1 aKorinto 6:1-20
6 Okathi munikhalana anyu mulattu ni mukhwiinyu, xeeni muniroiha anyu mulattu owo otripunaale wira waphukiwe ni atthu ahinitthara malamulo a Muluku, ohiya ophukiwa ni ale oororomeleya?*
2 Aahiiso, khamunsuwela wira ale oororomeleya* anrowa ophukela olumwenku? Nave akhala wira nyuwo munoophukela olumwenku, niireke khamunwerya ophuka myaha sootepa oyeva?
3 Khamunsuwela wira ninrowa ophukela malaikha? Nto akhala wira ti siiso, nnoowerya tthiri ophukela itthu siniiraneya valaponi.
4 Vano, akhala wira mookhalana milattu siisa wira siphukiwe, xeeni munaathanla anyu ale ahineemereriwa ni muloko wira yoophukeleni?
5 Kinilavula siiso wira muuliwe muru. Niireke khokhanle eriyari anyu mutthu orina ankhili wira aaphukeleke axinnawe?
6 Masi eniiraneya tiila: munna onnimuroiha munnawe otripunaale wira ophukeliwe ni atthu oohaamini!
7 Tthiri, etthu yoowuuliha muru omuroiha munninyu otripunaale. Xeeni muhinaavilela anyu anninyu yawiirelani etthu yoohiloka? Fataari waahiya akuxaka itthu sanyu.
8 Masi nyuwo munniwiirela itthu soohiloka ni munnikuxa itthu sa axinninyu!
9 Aahiiso, khamunsuwela wira atthu ootakhala murima khanrowa waakhela Omwene wa Muluku? Muhiwokiwe. Ale anrupihana voohiloka,* anaakokhorela amuluku eethiru, anamararuwa, alopwana anrupihana yaawo-ru,*
10 alatarau, atthu ahiniphiyeriwa, anamuhapaliwa, alipa-ooruwana, ni ale anaawoka atthu wira akuxe mireerelo saya, khanaakhela Omwene wa Muluku.
11 Akina a nyuwo, khalai mwaari siiso. Masi moorapihiwa, mooreerihiwa, mookhalihiwa anaxariya ni nsina na Pwiya Yesu Kristu, ni ikuru sa Muluku ahu.
12 Miyo kinneemererya itthu sotheene, masi khahiyo wira itthu sotheene sinniphwanyiha mureerelo. Miyo kinneemererya itthu sotheene, masi nkinrowa weemererya weettihiwa ni khula etthu.
13 Yoolya epakeliwe napwiipwi,* vano napwiipwi* opakeliwe yoolya. Masi Muluku onoomaliha soopiili iyo. Erutthu khepakeliwe orupihana woohiloka,* masi epakeliwe waavarela muteko Apwiya; nave Apwiya tanikhaliherya erutthu eyo.
14 Muluku oomuhihimuxa Pwiya, nave onrowa onihihimuxa hiyo mookhwaani orumeelaka owerya wawe.
15 Khamunsuwela wira irutthu sanyu sihiiraana ni Kristu, khukhala emosa? Munuupuwela wira kinookuxa erutthu yeeyo yiiraanale ni Kristu wira kiiraanihe ni namararuwa? Nnaari, nkinikhala-khala!
16 Niireke khamunsuwela wira ole onirupa ni namararuwa onnikhala erutthu emosa nuuwo? Tthiri, Muluku onihimya wira: “Oowanli aya anrowa okhala erutthu emosa”.
17 Masi ole iiraanale ni Pwiya, ookhalana muupuwelo mmosa-ru orina awe Pwiya.
18 Mutthyawe orupihana woohiloka!* Khiivo etampi ekina enlikana ni ela. Ole onirupihana voohiloka onnihonona erutthu awe.
19 Niireke khamunsuwela wira erutthu anyu, ti etemplo ya ikuru soowaarya, siri mwa nyuwo, seiyo sinikhuma wa Muluku? Nyuwo mwa atthu a Muluku,
20 okhala wira Muluku ohoothumani ni etthu erina efaita yuulupale. Tivonto, murumeeleke erutthu anyu wira munvuwiheke Muluku.
Inoota
^ Ekereku, “ale oowaarya”.
^ Ekereku, “ale oowaarya”.
^ Nwehe Moolumo Ootthokiheriwa ani: “Orupihana woohiloka”.
^ Nttaava na ekereku ninnirumeela opuro ola, moolumo manli oovirikana. Moolumo awo, anaahimya alopwana aneemya orupihiwa ni alopwana akhwaaya aahiiso athiyana aneemya orupihiwa ni athiyana akhwaaya. Nave anaahimya-tho ale ori mukhalelo aya.
^ Aahiiso, “erukulu; niphu”.
^ Aahiiso, “erukulu; niphu”.
^ Ekereku, porneía. Nwehe Moolumo Ootthokiheriwa.
^ Ekereku, porneía. Nwehe Moolumo Ootthokiheriwa.
