2 aKorinto 10:1-18
10 Vano, miyo Paulo, kinniphavela tthiri wira mutthareke itthu koohimenryaakani. Kinilavula ni nyuwo kimutakihaka Kristu, yoowo ori oowiiyeviha ni ooreera murima. Masi akina a nyuwo anihimya wira kakhala eriyari anyu, kinikhala mutthu oowiiyeviha, masi ipaphelo kinoolepelaakani, kinilavula vooluluwanya.
2 Kinlipelela wira okathi kinrowa aka ophiya iwo, ale anuupuwela wira nintthara makhalelo a erutthu, anrowa wiiraka aturunke ene muupuwelo aya, wira kihaapwapwele vanceene.
3 Nnaamwi nikhalaka olumwenku ola, hiyo khaninwana ekhotto ntoko aniira aya atthu a olumwenku ola.
4 Ikapwitthi sa ekhotto ahu, khahiyo seiye sinirumeeliwa ni atthu a olumwenku ola, masi Muluku tonivanhe, wira nipwexeke itthu soolipexa, seiyo sinlikana ni ipa soolipa.
5 Hiyo ninnipwexakasa miyuupuwelo sotheene ni itthu sotheene sinaakhoottiherya atthu omusuwela Muluku. Sisaale ntoko mutthu otthukweliwe, hiyo ninniwalela miyuupuwelo sotheene, wira simwiiweleleke Kristu.
6 Nave noolikana wira nimuhukhumu khula mutthu ohiniiwelela, nuumala nyuwo wooniherya wira munniiwelela voomalela.
7 Nyuwo muniweha itthu ntoko sinooneya aya. Akhala mutthu onilavula ohihoveryaka wira owo ti murumeyi a Kristu, ohaana wuupuwela etthu ela: Siisaale owo ori awe murumeyi a Kristu, ni hiyo-tho na arumeyi a Kristu.
8 Apwiya aanivaha owerya wira nlipihe waamini wanyu, ohiya opwetexa. Hata kiittottopaka vanceene mwaha wa owerya iwo nivahiwe ahu, miyo nkinrowa wuuliwa muru.
9 Nkiniphavela owiirihani nyuwo woonaka wira kiniphavela owoopopihani ni ipaphelo kinoolepelaakani.
10 Atthu akina anihimya wira: “Ipaphelo sawe ti soolipa ni sookhalana owerya, masi owo akhala ni hiyo khonoopiha, nave moolumo awe kharina efaita”.
11 Masi, ale anihimya siiso ahaana osuwela wira, itthu nnihimya ahu* mpapheloni mwahu nihikhanle weiwo, ti seiyo ninrowa ahu opaka* nakhala weiwo.
12 Hiyo khanimphavela wiihela ekrupu emosa-ru ya atthu oowiittottopa, nnakhala olikana naawo. Atthu awo anniiphukela attharihelaka ele aneene anihimya aya okhala yooloka. Nto, annooniherya wira kharina ankhili.
13 Vano, hiyo nnimwiittottopa, masi nihivikanaka mukano. Ninrowa wiittottopa paahi mwaha wa ele eniwerya ahu opaka, mmutekoni nithanleliwe ahu ni Muluku. Nave nyuwo muniirela mpantta muteko owo nithanleliwe ahu.
14 Mweekeekhai, okathi naari ahu ni nyuwo, hiyo khinaapanke etthu Muluku ahaanirumme awe, masi hiyo ti naapacenrye woolaleeryani ihapari sooreera sa Kristu.
15 Hiyo khanniittottopa ovikana mikano nithanleliwe ahu, eyo piiyo, khanniittottopa mwaha wa miteko sa atthu akina. Ninlipelela wira okathi waamini wanyu onrowa aya wunnuwaka, muteko ahu onrowa wunnuwaka mmuttettheni mwahu. Siiso, muttetthe ninrowa ahu ovaraka muteko, onootepaka wunnuwa.
16 Vano, hiyo nnoowerya olaleya ihapari sooreera mittetthe sirakamenle muttetthe anyu, wira nihiittottope mwaha wa muteko ovariwe ni atthu akina mmuttettheni athanleliwe aya.
17 “Masi ole oniittottopa, aittottopeke mwaha wa Yehova”.
18 Muluku khonimweemererya ole oniittottopa mmansawe, masi Yehova tonimuthanla mutthu onimweemererya awe.
