owerya ophwanya. Akhala wira munoopaka eyo, aniinyu animoonaka wira aakhalana efaita yinceene. Murokora oniitthaniwa Marina, onihimya so: “Maama aka, khaakilikanyiha ni axirokoraka. Okathi wotheene aanikileela wira khula mutthu ookhalana mikhalelo sawe ni Yehova onninvaha efaita yinceene khula mutthu. Kinnimuxukhurela vanceene maama aka, maana ookikhaliherya ohiilikanyiha ni atthu akina”.

7-8. Mulopwana oothela, onrowa wooniherya sai wira onnimuttittimiha mwaarawe?

⁷ Mulopwana muKristau oothela, ohaana omuttittimiha mwaarawe. (1 Ped. 3:7) Ottittimiha, onihela muhina onvaha efaita mutthu ni omulemeliha. Mwa ntakiheryo, mulopwana oothela, onnimuttittimiha mwaarawe vaavo oninvaha awe efaita yinceene. Owo khoninvekela mwaarawe opaka itthu ohinwerya awe. Nave khonimulikanyiha ni athiyana akina. Muthiyana ootheliwa, onrowa woonela sai akhala wira iyawe onimakela omulikanyiha ni athiyana akina? Nkahaya nwehe ntakiheryo na Rosa. Iyawe yoowo ohikhanle Namoona a Yehova aamakela omulikanyiha ni athiyana akina. Eyo yaahimukumiherya mixankiho sinceene Rosa. Maana moolumo ooveeha a iyawe, yaahimwiiriha wuupuwelaka wira khuuvo mutthu onimphenta. Rosa onihimya so: “Okathi wotheene kihaana wuupuxeriwa wira Yehova onnikivaha efaita ni onnikiphenta vanceene”. Tivonto, mulopwana muKristau oothela ohaana omuttittimiha vanceene mwaarawe. Nave mulopwana owo, ohaana osuwela wira enamuna onimuthokorerya awe mwaarawe pooti okhaliherya waataana wawe yena ni waataana wa mwaarawe ni Yehova. *

⁸ Mulopwana onimuttittimiha mwaarawe, okathi wotheene onnimulavula saana ohoolo wa atthu akina. Nave onnimuleela mwaarawe wira onimphenta ni onnimuttottopela. (Mir. 31:28) Eyo ti etthu aapaka awe iyawe Katerina, yoowo nimulavunle ahu mwaha ovinre. Eyo yaahimukhaliherya vanceene Katerina oxintta moonelo awe woohiloka. Okathi aari awe mwaana, Katerina aamakela olavuliwa moohiloka ni maama awe ni aamakela omulikanyiha ni anamwane akina waahela muhina apatthani awe Katerina. Mwaha waaivaavo, Katerina aaniikanyiha ni atthu akina wira owehe akhala wira ookhalana efaita. Aanipaka eyo hata nuumala okhala Namoona a Yehova! Iyawe Katerina oomukhaliherya ohiya wiilikanyiha ni atthu akina ni okhalana moonelo wooloka. Katerina onihimya so: “Iyaka onnikiphenta, onniikittottopela mwaha wa itthu sooloka kinipaka aka ni onnikivekelela. Nave onnikuupuxerya mikhalelo sooloka sa Yehova ni onnikikhaliherya oxintta moonelo aka woohiloka”.

9-10. Axitokweene yaamukhalihenrye sai murokora ohiya wiilikanyiha ni atthu akina?

⁹ Axitokweene anrowa waakhaliherya sai anna ni arokora aniilikanyiha ni atthu akina? Nwehe yowiiraneya ya murokora oniihaniwa Hanuni. Okathi aari awe mwaana khaattottopeliwa. Owo onihimya so: “Miyo kaari mwaana oowuuliwa muru ni kuupuwela wira anamwane akina yaari oolokexa okivikana miyo. Ohimya ekeekhai, okhuma enamwane aka, kinimakela wiilikanyiha ni atthu akina”. Hata nuumala okhala Namoona a Yehova, Hanuni khohiyale wiilikanyiha ni atthu akina. Mwaha wa yeeyo, owo uupuwela wira khorina  efaita mmulokoni. Masi olelo-va, owo pioneera oohakalala. Etthu xeeni yaamukhalihenrye Hanuni oturuka moonelo awe?

¹⁰ Hanuni ohimmye wira aahikhaliheriwa vanceene ni axitokweene oophenta. Awo yaamakela omuleela wira ookhalana efaita yinceene mmulokoni ni yaanimuttottopela mwaha wa ntakiheryo nooloka aavaha awe atthu akina. Hanuni olempe so: “Ikwaha sikina, axitokweene yaanikivekela waalipiha arokora akina yaawo yaareerela okhaliheriwa. Miteko iyo yaakivaha aya, saanikikhaliherya woona wira kookhalana efaita. Kinnuupuwela okathi axitokweene yaakixukhurenle aya mwaha wowaalipiha arokora aximwali. Awo yaahisoma yoolepa ya 1 aTesaloonika 1:2, 3. Moolumo aya yaahikivara murima vanceene! Amakampusi ale oophenta, aakikhaliherya ovaha efaita yinceene muteko kirina aka mmutthenkesoni mwa Yehova”.

11. Ninrowa waalipiha sai “atthu òpuheria ni òwìyeviha” anilavuliwa Yesaya 57:15?

¹¹ Mmusome Yesaya 57:15. Yehova onnaavaha efaita yinceene “atthu òpuheriwa ni òwìyeviha”. Otheene ahu, ohiya paahi axitokweene, nihaana waalipiha anna ni arokora a mmulokoni. Enamuna emosa nikhanle ahu oopaka eyo, ori owooniherya wira ninnaavaha efaita. Yehova oniphavela wira naakhaliheryeke anna ni arokora woona wira onnaaphenta ni onnaavaha efaita yinceene. (Mir.  19:17) Ohiya-vo, akhala wira nnimwiiyeviha ni nnimwiisuumaliha, nnimwaakhaliherya vanceene anna ni arokora. Nihikhala-khale niphavelaka wiivuwiha. Maana eyo pooti owiiriha atthu akina okhalana nrima. Ohiya-vo, nihaana orumeela itthu ninsuwela ahu wira naalipihe atthu akina.—1 Ped. 4:10, 11.

12. Xeeni atthu yahaavahiwa efaita yaasiveliwa aya okhala ni Yesu? (Nwehe elatarato ya ekaapa.)

¹² Enamuna Yesu aathokorerya awe atthareli awe, enooniixuttiha etthu yuulupale ya moota nikhanle ahu oowaathokorerya atthu akina. Owo aari mutthu muulupalexa aakhanle valaponi. Hata vari siiso, Yesu aari “mutthu oomaala ni oowiiyeviha”. (Math. 11:28-30) Nnaamwi aarina ankhili ni aasuwela itthu sinceene, owo khaamakela wiikukumiha. Ohiya-vo, owo aaniwiixuttiha atthu orumeelaka moolumo ookhweya wiiwa ni aanirumeela malikanyiho yaavara murima atthu oowiiyeviha. (Luka 10:21) Ahooleli a itiini a okathi wa Yesu yaari oowiixinnuwiha, nave yaaniwiiriha atthu wuupuwelaka wira khiyaarina efaita vamaithoni va Muluku. Masi Yesu khaapaka eyo. (Yoh. 6:37) Owo aanaattittimiha vanceene atthu yahaavahiwa efaita.

13. Enamuna Yesu aathokorerya awe awiixutti awe, enooniherya sai wira tooreera murima ni toophenta?

¹³ Oreera murima ni ophenta wa Yesu waanooneya ni moota aathokorerya awe awiixutti awe. Owo aanisuwela wira khula mmosa ookhalana mikhalelo ni itthu onisuwela awe. Nto khahiyo wira otheene aya yanwerya ovara saana miteko aavaha awe wala ovara mwa enamuna emosaru muteko woolaleerya. Hata vari siiso, Yesu aanivaha efaita yinceene wiimananiha wa khula mutthu. Nlikanyiho aapanke awe na italento, ninnooniherya oratteene wira Yesu onnoona othunku. Nlikanyiho nne, mulopwana ole aahinvaha khula murumeyi awe muteko ‘aawerya awe’. Murumeyi mmosa aahivara muteko munceene ni aahiphwanya musurukhu munceene. Masi hata vaari siiso, mulopwana ole aahaattottopela oowanli aya mwa enamuna emosaru oriki: “Muhiira saana, murumeyi ooloka ni oororomeleya!”—Math. 25:14-23.

14. Ninrowa otakiha sai enamuna Yesu aathokorerya awe atthu akina?

¹⁴ Yesu oninthokorerya mooreera murima ni moophenta. Owo onniweha itthu ninsuwela ahu ni mikhalelo sahu. Nave onnihakalala vaavo onniweha awe niimananihaka ovara muteko. Otheene ahu, nihaana omutakiha Yesu. Pooti wira anna ni arokora akina, khaniwerya ovara muteko munceene ntoko akina. Masi hata vari siiso, nihikhala-khale niwiirihaka anna awo wuuliwa muru wala wuupuwelaka wira kharina efaita mwaha wa itthu ahinwerya aya opaka. Ohiya-vo,  nihaana waattottopela mwaha wa itthu sotheene anipaka aya mmutthenkesoni mwa Yehova.

15-16. Murokora mmosa aattottenle sai mureerelo okhalana soolukama oniwerya awe ophwanya?

¹⁵ Okhalana soolukama sa omunepani onnikhaliherya vanceene okumi ahu. Masi etthu ninreerela ahu opaka, ori okhalana soolukama sinivarihana ni makhalelo ahu ni itthu ninsuwela ahu, ohiya okhalana soolukama sinivarihana ni makhalelo a atthu akina. Akhala wira nnookhalana soolukama nihinwerya ahu ophwanya, hiyo pooti onyoonyiheya ni okhulumuwa. (Luka 14:28) Nwehe ntakiheryo na pioneera oniihaniwa Midori.

¹⁶ Okathi aari awe mwaana, Midori aamakela oramusiwa ni paapa awe yoowo ohikhanle Namoona a Yehova. Okathi wotheene, owo aamakela omulikanyiha ni anaxikola akhwaawe ni axirokora awe. Midori onihimya so: “Miyo koona wira nkirina efaita”. Masi vaavo Midori annuwa awe, owo aahipacerya woona wira okhalana efaita. Owo onihimya so: “Omusoma Biibiliya khula nihiku, wookikhaliherya okhalana murettele ni woona wira Yehova onnikiphenta vanceene”. Ohiya-vo, Midori, aahikhalana soolukama aawerya awe ophwanya ni aahinvekela Yehova wira omukhaliherye ophwanya soolukama sawe. Etthu xeeni yaakhumelenle? Midori onnihakalala vanceene mwaha wookela vahoolo mwa omunepani.

17. Ninrowa ‘ohihiya sai okhalihiwa musya ni ikuru sineettiha muupuwelo ahu’ ni exeeni enrowa okhumelela?

¹⁷ Onnivira okathi wira moonelo ni muupuwelo woohiloka ovire. Tivonto Yehova onihimya awe wira: “Muhihiyeke okhalihiwa musya ni ikuru sineettiha muupuwelo anyu”. (aEef. 4:23, 24) Wira mpake eyo, muhaana ovekela, omusoma Biibiliya ni wuupuwelela. Nto muhihiye opaka itthu iyo ni munvekeleke Yehova wira oovaheeni ikuru. Munepa woowaarya onimookhaliheryani osyaka oxinttana ni atthu akina. Nave, akhala wira nrima  ni wiixinnuwiha onnipacerya wunnuwa vamurimani vanyu, munvekeleke Yehova wira ookhaliheryeni omaliha mikhalelo iyo.

18. 2 Wahala 6:29, 30, onnimaaliha sai?

¹⁸ Mmusome 2 Wahala 6:29, 30. Yehova onnisuwela ele eri vamurimani vahu nave onnisuwela itthu ninwanana ahu ntoko munepa wa olumwenku, soophavela soohiloka ni ohimalela wahu. Masi vaavo Yehova onniweha awe niimananihaka vanceene wira nixintte mikhalelo iyo soohiloka, owo onnitepa oniphenta.

19. Nlikanyiho xeeni Yehova onirumeela awe wira onikhaliherye osuwela moota onniphenta awe?

¹⁹ Wira onikhaliherye wiiwexexa moota Yehova onnikhapelela awe, owo onniilikanyiha ni maama onimphenta mwanawe. (Yes. 49:15) Nkahaya nwehe ele yaamwiiranenle maama mmosa oniihaniwa Rachel. Owo olempe so: “Mwanaka Stephanie kimuyanre sihinatthi ophiyerya miyeeri. Ekwaha yoopacerya kanwenhe aka, owo aari mwaamukhaani ni khaareere otteettheya. Masi mweeri woopacerya oxipitaale ari awe mu enkupatoorani, niire so, maakina aniheliwa anamwane aniyariwa ahiphiyerinhe myeeri, mameetiko yaahikeemererya omuteexa. Okathi ole waahikikhaliherya okhalana waataana wooloka ni mwanaka. Olelo-va, Stephanie orina iyaakha 6 ni orina erutthu yaamukhaani kamulikanyiha ni anamwane akina arina iyaakha simosaru. Hata vari siiso, miyo kinniphenta vanceene mwaha woowi aahikhalana mixankiho sinceene. Tthiri owo onnincererya ohakalala waka!” Ti voohakalaliha osuwela wira Yehova onniniphenta vanceene ntoko maama ola, vaavo onniweha awe niimananihaka vanceene wira nimukokhoreleke ni murima wotheene!

20. Okhala wira mwa murumeyi a Yehova, itthu xeeni siniwiirihani ohakalala?

²⁰ Okhala wira munimukokhorela Yehova, nyuwo mookhalana efaita ni munniirela mpantta emusi awe ya olumwenku wotheene, yeeyo erina atthu oovirikana. Yehova ohoothanlani nyuwo, ohiya mwaha woowi mwa mutthu oolokexa waavikana atthu akina, masi ohoothanlani mwaha woowi ohoona wira mookhalana murima wooloka, mwa mutthu oowiiyeviha, munniphavela wiixuttihiwa ni opaka marukunuxo. (Esal. 25:9) Nto mukupaliki ni murima wotheene wira Yehova onnivaha efaita khula etthu munipaka anyu mmutthenkesoni mwawe. Ovilela ni ororomeleya wanyu, munnooniherya oratteene wira nyuwo mookhalana murima wooloka. (Luka 8:15) Nto mwiimananiheke ovara oratteene muteko wa Yehova. Mwiira siiso, nyuwo munookhalana mathowa ooloka anrowa owiirihani ‘otteeliwa murima [mmensinyu]’.