Samuweli Oopacerya 5:1-12
5 Okathi afilisti yaakunxe aya nivuku na nivarihano na Muluku eekeekhai, yaahikumiha wEbenezeri aroiha wAxidodi.
2 Afilisti yaahikuxa nivuku na nivarihano na Muluku eekeekhai, aroiha mpaani* mwa muluku aya Dagoni, apweha vakhiviru va muluku owo Dagoni.
3 Okathi atthu a wAxidodi yaavennye aya mmeeloni mwaya voosiisu, yaahimphwanya muluku aya Dagoni omonre ene owehaka vathi, ohoolo wa nivuku na nivarihano na Yehova. Nto, yaahimukuxa muluku aya Dagoni amuttikiherya opuro awe.
4 Okathi yaavennye aya mmeeloni mwaya voosiisu, yaahimphwanya muluku aya Dagoni omonre ene owehaka vathi, ohoolo wa nivuku na nivarihano na Yehova. Vano muru wa muluku Dagoni ni matata awe oomanli, yaahiphwanyiwa vamukhora wa empa eyo siikitthiwe ene. Erutthu aya paahi yaalikana ni ehopa* ti yaahanle.
5 Tivo, mpakha olelo-va, wAxidodi anamukuttho a muluku Dagoni, ni atthu ootheene ankela mpaani mwa muluku Dagoni, khaninyakela vamukhora wa Dagoni.
6 Yehova aahaahukhumu atthu a wAxidodi, ni aahaakumiherya munamuluku* atthu a wAxidodi ni mittetthe saya.
7 Okathi atthu a wAxidodi yoonale aya ele yaakhumelenle, yaahihimya wiira: “Nivuku na nivarihano na Muluku a Isarayeli, nihikhale-tho ni hiyo, okhala wiira owo onninikumiherya mixankiho hiyo ni muluku ahu Dagoni”.
8 Nto, yaahiruma wiihaniwa ni othukumanyiwa anamalamulela ootheene a afilisti, anaakoha wiira: “Niirihe exeeni nivuku na nivarihano na Muluku a Isarayeli?” Awo yaahaakhula wiira: “Nikuxe nivuku na nivarihano na Muluku a Isarayeli, niroihe oGathi”. Vano yaahikuxa nivuku na nivarihano na Muluku a Isarayeli, aroiha weiwo.
9 Nuumala oroihiwa nivuku nlo, Yehova aahaahukhumu atthu a epooma ele, owiirihaka woova vanceene. Owo aahaahukhumu atthu a epooma ele, okhuma acikhaani mpakha aalupale, nto aahaakhuma munamuluku.
10 Vano, yaahiroiha nivuku na nivarihano na Muluku eekeekhai wEkironi. Masi nuumala opixa nivuku na nivarihano na Muluku eekeekhai wEkironi, atthu a wEkironi yaahipacerya okhuwela ariki: “Awo aaruuha nivuku na nivarihano na Muluku a Isarayeli wiira aniive, vamosa ni atthu ahu!”
11 Moottharelana, yaahiruma wiihaniwa ni othukumanyiwa anamalamulela ootheene a afilisti, yaahimeerya wiira: “Mukumihe nivuku na nivarihano na Muluku a Isarayeli. Muttikixerye opuro aya wiira hiyo ni atthu ahu nihiiviwe”. Tthiri atthu ootheene a epooma ele yaanoova okhwa. Nave Muluku eekeekhai aahaahaaxa atthu awo.
12 Nto ale yahiiviwe, aahaakhuma munamuluku. Vano okhuwela wa atthu a epooma ele avekelaka nikhaliheryo, waahiphiya wiirimu.
