1 Timootheyo 6:1-21
6 Ale ari ipottha, yaattittimiheke vanceene ale anaavarela aya muteko ntoko vaniphwanela aya, wira nihiveehiwe nsina na Muluku ni mwiixuttiho awe.
2 Nave, ale ari ipottha, anaavarela muteko makristau, ahihiye waattittimiha mwaha wookhala axinna. Masi, ahaana waavarela saana muteko, okhala wira ale anittottela mureerelo muteko aya, ti makristau ni axinna oophentiwa.
Muhihiye wiixuttiha ni otumererya itthu iya.
3 Akhala mutthu onimwarya-mwarya soowiixuttiha soowoothiwa ni ohineemererya soowiixuttiha sooreera,* seiyo sinikhuma wa Pwiya ahu Yesu Kristu, nnakhala ohineemererya soowiixuttiha sinooniherya moota nikhanle ahu oomurumeela Muluku ni nthiti,
4 mutthu owo toowiixinnuwiha vanceene ni khiivo etthu enisuwela awe. Nave omusivela onyakulihana ni ovaanyihana moolumo. Itthu iyo sinnikumiherya nrima, owana-wana, owootherya akina,* ohaaroromela atthu akina,
5 omakela onyakulihana myaha saamukhaani ni atthu ahirina muupuwelo wooloka, ni ahinisuwela ekeekhai, yuupuwelaka wira omurumeela Muluku ni nthiti onniphwanyiha mureerelo.
6 Mweekeekhai, ole onimurumeela Muluku ni nthiti ni onihakalala ni itthu orina awe, onniphwanya mureerelo munceene.
7 Okathi naayariwe ahu moolumwenkuni-mu, khinaaruhale etthu, nave okathi ninrowa ahu okhwa, khaninkuxa etthu.
8 Tivo, naakhalanaka-ru yoolya ni yoowara,* nitteeliweke murima ni itthu iyo.
9 Ale aniphavela othaaciri, anneehereriwa ni annimorela vantaphani, nave annikhala ipottha sa itthu sinceene sihirina efaita ni sootakhala, seiyo sinaakumiherya maxakha ni okhwa.
10 Ophenta musurukhu ti maphattuwelo a itthu sotheene soonanara. Nto mwaha wa ophenta musurukhu, atthu akina aahiya waamini ni ahiiphwanyiha maxakha manceene.
11 Masi, nyuwo muri murumeyi a Muluku, mutthyaweke itthu iya. Ohiya-vo, mphaveleke ni murima wotheene exariya, omurumeela Muluku ni nthiti, waamini, ophenta, ovilela, ni okhalana murima woomaala.
12 Nwaneke ekhotto yooreera ya waamini. Nvarexexeke okumi woohimala. Muluku oowiihanani wira mwaakhele okumi owo, nave nyuwo moolaleya okumi owo, ohoolo wa anamoona anceene.
13 Kinnoorumani ohoolo wa Muluku, yoowo oniiriha itthu sotheene okhala sikumi, ni wa Kristu Yesu, yoowo aalavunle oratteene ohoolo wa Ponsio Pilato, ohoovaka etthu,
14 wira mwiiweleleke yooruma muhirina nthowa, ni muhihimyaniwaka etthu yoohiloka, mpakha okathi Pwiya Yesu Kristu onrowa awe wiixooniherya.
15 Owo toohakalala ni ti Pwiya Oowerya, nave onrowa wiixooniherya waphiya okathi aya. Ti Mwene a mamwene otheene ni Pwiya a mapwiya otheene.
16 Owo paahi tohinikhwa, ni ti yoowo onikhala mapuro oovuwa atthu ahiniwerya aya waattamela, mapuro yaawo ahitonko wooniwa aahiiso ahinooniwa. Ottittimihiwe ni ovahiwe owerya voohimala. Amen.
17 Mwaavahe malakiheryo* athaaciri a olumwenku ola,* wira ahiisooneke, ni wira ahiroromeleke mihakhu sinimala, masi amuroromeleke Muluku, yoowo onniiriha othaaciri, onivahaka itthu sotheene sinnihakalaliha.
18 Mwaaleele wira avareke miteko sooreera, akhaleke athaaciri a miteko sooreera, evaheke, akhaleke oolikana ene wira yaakaweleke atthu akina itthu sirina aya.
19 Opaka eyo, onrowa olikanaka ni wiithukumanyerya mihakhu sinikhuma wa Muluku. Eyo enitaphulela wira annimpaka alisenso* ooloka a muhoolo, wira avarexexe okumi weekeekhai.
20 Nyuwo Timootheyo, muhihiye etthu mwaakhenle anyu wa Muluku. Muhiwiriyaneke moolumo eethiru aninvirikanya Muluku, ni miyuupuwelo sa atthu aniihimya osuwela, masi osuwela waya onivirikanya ekeekhai.
21 Akina annooniherya osuwela iwo, nto eyo yoowiiriha ohiya waamini.
Oreera murima wuulupale wa Muluku, okhale ni nyuwo.
Inoota
^ Aahiiso, “sooloka; siniphwanyiha mureerelo”.
^ Aahiiso, “moolumo ooveeha”.
^ Aahiiso, “opuro wookhala”. Ekereku, “etthu yoowiikhuneela”.
^ Aahiiso, “Mwaarume”.
^ Aahiiso, “okathi ola”. Nwehe Moolumo Ootthokiheriwa.
^ Aahiiso, “mathipelo”.
