1 aKorinto 5:1-13
5 Kihiiwa wira ookhala eriyari anyu mulopwana mmosa onikhala ni* mwaara a paapa awe. Orupihana woohiloka* moota owo, ti wootepa otakhala ovikana ole onipaka aya ale ahinaamini.
2 Nyuwo mwaahaana wiikhupanyerya ni omoomola mmulokoni mutthu opanke etthu eyo yoohiloka, ohiya wiittottopaka.
3 Nnaamwi kihikhanle weiwo, murima aka ori weiwo, nave miyo komphukela mulopwana owo opanke etthu eyo, kikhalaka ntoko kiri weiwo.
4 Okathi munithukumana anyu, muupuwelo aka vamosa ni owerya wa Pwiya ahu Yesu, ori ni nyuwo. Tivo, mwa nsina na Pwiya Yesu,
5 munvahererye mulopwana owo wa Satana, wira mukhalelo woohiloka oruuhale awe mmulokoni omale.* Siiso, muloko onookhalana moonelo wooloka wa etampi, nihiku na Apwiya.
6 Wiittottopa wanyu khahiyo wooloka. Khamunsuwela wira eferemento vakhaani enniiriha otthu wotheene wooweetheiwa* opuhuwa?
7 Mukumihe eferemento ya khalai, wira mukhale otthu* wooweetheiwa wa niinaano, okhala wira nyuwo khamurina eferemento, maana Kristu, yoowo ori paasikha ahu, oopakiwa mukuttho.
8 Tivo, nihirumeeleke eferemento ya khalai okathi onithukumana ahu nuumala paasikha. Nave nihirumeeleke eferemento enithoonyerya etampi ni otakhala. Masi nihaana okhuura paahi ephaawu ehirina eferemento, yeeyo enithoonyerya etthu yooreera ni yeekeekhai.
9 Kaahoolepelani epaphelo kihimyaka wira muhiye waataana ni atthu anirupihana voohiloka.*
10 Nkiniphavela ohimya wira nvalaaneke voomalela ni atthu a olumwenku ola, yaawo anirupihana voohiloka,* aahiiso ale ahiniphiyeriwa, wala alatarau, aahiiso ale anaakokhorela amuluku eethiru. Vaakhanle wira ti siiso, mwaahaana okhuma moolumwenkuni-mu.
11 Masi kinoolepelani wira, muhiye weetta ni khula mutthu onihimmwa okhala munna, yoowo onirupihana voohiloka,* aahiiso ohiniphiyeriwa, wala onaakokhorela amuluku eethiru, wala oniruwana, aahiiso namuhapaliwa, wala latarau. Nnakhala muhilyeeke ni mutthu owo.
12 Muteko aka khahiyo waaphukela ale ahikhanle mmulokoni. Nyuwo muhaana waaphukela ale ari mmulokoni,
13 nave Muluku onrowa waaphukela ale ahikhanle mmulokoni. “Mmukumihe mmulokoni mutthu owo onipaka itthu sootakhala”.
Inoota
^ Ekereku, “omukunxe”.
^ Ekereku, porneía. Nwehe Moolumo Ootthokiheriwa.
^ Ekereku, “wira erutthu epwetexiwe”.
^ Aahiiso, “ephepa yotheene yooweetheiwa”.
^ Aahiiso, “ephepa”.
^ Nwehe Moolumo Ootthokiheriwa ani: “Orupihana woohiloka”.
^ Nwehe Moolumo Ootthokiheriwa ani: “Orupihana woohiloka”.
^ Nwehe Moolumo Ootthokiheriwa ani: “Orupihana woohiloka”.
