1 aKorinto 12:1-31
12 Axinnaka, kiniphavela wira musuwele saana itthu Muluku onnivaha awe.
2 Nyuwo munnisuwela wira okathi mwahaamini anyu,* mwaanaatthara amuluku eethiru ahinlavula, mwaanirowa khula opuro yooroihaayani.
3 Kiniphavela musuwele wira khuuvo mutthu onilavula okhaliheriwaka ni ikuru sa Muluku, onahimya wira: “Yesu tootakhaliwa!” Nave khuuvo oniwerya ohimya wira: “Yesu ti Pwiya!” ohikhaliheriwaka ni ikuru soowaarya.
4 Sookhala soovaha soovirikana, masi itthu iyo sinivahiwa ni ikuru soowaarya simosa-ru.
5 Sookhala miteko soovirikana, masi Pwiya ori mmosa-ru.
6 Nave-tho, sookhala miteko soovirikana, masi Muluku oniwiiriha atthu otheene ovara miteko iyo, ori mmosa-ru.
7 Moota ikuru soowaarya sinimukhaliherya aya khula mmosa wira aaphwanyihe mureerelo akhwaawe, onnooneya oratteene.
8 Ikuru soowaarya sinnimukhaliherya mutthu mmosa olavula ni ankhili, nave ikuru seiyo simosa-ru, sinnimwiiriha mutthu mukina olavula ooniheryaka osuwela.
9 Ikuru simosa-ru seiyo, sinnimukhaliherya mutthu waamini, nave sinnimukhaliherya mutthu mukina owerya waapenuxa aretta.
10 Ikuru simosa-ru, sinnimukhaliherya mutthu opaka miiriirya, nave sinnimukhaliherya mukina olaleya moolumo a Muluku, ni sinnimukhaliherya mukina osuwela akhala wira moolumo awo anikhuma wa Muluku aahiiso nnaari. Nto mukina sinnimukhaliherya olavula mattaava oovirikana, nave-tho mukina, sinnimukhaliherya otaphulela mattaava oovirikana.
11 Miteko iya sotheene sinivariwa ni ikuru simosa-ru, simwiirihaka khula mutthu opaka itthu ntoko Muluku oniphavela awe.
12 Erutthu yookhalana ipantte sinceene. Hata vari siiso, eyo eri emosa paahi. Nave, Kristu ori siiso.
13 Otheene ahu, ayuda wala akereku, ipottha aahiiso atthu ootaphuwa, nipatisiwe ni ikuru simosa-ru, wira nikhale erutthu emosa-ru. Nave otheene ahu nihaakhela ikuru iyo.
14 Mweekeekhai, erutthu kherina epantte emosa paahi, masi yookhalana ipantte sinceene.
15 Hata nnawu nihimyaka wira: “Okhala wira miyo nkihiyo ntata, weeso nkiniirela mpantta erutthu”, nlelo ninniirela mpantta erutthu.
16 Hata niyaru nihimyaka wira: “Okhala wira miyo nkihiyo niitho, weeso nkiniirela mpantta erutthu”, nlelo ninniirela mpantta erutthu.
17 Vaakhanle wira erutthu yotheene yaari niitho, naarowa wiiwaka sai? Nave vaakhanle wira erutthu yotheene yaari niyaru, naarowa woonaka sai wunkhela?*
18 Vano Muluku oohela khula epantte ya erutthu opuro aya, ntoko ophavenle awe.
19 Vaakhanle wira ipantte sotheene sa erutthu sinoolikana, nto erutthu yaarowa okhala sai?
20 Ipantta sa erutthu khasireere, masi erutthu eri emosa.
21 Niitho khanikhanle oohimeerya ntata wira: “Miyo nkinoophavelani”. Aahiiso, muru khokhanle oohimeerya inawu wira: “Miyo nkinoophavelani”.
22 Masi, ipantte sa erutthu nnoona ahu ohikhalana efaita yuulupale, iyo sookhalana efaita.
23 Ipantte sa erutthu nnoona ahu ohireerexa, ninnikhuneela saana. Nave, ipantte sa erutthu ahu seiyo sinnuuliha muru, ninnitepa oreeriha.
24 Masi ipantta sa erutthu ahu sooreera, khasimphavela oreerihiwa. Muluku oopaka erutthu siiso, tivo, onnitepa ottittimiha ipantte sa erutthu sihireeranxe,
25 wira ohikhale okawanyeya mweerutthuni, masi ipantta saya sithokoreryaneke.
26 Siiso, epantta emosa ya erutthu yaahaawaka, ipantta sotheene sinnihaawa ni yeeyo. Nave, epantta emosa ya erutthu yaattittimihiwaka, ipantta sotheene sinnitteeliwa murima ni yeeyo.
27 Vano, nyuwo mwa erutthu ya Kristu, nto khula mmosa a nyuwo ori epantta ya erutthu eyo.
28 Muluku ohaathanla atthu mmulokoni, khunvaha khula mutthu muteko awe: oopacerya arummwa, a nenli maprofeta, a neeraru alipa-oowiixuttiha, nuumala-vo, ale anivara miteko sootikiniha, ale arina owerya woowaapenuxa aretta, ale anaakhaliherya akhwaaya, ale arina owerya wa ohoolela, ni ale anilavula mattaava oovirikana.
29 Niireke otheene aya arummwa? Niireke otheene aya maprofeta? Niireke otheene aya alipa-oowiixuttiha? Niireke otheene aya annivara miteko sootikiniha?
30 Niireke otheene aya aavahiwa owerya woowaapenuxa aretta? Niireke otheene aya annilavula mattaava oovirikana? Niireke otheene aya annitaphulela?
31 Masi, mphaveleke ni nthiti waakhela soovaha suulupale. Nave, kinoowooniheryani etthu yootepa oreera ovikana itthu sikina.
