Mamwene Oopacerya 5:1-18
5 Okathi mwene a oTiro, Hirami, aiwale awe wiira Salomoni aahithanliwa wiira okhale mwene nipuro na paapa awe, aahaaruma arumeyi awe orowa wa Salomoni, okhala wiira Hirami okathi wootheene aari mpatthani awe Davidi.
2 Nto Salomoni aahiruma oleeliwa Hirami wiira:
3 “Nyuwo moosuwela oratteene wiira paapa aka Davidi khaawenrye oteka empa erina nsina na Yehova, Muluku awe, okhala wiira atthu a ipantta sootheene yaaniwana ekhotto nuuwo, mpakha Yehova waapweha awanani awe vathi va inawu sawe.
4 Vano, Yehova Muluku aka ookivaha murettele* ipantta sootheene. Khuuvo mutthu onkivirikanya ni khiivo etthu yootakhala eniiraneya.
5 Nto kimphavela oteka empa enrowa okhalana nsina na Yehova Muluku aka, ntoko siisaale Yehova aamuleihenrye awe paapa aka Davidi oriki: ‘Mwaninyu yoowo kinrowa aka omukilaathiha veehiceni vanyu, tonrowa oteka empa erina nsina naka’.
6 Vano mwaarume atthu anyu wiira yiikitthe miri sa eseeturu sa oLiibano ekiruuhele. Arumeyi aka anrowa ovaraka muteko ni arumeyi anyu, nave miyo kinimwaaliva arumeyi anyu eperesu munrowa anyu okileela, maana nyuwo moosuwela wiira khuuvo a hiyo onsuwela wiikittha miri ntoko atthu a oSiidoni”.
7 Okathi Hirami aiwale awe moolumo a Salomoni, aahitteeliwa murima vanceene onahimya wiira: “Olelo ottottopeliwe Yehova, mwaha wa onvaha Davidi mwaana a miruku wiira aahooleleke atthu ala ahireere waatta!”
8 Hirami aahiruma oleeliwa Salomoni wiira: “Kihiiwa moolumo murumme anyu wiira kileeliwe. Kinoopaka ele muniphavela anyu, kooruuhelakani matera a eseeturu* ni matera a xuniiperu.
9 Arumeyi aka anoolovola miri iyo okhuma oLiibano mpakha mphareya. Nto miyo kinimweettiha miri iyo mphareya ntoko ekalawa mpakha opuro munrowa anyu okithoonyerya, weiwo kinootaphula miri iyo wiira nyuwo mukuxeke. Vano mpantta aka kiniphavela wiira mwaavaheke eyoolya atthu a etthoko aka”.
10 Siiso Hirami aahinvaha Salomoni matera ootheene a eseeturu ni a xuniiperu aaphavela awe.
11 Salomoni aahinvaha Hirami ikooro* 20.000 sa etiriku wiira olyeeke ni atthu a etthoko awe, ni ikooro 20 sa makhura ooreerexa a olivera. Iya ti itthu Salomoni anvaha awe Hirami khula mwaakha.
12 Yehova aahinvaha ankhili Salomoni ntoko aamuleihenrye awe. Nave Salomoni ni Hirami yaahikhalana murettele, ni oowanli aya yaahipaka nivarihano.
13 Mwene Salomoni aahaathukumanya alopwana 30.000 a wIsarayeli wootheene wiira avareke muteko wookhanyereriwa.
14 Owo aanaaruma orowa oLiibano ikrupu sa alopwana 10.000. Alopwana awo yaanikhala mweeri mmosa oLiibano, miyeeri miili owannyeya. Nave Adonirami taaweherya ale yaavarihiwa muteko wookhanyereriwa.
15 Salomoni aahikhalana anamuteko* 70.000, ni anamuteko 80.000 yaapwexa ni olokiherya maluku va mwaako.
16 Nave-tho Salomoni aahikhalana makhulupale 3.300, yaawo yaari ntoko makapataaxi yaaweherya anamuteko.
17 Arummwaka ni mwene, awo yaahikumiha maluku maalupale a musurukhu munceene, wiira apaceriwe aliserse a empa ni maluku oopwexiwa ni oolokiheriwa.
18 Vano alipa-ooteka a Salomoni ni alipa-ooteka a Hirami, vamosa ni atthu a oXebali, yaahipwexa maluku ni yaahilokiherya matera ni maluku wiira etekiwe empa.
Inoota
^ Eheeberi, “omumula”.
^ Miri iya sinlikana ni mwiri oniihaniwa pinyeiro, seiyo sinaattela wunnuwa oLiibano.
^ Ekooro emosa yaakhala iliituru 220. Munwehe Apendise B14.
^ Aahiiso, “Anaphwaatti”.
