Eprofesia 6. Olaleiwa Ihapari Sooreera Olumwenku Wotheene

“Ihapari iya sooreera sa Omwene sinoolaleiwa elapo yotheene”.—MATHEYO 24:14.

● Vaiatea onikhala Ilha do Pacífico muttetthe wa oTuamotu. Nnaamwi muttetthe wa oTuamotu orina ene ikiloomo 802.900, atthu anikhala elapo ele ari 16.000. Nto Vaiatea ni atthu akina aattamanne awe yaahilaleeriwa ni Anamoona a Yehova. Mwaha wa xeeni? Mwaha woowi Anamoona a Yehova aniphavela waalaleerya ihapari sooreera sa Omwene wa Muluku atthu otheene moohicikha elapo anikhala aya.

ITTHU SINCEENE SINOONIHERYA EXEENI? Ihapari sooreera sa Omwene sinniphiya mapuro ootheene a olumwenku. Mwaakha wa 2010, Anamoona a Yehova yaahiviriha iwoora ibilyau 1.6 alaleyaka ihapari sooreera ilapo 236. Eyo enooniherya wira khula Namoona aahiviriha minutu 30 olaleeryaka khula nihiku. Iyaakha 10 sivinre, Anamoona aapaka ni okawa iliivuru sinimutthokiherya Biibiliya sinivikana ibilyau 20.

ATTHU AKINA ANIHIMYA EXEENI? Okhuma khalai muhupi wa mBiibiliyani onnilaleiwa.

NIIREKE ITTHU IYO ANIHIMYA AYA TI SEKEEKHAI? Ekeekhai wira atthu akina aatoko olaleya muhupi wa mBiibiliyani. Masi muteko munceene woolaleerya ovariwe okathi vakhaani ni mittetthe saamukhaani. Moovirikana ni vo, Anamoona a Yehova annilaleerya olumwenku wotheene ni annaalaleerya atthu anceene. Awo khanihiya olaleerya hata akumanaka mixankiho ntoko olupatthiwa ni ikuvernu soowerya awo. * (Marko 13:13) Nave Anamoona a Yehova khanliviwa musurukhu mwaha wa olaleerya. Awo annirumeela okathi aya ni annikawa mahala iliivuru sinceene. Muteko owo wotheene onikhaliheriwa ni soovaha soohikhanyereriwa.

NYUWO MUNOONELA SAI? Niireke “ihapari sooreera sa Omwene” sinnilaleiwa olumwenku wotheene? Niireke wiiraneya wa eprofesia ela enooniherya wira sinookhumelela itthu sooloka muhoolo?

[Enoota]

[Eponto yuulupale epaaxina 9]

Hiyo khaninrowa ohiya oluttuweliwa waalaleerya atthu ihapari sooreera sa Omwene mpakha ophiya okathi Yehova onrowa awe ohimya wira muteko woolaleerya woomala”.—ANUÁRIO DAS TESTEMUNHAS DE JEOVÁ DE 2010.