1 aKorinto 16:1-24
16 Nilavulaka sa musurukhu munrowa anyu waavaha ale oororomeleya,* pooti otthara malakiheryo kivanhe aka miloko sa oGalasia.
2 Nihiku noopacerya na khula esumana,* khula mutthu ohaana osuka musurukhu oniwerya awe, wira kaphiya vale, ohivekiweke musurukhu.
3 Kaphiya ori anyu, kinimwaaruma akina oYerusalemu, wira aroihe musurukhu nvanhe anyu ni murima wotheene. Kinrowa waaruma alopwana yaale mulempe anyu wira munnaaroromela.
4 Masi, vakhala wira vanooreerela miyo orowa naawo, weeso nnoorowaka hoothe.
5 Kinimoorwa weiwo, kiviraka oMasedonia, okhala wira kinuupuwela ovira oMasedonia.
6 Woonasa wene, kinookhala ni nyuwo okathi vakhaani. Eyo yiiraneya, kinoona wira kinookhala ni nyuwo mpakha ovira eyiita, wira mukihoole vakhaani mukwaha kinrowa aka weetta.
7 Miyo nkiniphavela woowehani kiviraka paahi, okhala wira Yehova eemererya, kinnilipelela oviriha okathi vakhaani ni nyuwo.
8 Masi kinookhala wEefeso wenno mpakha ovira Efesta ya Pentekoositi,
9 okhala wira koovahiwa eparakha yuulupale* wira kivare muteko aka, masi khareere atthu anikivaanyiha.
10 Vano, Timootheyo aphiya vale, mmukhaliherye wira ohixanke, maana onivara muteko wa Yehova, ntoko miyo.
11 Tivonto, ohikhale onimuyeveiha.* Mmuhoole ni murettele, wira orwe ori aka, maana miyo ni axinna ninnimulipelela.
12 Vano, miyo koomutumererya vanceene munnihu Apolo, wira orwe ni axinna opuro ori anyu. Owo oolakela ohirwa iwo niinaano. Masi onimoorwa okathi wooreerela.
13 Mukhaleke oowehaweha, mulipiheryeke waamini wanyu, mukhaleke oolipa murima, mwiilipiheke.
14 Khula etthu munivara anyu, nvareke ni ophenta.
15 Nyuwo moosuwela wira atthu a etthoko ya Siteefano, tapacenrye okhala awiixutti wAkhaya, ni yaahiivahererya waarumeela ale oororomeleya.* Siiso, axinnaka, kiniphavela wootumereryani wira:
16 Ni nyuwo-tho, nwiiweleleke voohinlaseya atthu ari ntoko a etthoko ya Siteefano.
17 Masi kinnitteeliwa murima vanceene ni orwa wa Siteefano, Fortunato ni Akaiko, okhala wira awo aakikhaliherya vanceene okathi mwahaakhanle anyu.
18 Awo aakilipiha miyo ni ahoolipihani nyuwo. Tivo, mwaattittimiheke atthu ntoko awo.
19 Miloko sa wAsia sinnookhomasani. Aakila ni Priska, vamosa ni muloko onithukumana owannyeya, annookhomasani ni murima wotheene, nyuwo awiixutti a Apwiya.
20 Axinna otheene annookhomasani. Mukohaneke ihaali, nvahanaka epeexo.*
21 Ti miyo Paulo kinookhomasani. Kinlepa ni ntata naka.
22 Akhala mutthu ohinaaphenta Apwiya, otakhalihiwe. Pwiya ahu, xontte murwe!
23 Oreera murima wuulupale wa Pwiya Yesu Kristu, okhale ni nyuwo.
24 Ophenta waka okhale ni nyuwo otheene mwa Kristu Yesu.
Inoota
^ Ekereku, “ale oowaarya”.
^ Nwehe enoota ya Matheyo 28:1.
^ Ekereku, “koohuleliwa mukhora muulupale”.
^ Aahiiso, “onimuthanya; onimuramusa”.
^ Ekereku, “ale oowaarya”.
^ Makristau yaanikohana ihaali avahanaka epeexo okathi yaakumana aya.
