Wahala Oopacerya 17:1-27
17 Davidi omalaka-ru othaamela owannyawe, aahimuhimeerya profeta Natani wiira: “Miyo kinikhala empa etekiwe ni matera a eseeturu, vano nivuku na nivarihano na Yehova nri mutentani”.
2 Natani aahimwaakhula Davidi oriki: “Mwapakeke ele eniphavela murima anyu, okhala wiira Muluku eekeekhai ori ni nyuwo”.
3 Ohiyu ene yoole, Muluku aahimuleela Natani wiira:
4 “Murowe mwamuleele murumeyi aka Davidi wiira: ‘Enihimya awe Yehova tiila: “Nyuwo khahiyo munrowa okitekela empa wiira kikhaleke-mo.
5 Nkinakhale mpaani okhuma nihiku kaakuminhe aka aisarayeli elapo ya wExiitu mpakha olelo, masi kinimakela othaama etenta emosa kirowaka ekina ni etabernaakulu* emosa kirowaka ekina.
6 Okathi wootheene kaari aka ni atthu ootheene a Isarayeli, nkitonko omukoha nnakhala mukhulupale mmosa a atthu a Isarayeli, yoowo kimuthanlale aka wiira oweettiheke atthu aka, kiriki: ‘Xeeni muhikitekenle anyu empa ya miri siniihaniwa eseeturu?’”’*
7 Vano mwamuleele murumeyi aka Davidi wiira: ‘Enihimya awe Yehova a anakhotto tiila: “Miyo kihookumihani opuro mwaari anyu makampusi, weiwo mwaakhapelela anyu ipwittipwitthi wiira mukhale muhooleli a atthu aka aisarayeli.
8 Nave kinrowa okhala ni nyuwo opuro wootheene munrowa anyu, ni kinimwaamala-maliha* awanani anyu ohoolo wanyu, nsina nanyu kinookhaliha ntoko masina a mamwene a mulaponi.
9 Kinimwaathanlela atthu aka aisarayeli opuro wiira akhaleke-mo, awo anrowa okhalaka memmo, nave khuuvo onrowa waahaaxaka. Atthu ootakhala khanrowa-tho waapuherya ntoko yiira aya khalai,
10 okhuma nihiku kaathanlale aka makhulupale wiira yaalamuleleke atthu aka aisarayeli. Nave kinimwaawerya awanani anyu ootheene. Nave-tho kinoolelani wiira: ‘Yehova onimootekelani empa’.
11 “‘“Vanrowa aya omala mahiku anyu, okathi munrowa anyu okhala ni amuhavinre anyu, kinookumiherya osuulu anyu, eyo piiyo, mwaninyu mmosa. Miyo kinoolipiha omwene awe.
12 Owo tonrowa okitekela empa, nave miyo kinoolipiha ehice awe mahiku ootheene.
13 Miyo kinookhala paapa awe, nave owo onrowa okhala mwanaka. Nkinrowa ohiya omooniherya ophenta waka woororomeleya ntoko kaahiyale aka omooniherya ole omuranttenle anyu.
14 Miyo kinoomwiiriha okhala empa aka ni moomweneni mwaka mahiku ootheene, nave ehice awe enrowa okhalaka mahiku ootheene”’”.
15 Natani aahimuleela Davidi moolumo ootheene ni itthu sootheene ooniheriwe awe ni Muluku.
16 Mwene Davidi aahikilaathi ohoolo wa Yehova onamukoha oriki: “Khoo Yehova Muluku, miyo kaapani? Nave amusi aka pani, wiira mukivuwihe siisa?
17 Khoo Muluku, nyuwo mwaahoona wiira itthu iya nlelo saari vakhaani, nave munnihimya wiira etthoko ya murumeyi anyu enrowa okhalaka mahiku manceene ohoolo. Ohiya-vo, khoo Yehova Muluku, nyuwo mookithokorerya ntoko mutthu onireerela ovuwihiwa vanceene.
18 Nilavulaka sa okittittimiha, exeeni miyo murumeyi anyu Davidi kikhanle aka oowoohimeeryani, mukisuwelaka saana miyo murumeyi anyu?
19 Khoo Yehova, mwaha wa murumeyi anyu, ni moovarihana ni ele eniphavela anyu moopaka itthu suulupale, mooniheryaka okhulupale anyu.
20 Khoo Yehova, khuuvo onlikana ni nyuwo, nave khuuvo Muluku muhikhanle nyuwo. Itthu sootheene niiwale ahu ni maaru ahu ala, sihooniherya eyo.
21 Nloko xeeni mulaponi ninlikana ni atthu anyu aisarayeli? Muluku eekeekhai oowoopola atthu awe. Nyuwo moosuweliha nsina nanyu mwaha woopaka itthu suulupale ni soowoopiha, nwoomolaka atthu a maloko makina ohoolo wa atthu anyu, yaawo nwooponle anyu wExiitu.
22 Nyuwo muhaakhaliha atthu a Isarayeli ntoko atthu anyu mahiku ootheene. Nave nyuwo Yehova, muhiikhaliha Muluku aya.
23 Vano, khoo Yehova, ele mmuleihenrye anyu murumeyi anyu ni atthu a etthoko awe yooniherye okhala yoororomeleya okathi wootheene, nave mwiire siiso ntoko muleihenrye anyu.
24 Nsina nanyu nikhaleke mahiku ootheene ni nivuwihiwe mahiku ootheene wiira atthu ahimyeke wiira: ‘Yehova a anakhotto, Muluku a atthu a Isarayeli, ti Muluku onaalamulela aisarayeli’, ni wiira etthoko ya murumeyi anyu Davidi elipihiwe ohoolo wanyu.
25 Tivonto, nyuwo Muluku aka, moomooniherya murumeyi anyu ele mulakenle anyu wiira mmutekele empa. Ti nthowa naya murumeyi anyu ohinoova awe woovekelani siisa.
26 Khoo Yehova, nyuwo mwa Muluku eekeekhai, nave moomuleiherya murumeyi anyu itthu iya sooloka.
27 Mwiire ntoko muniphavela anyu mureelihaka etthoko ya murumeyi anyu wiira ekhaleke mahiku ootheene ohoolo wanyu. Khoo Yehova, okhala wiira nyuwo mooreeliha, nto mareeliho awo anrowa okhalaka mahiku ootheene.
Inoota
^ Woonasa wene enitaphulela “Okhuma opuro yeemexiwa aya etenta erowaniwaka opuro mukina, nave okhuma opuro yaamaka aya arowaka opuro mukina”.
^ Miri iya onlikana ni miri oniihaniwa pinyeiro, seiyo sinaattela wunnuwa oLiibano.
^ Eheeberi, “kinimwaakumiha”.
