1 aKorinto 3:1-23
3 Tivo, axinnaka, nkaalavunle ni nyuwo ntoko atthu aneettihiwa ni munepa wa Muluku, masi kaalavunle ntoko atthu aniphavela itthu sa olumwenku,* ni ahiniiwexexa oratteene ephiro ya ekristau.
2 Miyo kihoovahani nipele, ohiya yoolya yoolipa, maana nyuwo khimwaalimpe. Tthiri, mpakha-va nyuwo khamulimpe,
3 okhala wira nlelo muniphavela itthu sa olumwenku. Nyuwo munnikhalelana nrima ni munniwana-wana. Nto niireke wira khamuhiyo atthu aniphavela itthu sa olumwenku,* ni aneetta ntoko atthu a moolumwenkuni?
4 Okathi mutthu onihimya awe wira: “Miyo kinimutthara Paulo”, masi mukina onahimya wira: “Miyo kinimutthara Apolo”, niireke khamunlikana ni atthu a moolumwenkuni?
5 Vano, Apolo ti pani? Nave, Paulo ti pani? Hiyo na arumeyi paahi, ninvara muteko Pwiya onivanhe awe. Ti yaawo yookhalihenryeni okhala awiixutti a Yesu.
6 Miyo kaahaala, vano Apolo aahikhuwari, masi Muluku, aahiiriha wunnuwa.
7 Tivo, ole onaala ni ole onikhuwari, khahiyo etthu, masi Muluku, yoowo oniiriha wunnuwa, tori etthu.
8 Ole onaala ni ole onikhuwari, anivara vamosa.* Nto, khula mutthu onimwaakhela etthuvo awe enivarihana ni muteko awe.
9 Hiyo ninvara muteko vamosa ni Muluku. Nyuwo mwa ematta ya Muluku, yeeyo onilima awe. Nave, nyuwo mwa empa ya Muluku, yeeyo oniteka awe.
10 Okhala wira Muluku ookireerela murima vanceene, miyo kiri ntoko mulipa-ooteka ooratta.* Miyo koomuteka alisenso,* masi mutthu mukina toniteka vasulu va alisenso owo.* Siiso, khula mutthu ohaana oweha moota oniteka awe vasulu va alisenso owo.*
11 Khuuvo oniwerya ompaka alisenso mukina,* ohikhanle ole opakiwe, eyo piiyo, Yesu Kristu.
12 Nto akhala wira mutthu onniteka vasulu va alisenso* orumeeelaka eweero, eparatha, maluku oowaarya, ithaapwa, malaxi, aahiiso mitathi,
13 muteko wa khula mutthu onimooniheriwa naphiya nihiku naya. Mooro onimooniherya vakhala wira muteko owo waari wooloka aahiiso woohiloka.
14 Mooro waahipahe ele mutthu otenke awe vasulu va alisenso,* mutthu owo onimwaakhela etthuvo.
15 Vano, vakhala wira muteko owo onimoovya, mutthu owo onoopweteiwa. Masi mutthu owo onimoopowa. Hata vari siiso, onrowa okhalaka ntoko mutthu ooponwe vamooroni.
16 Nyuwo khamunisuwela wira mwa etemplo ya Muluku, ni wira munepa wa Muluku onikhala mwa nyuwo?
17 Akhala mutthu onipwexakasa etemplo ya Muluku, nto Muluku onompwetexa mutthu owo, okhala wira etemplo ya Muluku ti yoowaarya, nave etemplo eyo ti nyuwo.
18 Muhiiwoke: Akhala mutthu eriyari anyu onuupuwela wira musuweli a olumwenku ola,* ohaana wiikhaliha mulolo, wira okhale musuweli.
19 Tthiri, ankhili a olumwenku ola, khahiyo etthu vamaithoni va Muluku, maana voolempwa wira: “Owo onniwiiriha asuweli omorela vamuraakhoni vaya”.
20 Nave, voolempwa wira: “Yehova onnisuwela wira miyuupuwelo sa asuweli ti seethiru”.
21 Siiso, muhiittottopeke mwaha wa ele apinaatamu anipaka aya, okhala wira itthu sotheene ti sawinyu,
22 kikhale miyo aahiiso Apolo, wala Keefa* aahiiso olumwenku, wala okumi aahiiso okhwa, hata itthu sikhanle vano wala itthu sinrowa okhumelela muhoolo, itthu sotheene ti sawinyu.
23 Vano, nyuwo mwa atthu a Kristu, nave Kristu ta Muluku.
Inoota
^ Ekereku, “atthu a weerutthuni”.
^ Ekereku, “atthu a weerutthuni”.
^ Aahiiso, “arina yoolakela emosa-ru”.
^ Aahiiso, “mutthu onihoolela saana miteko”.
^ Aahiiso, “kooteka mathipelo”.
^ Aahiiso, “mathipelo awo”.
^ Aahiiso, “mathipelo awo”.
^ Aahiiso, “opaka mathipelo makina”.
^ Aahiiso, “mathipelo”.
^ Aahiiso, “mathipelo”.
^ Aahiiso, “okathi”. Nwehe Moolumo Ootthokiheriwa.
^ Yoowo-tho oniihaniwa Pedru.
