Samuweli Oopacerya 22:1-23
22 Davidi aahikhuma opuro ole, otthyawela munikhukuni na wAdulami. Okathi axinnawe ni atthu ootheene a etthoko ya paapa awe yaiwale aya eyo, yaahirowa weiwo.
2 Atthu ootheene yaahaaxiwa, yaakomphe, ni yaixinliha yaahitakaahana ni Davidi, vano owo aahikhala xeefi aya. Atthu 400 yaahitakaahana nuuwo.
3 Muhoolo mwaya, Davidi aahikhuma opuro ole orowa oMisipa, oMowabi, onamuhimeerya mwene a oMowabi wiira: “Xontte, kinoovekelani wiira apaapa ni amaama akhaleke ni nyuwo mpakha miyo osuwela etthu Muluku onrowa awe okiirela.
4 Davidi aahimuhiya paapa awe ni maama awe ni mwene a oMowabi, nto awo yaahikhala nuuwo mahiku ootheene Davidi aatthyawenle awe weiwo.
5 Nuuvira okathi, profeta Gadi, aahimuhimeerya Davidi wiira: “Muhitthyawele vaava. Murowe elapo ya oYuda”. Nto Davidi aahirowa otakhwani wa oHerethi.
6 Sawuli aahiiwa wiira Davidi ni alopwana aarina awe yaahiphwanyiwa. Vano Sawuli aari oXibeya, vathi va mwiri oniihaniwa tamarikeira, opuro woottukhuwa okunxe ene nivaka mmatatani mwawe. Nave arumeyi awe ootheene yaahimurukurerya.
7 Moottharelana, Sawuli aahaahimeerya arumeyi awe yaamurukurenrye oriki: “Mukiwiriyane, koovara metto, nyuwo atthu a nihimo na Beniyamini. Niireke mwaana a Yese onimoovahani imatta ni imatta sa ewuuva ootheene anyu? Niireke onimoothanlani ootheene anyu ntoko maxeefi a atthu 1.000 ni maxeefi a atthu 100?
8 Ootheene anyu mookivirikanya! Khuuvo aakilenle okathi mwanaka aapanke awe nivarihano ni mwaana a Yese! Khuuvo a nyuwo aakireerenle murima ni okileela wiira mwanaka oomuruma murumeyi aka okivirikanya, ntoko oniira awe olelo-va”.
9 Moottharelana, Dowegi a wEdomi, yoowo aari weiwo vamosa ni arumeyi a Sawuli, aahaakhula wiira: “Kaahinweha mwaana a Yese orowaka oNobi, wAhimeleki, mwaana a Ahitubi.
10 Nave kaahinweha Ahimeleki onvekelaka Yehova wiira omphwanyihe mureerelo Davidi ni onvahaka yoolya. Nave-tho aahinvaha Davidi espaata* ya nfilisti, Goliyati”.
11 Mwene aahiruma wiihaniwa Ahimeleki, mwaana a namukuttho Ahitubi, ni anamukuttho ootheene a etthoko ya paapa awe, yaawo yaari oNobi. Vano ootheene aya yaahirowa wa mwene.
12 Vano Sawuli aahihimya wiira: “Nyuwo mwaana a Ahitubi, mukiwiriyane!” Nto owo aahaakhula wiira: “Miyo kiri-va, pwiyaka”.
13 Sawuli aahimuhimeerya wiira: “Xeeni muhalaka okirukunuwela, vamosa ni mwaana a Yese? Nyuwo monvaha iphaawu, espaata, ni monvekela Muluku wiira omphwanyihe mureerelo. Davidi ookivirikanya ni ookirukunuwela, ntoko siniiraawe mpakha olelo-va”.
14 Vano Ahimeleki aahimwaakhula mwene oriki: “Taani ori oororomeleya eriyari ya arumeyi anyu ntoko Davidi? Owo mutthepa a mwene, nave xeefi a makwarta anyu, ni onnittittimihiwa vatthokoni vanyu.
15 Kiireke ela ekwaha yoopacerya kinivekela aka Muluku wiira omphwanyihe mureerelo? Miyo nkimurukunuwenle mwene! Tivo, mwene ohuupuwele wiira murumeyi anyu ola, ni atthu ootheene a etthoko ya paapa awe aapaka etthu yootakhala, okhala wiira nkaasuwenle etthu nnakhala vakhaani”.
16 Masi mwene aahihimya wiira: “Veekeekhai, nyuwo Ahimeleki munimookhwa, vamosa ni atthu ootheene a etthoko ya paapa anyu”.
17 Vano mwene aahaahimeerya makwarta yeemele vaavale wiira: “Nwiive anamukuttho a Yehova, okhala wiira awo ari mpantta wa Davidi! Awo yaanisuwela wiira Davidi aamutthyawa, masi khiyaakilenle!” Arumeyi a mwene khiyaaphavenle waatuphela anamukuttho a Yehova.
18 Nto, mwene aahimuhimeerya Dowegi wiira: “Mwaatuphele anamukuttho!” Moowaakuveya, Dowegi a wEdomi aahivenya ni aahaatuphela anamukuttho. Nihiku nle, aahiiwiiva alopwana 85 yanwanre eefodi* a eliinyu.
19 Nave aahiwiiva ni espaata atthu a oNobi, epooma ya anamukuttho. Owo aahiwiiva ni espaata alopwana ni athiyana, amiravo ni anamwane, ipooyi, apuuru, ni ipwittipwitthi.
20 Nto, ooponwe paahi aari Abiyatari, mwaana a Ahimeleki, mwaana a Ahitubi. Owo aahitthyawa onamutthara Davidi.
21 Abiyatari aahimuleela Davidi wiira: “Sawuli oowiiva anamukuttho a Yehova”.
22 Vano Davidi aahimuhimeerya Abiyatari wiira: “Okathi kanwenhe aka Dowegi a wEdomi, nihiku nle, kaahisuwela wiira ammuleela Sawuli. Miyo kirina mulattu mwaha wa wiiviwa atthu otheene a etthoko ya paapa anyu.
23 Mukhaleke ni miyo. Muhoove, maana ole oniphavela owiivani, onniphavela-tho okiiva. Miyo kinaamookhapelelani”.
