Mamwene Oopacerya 8:1-66
8 Okathi ole, Salomoni aahaathukumanya axitokweene a Isarayeli, ahooleli a mahimo ootheene, ni makhulupale a atthu a etthoko ya Isarayeli. Awo yaahirowa wa mwene Salomoni, oYerusalemu, wiira yaathaamihe nivuku na nivarihano na Yehova epooma ya Davidi, eyo piiyo, oSiyoni.
2 Alopwana ootheene a Isarayeli yaahithukumana ohoolo wa mwene Salomoni okathi wa efesta* ya mweeri wa Etanimi,* eyo piiyo, mweeri wa neethanu nenli.
3 Nto axitokweene ootheene a Isarayeli yaahirwa, nave anamukuttho yaahiteexa nivuku na nivarihano.
4 Awo yaahiteexa nivuku na nivarihano na Yehova, etenta ya muthukumano, ni itthu sootheene soowaarya saari mutentani-mmo. Anamukuttho ni alevi ti yaateexale itthu iyo.
5 Mwene Salomoni ni muloko wootheene wa atthu a Isarayeli, yaawo yaitthaniwe wiira athukumane nuuwo, yaari ohoolo wa nivuku na nivarihano. Saanivahiwa mikuttho sa ipwittipwitthi ni ipooyi sinceene, seiyo sahaaweryaneya okontariwa nnakhala osuweliwa mwaattelo aya.
6 Moottharelana, anamukuttho yaahiroiha nivuku na nivarihano na Yehova opuro aya, esaala ya muhina ya empa, Nipuro Noowaaryexa, vathi va mapupha a makerubi.
7 Siiso, mapupha a makerubi yaahitapuruxeliwa opuro naari aya nivuku na nivarihano, wiira makerubi awo akhuneeleke nivuku na nivarihano ni ivarelelo saya.
8 Ivarelelo iyo saari soorakama, vaaweryaneya aya woona oponta waya Opuro Woowaarya, ohoolo wa esaala ya muhina, masi khivaaweryaneya woona ota. Iyo siri vaavo mpakha olelo-va.
9 Muhina mwa nivuku na nivarihano khiyaakhanle etthu ekina, ahikhanle paahi mapawe manli a maluku, yaawo Moise aapwenhe awe oHorebi, okathi Yehova aapanke awe nivarihano ni atthu a Isarayeli, akhumaka elapo ya wExiitu.
10 Okathi anamukuttho yaakhumme aya nipuro noowaarya, empa ya Yehova yaahisareya neeku.
11 Anamukuttho khiyaawerya-tho ovara miteko saya, mwaha wa neeku nle, okhala wiira ovuwa wa Yehova waahisareya empa ya Yehova.
12 Nto mwene Salomoni aahihimya wiira: “Yehova aahihimya wiira aarowa okhalaka vameekuni ooriipela.
13 Miyo koowerya wootekelani empa ela yoolokexa wiira mukhaleke, opuro munrowa anyu okhalaka mahiku ootheene”.
14 Moottharelana, mwene aahirukunuwa onaaweha atthu ootheene a nloko na Isarayeli onaareeliha, nlelo atthu ootheene a nloko na Isarayeli yeemenle ene ohoolo wawe.
15 Owo aahihimya wiira: “Ottottopeliwe Yehova Muluku a Isarayeli, yoowo aamuleihenrye paapa aka Davidi ni eyano awe, ni aamalihenrye itthu sootheene ni ntata nawe, oriki:
16 ‘Okhuma nihiku kaakuminhe aka atthu aka aisarayeli elapo ya wExiitu, nkaathanlale epooma eriyari ya mahimo ootheene a Isarayeli, wiira kitekeliwe empa erina nsina naka, yeeyo kaarowa aka okhalaka-mo, masi koomuthanla Davidi wiira aalamuleleke atthu aka aisarayeli’.
17 Paapa aka Davidi aaniphavela ni murima wootheene oteka empa erina nsina na Yehova, Muluku a atthu a Isarayeli.
18 Masi Yehova aahimuhimeerya paapa aka Davidi, wiira: ‘Nyuwo munniphavela ni murima anyu wootheene oteka empa erina nsina naka, nave munniira saana ophavela eyo ni murima anyu wootheene.
19 Hata vari siiso, nyuwo khamunrowa oteka empa eyo, masi mwaninyu mwaamulopwana munrowa anyu oyareliwa, tonrowa oteka empa erina nsina naka’.
20 Yehova oomaliherya etthu aaleihenrye awe, okhala wiira koomuranttela paapa aka Davidi ni kookilaathi veehiceni ya atthu a Isarayeli, ntoko Yehova aaleihenrye awe. Nave-tho kooteka empa erina nsina na Yehova, Muluku a Isarayeli,
21 ni koopweha weiwo nivuku na nivarihano, nenlo nirina nivarihano Yehova aapanke awe ni amuhavinre ahu, okathi aakuminhe awe elapo ya wExiitu”.
22 Moottharelana, Salomoni aaheemela ohoolo wa altaari a Yehova ni ohoolo wa nloko nootheene na atthu a Isarayeli, oteexerya matata awe osulu,
23 onahimya wiira: “Khoo Yehova Muluku a atthu a Isarayeli, khuuvo Muluku mukina wiirimu, hata vathi-va, onlikana ni nyuwo. Nyuwo munneettela nivarihano mpanke anyu, nave munniwooniherya ophenta woororomeleya arumeyi anyu aneetta ohoolo wanyu ni murima aya wootheene.
24 Nyuwo moomaleliha etthu mwaamuleihenrye anyu murumeyi anyu Davidi, paapa aka. Mwaahimuleiherya ni eyano anyu, nave olelo moomaleliha ni ntata nanyu.
25 Vano, khoo Yehova Muluku a Isarayeli, mmaliherye etthu mwaamuleihenrye anyu murumeyi anyu Davidi, paapa aka, okathi mwaamuhimenrye anyu wiira: ‘Okathi wootheene, osuulu anyu onrowa okilaathiki veehiceni va atthu a Isarayeli, vakhala wiira aniinyu animweettelaka iphiro saka, ntoko nyuwo mweettale anyu ohoolo waka’.
26 Nto, khoo Muluku a Isarayeli, xontte mmaliherye etthu mwaamuleihenrye anyu murumeyi anyu Davidi, paapa aka.
27 “Veekeekhai, niireke Muluku onookhala vathi-va? Hata wiirimu, niire so, wiirimu wootheene khamuniphiyerya okhala, vootepa empa ela kitenke aka!
28 Vano, khoo Yehova Muluku aka, mwiiwe nivekelo na murumeyi anyu ni etthu onivekela awe. Nave nwiriyane okhuwela wa murumeyi anyu onivekela okhaliheriwa, ni nivekelo onipaka awe ohoolo wanyu olelo.
29 Maitho anyu, aweheke empa ela othana ni ohiyu, opuro ola ohimyale anyu wiira: ‘Nsina naka ninrowa okhalaka weiwo’. Nwiriyane ovekela wa murumeyi anyu, okathi onirukunuwela awe otemplo ovekelaka.
30 Nwiriyane okathi murumeyi anyu onoovekelaaweni, ni etthu, atthu anyu aisarayeli anoovekelaayani, okathi anivekela aya awehaka opuro ola. Nave nwiriyane muri ene opuro munikhala anyu, wiirimu, nwiriyane ni munlevelele.
31 “Akhala mutthu onimutthekela mukhwaawe, onakhanyereriwa wiilaphela, nuumala olapha, onarowa weemela ohoolo wa altaari anyu otemplo,
32 nwiriyane wiirimu muri anyu, nave mpake etthu ni mwaaphukele arumeyi anyu: mmuhimye okhalana mulattu ole opanke etthu yootakhala, mwiirihaka etthu yootakhala opanke awe ommorela yena, nave mmuhimye ohikhalana mulattu ole ori naxariya, mmureelihaka moovarihana ni exariya awe.
33 “Okathi atthu anyu aisarayeli anrowa aya oweriwa ni nwanani aya mwaha wa othipelela wootthekelani, ni yatthika wiira avuwihe nsina nanyu, ni yavekela yooxonttelakani ari ene empa ela,
34 wiirimu ori anyu, mwaawiriyane ni mulevelele yoottheka ya atthu anyu aisarayeli, ni mwaattikiherye elapo mwaavanhe anyu amuhavinre aya.
35 “Erimu yawaleya ehinarupa epula, mwaha wa atthu anyu othipelelaka wootthekelani, nto anavekela awehaka opuro ola, avuwihaka nsina nanyu, ni anattharuwa yoottheka aya mwaha wa owiixuttiha wanyu okhala oowiiyeviha,
36 wiirimu ori anyu, mwaawiriyane ni mulevelele yoottheka ya arumeyi anyu, atthu anyu aisarayeli, ni nwiixuttihe ephiro yooloka ekhanle aya ootthara, ni murupihe epula mulaponi mwaavanhe anyu atthu anyu ntoko yoohiyeriwa.
37 “Yakhumelela etala mulaponi, aahiiso ekwerere, wala oviha vanceene, eretta enihaaxa miri, ni nasope munceene, aahiiso awanani aya yaarukurerya khula epooma ya elapo eyo, ni yakhumelela eretta ekina,
38 khula mutthu, aahiiso atthu anyu ootheene a Isarayeli, yavekela, yooxonttelakani avekelaka khula etthu, (okhala wiira khula mmosa onnisuwela mixankiho sawe) yateexerya matata aya osulu, awehaka empa ela,
39 wiirimu muri anyu, opuro munikhala anyu, nwiriyane, ni mwaalevelele, ni mpake etthu. Nave, mmutthuvele khula mmosa moovarihana ni iphiro sawe sootheene, okhala wiira nyuwo munnisuwela mirima saya, (nyuwo paahi, munnisuwela oratteene mirima sa atthu ootheene),
40 wiira awoovekeni mahiku ootheene anikhala aya elapo mwaavanhe anyu amuhavinre ahu.
41 Nave, mutthu onikhuma elapo ekina, ohiniirela mpantta atthu anyu aisarayeli, onirwa okhumaka elapo ya otteiwene mwaha wa nsina nanyu
42 (okhala wiira animwiiwa nsina nanyu nuulupale ni itthu soowerya mpanke anyu ni ntata nanyu), orwaaka ovekela owehaka empa ela,
43 munwiriyane muri ene wiirimu, opuro munikhala anyu, nave mpake ele namurwa oniveka awe wiira atthu a ilapo sootheene asuwele nsina nanyu ni awooveeni, ntoko aniira aya atthu a Isarayeli. Siiso, awo anoosuwela wiira nsina nanyu ninniromoliwa empa ela kitenke aka.
44 “Akhala wiira atthu anyu anoorowa owana ni awanani aya, attharaka ephiro nwoonihenrye anyu, nto anoovekelani nyuwo Yehova, awehaka epooma muthanlale anyu ni awehaka empa kitenke aka erina nsina nanyu,
45 mwiiwe ovekela waya ni etthu anivekela aya muri ene wiirimu, nave nwiirele exariya.
46 “Akhala wiira atthu awo animootthekelani (okhala wiira atthu ootheene annittheka), nyuwo munanariwa naawo ni mwaavahererya awanani aya, nto awanani awo yaakuxa ntoko ipottha yaaroiha elapo aya, okhale otteiwene aahiiso vakhiviru,
47 vano awo anuupuwela saana elapo aroihiwe aya ntoko ipottha, anootthikelani ni anooxonttelani elapo aroihiwe aya ntoko ipottha, ahimyaka wiira: ‘Hiyo nihootthekelani ni noopaka etthu yoohiloka. Noopaka itthu sootakhala’,
48 nto awo yootthikelani ni murima aya wootheene ni okumi aya wootheene elapo ya awanani aya aroihiwe aya ntoko ipottha, anoovekelani aweheka elapo mwaavanhe anyu amuhavinre aya, epooma muthanlale anyu, ni empa ela kootekenlyaakani erina nsina nanyu,
49 nwiriyane ovekela waya ni etthu anivekela aya, muri ene wiirimu, opuro munikhala anyu, nave nwiirele exariya
50 mwaalevelele atthu anyu yaawo yootthekenleni, mulevelele itampi saya sootheene awiirenlyaayani. Nyuwo munoowiiriha atthu awo yaavanre ntoko ipottha, owoonela othunku ni waamorela ikharari,
51 (okhala wiira awo atthu anyu ni yoohiyeriwa anyu, yaawo mwaakuminhe anyu elapo ya wExiitu, muhina mwa efornu yaahaniwa eyuuma).
52 Maitho anyu aweheke ovekela wa murumeyi anyu ni wa atthu anyu aisarayeli, nwiriyanaka okathi anoovekelaayani.
53 Khoo Pwiya Muulupalexa Yehova, nyuwo muhaavalaanya atthu anyu ntoko yoohiyeriwa eriyari ya atthu ootheene a valaponi, ntoko mwaamulenle anyu murumeyi anyu Moise okathi mwaakuminhe anyu amuhavinre ahu elapo ya wExiitu”.
54 Okathi Salomoni aamalinhe awe opaka nivekelo nla nootheene ni onvekela Yehova, aahivenya ohoolo wa altaari a Yehova, weiwo aakokhonre awe, oteexenrye ene matata awe osulu.
55 Nuumala-vo, owo aaheemela ni aahireeriha muloko wootheene wa atthu a Isarayeli ni nsu noowiiwanyeha, oriki:
56 “Ottottopeliwe Yehova, yoowo aavanhe opuro woomumula atthu awe aisarayeli, ntoko aaleihenrye awe. Khanivo nnakhala nuulumo nimosa nihiiraneyale. Tthiri itthu sootheene aamuleihenrye awe murumeyi awe Moise sihiiraneya.
57 Yehova Muluku ahu okhale ni hiyo, ntoko aari awe ni amuhavinre ahu. Ohininyanyale, nnakhala ohinihiye.
58 Owo iirihe mirima sahu otthikela wa yena, wiira ntthareke iphiro sawe, ni neetteleke sooruma sawe, ikano sawe ni malamulo awe, seiyo aarumme awe amuhavinre ahu weettela.
59 Moolumo aka ala kimuxonttenle aka Yehova, akhaleke vakhiviru va Yehova Muluku ahu, othana ni ohiyu, wiira omwiirele exariya murumeyi awe ni atthu awe aisarayeli, moovarihana ni etthu aniphavela aya khula nihiku.
60 Siiso atthu ootheene a mulaponi anoosuwela wiira Yehova ti Muluku eekeekhai. Khuuvo-tho mukina!
61 Vano, mwiivahererye wa Yehova Muluku ahu ni murima anyu wootheene, mweettelaka ikano sawe ni mwiiwelelaka sooruma sawe ntoko muniira anyu nihiku nla na olelo”.
62 Mwene ni atthu ootheene a Isarayeli yaari nuuwo, yaahivaha mikuttho sinceene ohoolo wa Yehova.
63 Salomoni aahinvaha Yehova mikuttho sa opatthani: Owo aahivaha ipooyi 22.000 ni ipwittipwitthi 120.000. Siiso, mwene ni atthu ootheene a Isarayeli yaahitthapela omalihiwa wa empa ya Yehova.
64 Nihiku nle, mwene aahaana oreeriha eriyari ya nivate naakhala ohoolo wa empa ya Yehova, okhala wiira aahivaha opuro ole mikuttho soopahiwa, soovaha sa ipyo, ekortuura ya mikuttho sa opatthani, maana altaari a ekoopiri, aakhala ohoolo wa Yehova, aari mwaamukhaani wahaaphiyerya aya mikuttho soopahiwa, soovaha sa ipyo ni ekortuura ya mikuttho sa opatthani.
65 Okathi ole, Salomoni aahipaka efesta ni atthu ootheene a Isarayeli, muloko muulupale waakhuma oLebo-Hamati mpakha muro mwaamukhaani a wExiitu. Awo yaahipaka efesta eyo ohoolo wa Yehova, Muluku ahu, yeeyo yaamalinhe mahiku 7 ni mahiku makina 7, otakaaherya mahiku ootheene yaari 14.
66 Mmeeloni mwaya,* Salomoni aahaamwarya atthu, nave atthu yaahimureeliha mwene ni yaahitthikela owannyeya atteeliwe ene murima ni ahakalanle ene mwaha wa itthu sootheene sooreera Yehova aamwiirenle awe Davidi ni atthu awe aisarayeli.
Inoota
^ Eyo piiyo, Efesta ya Maxaxa.
^ Munwehe Apendise B15.
^ Eheeberi, “nihiku na neethanu neeraru”, eyo piiyo, nuumala ekwaha ya nenli ya mahiku 7.
