1 Yohani 5:1-21
5 Otheene ale anikupali wira Yesu ti Kristu, anamwane a Muluku, nave otheene ale animphenta Muluku, annaaphenta anamwane a Muluku.
2 Etthu ennisuweliha wira ninnaaphenta anamwane a Muluku, tiila: omphenta Muluku ni weettela sooruma sawe.
3 Omphenta Muluku onitaphulela weettela sooruma sawe. Tthiri sooruma sawe khasinvila weettela.
4 Otheene ale ari anamwane a Muluku, annixintta olumwenku. Ninnixintta olumwenku mwaha wa waamini wahu.
5 Ti pani oniwerya oxintta olumwenku? Tuule onaamini wira Yesu ti Mwaana a Muluku, khahiyo siiso?
6 Yesu Kristu aahirwa ni maasi ni ephome; owo khaarwiiye ni maasi paahi, aarwiiye ni maasi ni ephome. Nave munepa woowaarya tonivaha onamoona, maana munepa owo tori ekeekhai.
7 Sihaavo itthu tthaaru sinooniherya wira Yesu ti Mwaana a Muluku:
8 munepa, maasi ni ephome, nto onamoona wa itthu iya tthaaru, onnivarihana.
9 Akhala wira ninkupali onamoona wa atthu, nto nihaana okupali onamoona wa Muluku, maana onamoona owo ti wuulupalexa. Muluku onnihimya wira Yesu ti Mwanawe.
10 Mutthu onimwaamini Mwaana a Muluku, onnooniherya wira ookhalana vamurimani vawe ele Muluku omwiixuttihale awe. Mutthu ohinimwaamini Muluku, onnimuhimya okhala nawoothe, maana khonaamini onamoona Muluku omukhalenle awe Mwanawe.
11 Onamoona Muluku ovahale awe tuula: Muluku oonivaha okumi woohimala, nto okumi ola onikhuma wa Mwanawe.
12 Ole onimweemererya Mwaana, ookhalana okumi ola; ole onimukhootta Mwaana, khorina okumi ola.
13 Kinoolepelani itthu iya, kiphavelaka woosuwelihani wira nyuwo munaamini nsina na Mwaana a Muluku, mookhalana okumi woohimala.
14 Hiyo ninniroromela* wira Muluku onooniwiriyana wa khula etthu eninvekela ahu, enivarihana ni ele oniphavela awe.
15 Naasuwelaka wira owo onniniwiriyana wa khula etthu eninvekela ahu, noosuwela wira nnookhalana itthu sininvekela ahu, okhala wira itthu iyo nninvekela yoowo.
16 Mwanweha munninyu opakaka etampi ehinroiha wookhwaani, munvekelele. Nto Muluku ononvaha okumi mutthu owo, aayo, onimwaavaha okumi atthu yaale ahinipaka etampi eniroiha wookhwaani. Yookhala etampi eniroiha wookhwaani. Nto nkinihimya wira munvekeleke Muluku mwaha wa etampi eyo.
17 Khula etthu yootakhala ti etampi, masi, yookhala etampi ehinroiha wookhwaani.
18 Noosuwela wira ole ori mwaana a Muluku, khonimakela opaka etampi, maana Mwaana a Muluku,* onnimukhapelela. Vano Mutakhali khonwerya omwiiriha etthu yootakhala.*
19 Hiyo noosuwela wira na atthu a Muluku, masi olumwenku wotheene oneettihiwa ni Mutakhali.
20 Nave, noosuwela wira Mwaana a Muluku ohoorwa, khunivaha ankhili wira nimusuweleke Muluku eekeekhai. Vano hiyo nihiiraana ni Muluku, mwaha wa Yesu Kristu, Mwanawe. Muluku owo ti Muluku eekeekhai, ni okumi woohimala.
21 Anaaka oophentiwa, mwaatthyaweke amuluku eethiru.*
Inoota
^ Aahiiso, “ninnilavula nihoovaka etthu”.
^ Eyo piiyo, Yesu Kristu, Mwaana a Muluku.
^ Aahiiso, “Satana khoniwerya onvara”.
^ Ekereku, “elatarato”.
