2 aKorinto 12:1-21
12 Miyo kihaana wiittottopa. Tivo, kinrowa olavula itthu kooniheriwe aka ni Apwiya ni moolumo akivanhe aya, nnaamwi eyo ehirowaka okikumiherya mureerelo.
2 Kinnimusuwela mulopwana mmosa, yoowo aari murumeyi a Kristu. Iyaakha 14 sivinre, aahikuxiwa niinaano-ru oroihiwaka erimu ya neeraru. Miyo nkinsuwela vakhala wira aakuxiwe ni erutthu awe aahiiso ohirina erutthu awe, masi Muluku tonisuwela.
3 Aayo, miyo kinnimusuwela mulopwana owo. Owo aahikuxiwa niinaano-ru oroihiwaka oparayiisu. Nkinisuwela akhala wira aakuxiwe ni erutthu awe aahiiso ohirina erutthu awe, masi Muluku tonisuwela.
4 Ori ene oparayiisu, mulopwana ole aahiiwa moolumo ahinlavuliwa ni ahinireerela mutthu olavula.
5 Miyo kinimwiittottopa mwaha wa mulopwana owo, masi nkinrowa wiittottopa mmansaka, vahikhanle paahi mwaha wa ohilipa waka.
6 Tthiri, hata kaaphavela wiittottopa, nkaarowa okhala mulolo, maana kaarowa olavula ekeekhai. Masi nkinipaka eyo wira ohikhale mutthu onrowa otepa okittottopela, ovikana ele onikiwehana awe aahiiso onikiiwa awe,
7 mwaha wa itthu sootikiniha suulupale kooniheriwe aka.
Vano, wira kihitepeke wiittottopa, yookhala etthu enimakela okixankiha, yeeyo enlikana ni mwiiwa oheliwe mweerutthuni mwaka. Eyo eri ntoko nlaikha na Satana, wira nimakeleke okimana, ni kihitepeke wiittottopa.
8 Kihaaxonttela Apwiya ikwaha tthaaru wira etthu ela ekikhume.
9 Masi awo yaahikaakhula wira: “Vanniphiyerya wooreerelani waka murima vaalupale, okhala wira owerya waka onnitepa olipa, okathi muhinlipa anyu”. Nto, kinrowa wiittottopa voohakalala mwaha wa ohilipa waka, wira owerya wa Kristu okhaleke vasulu vaka ntoko eheema.
10 Siiso, vannikisivela ohilipa-lipa, oruwaniwa, othoiwa, olupatthiwa ni okhalana mixankiho, mwaha wa Kristu. Mweekeekhai, okathi kihinlipa aka, vaavo-nto kintepa aka olipa.
11 Miyo kookhala ntoko mulolo mwaha wa nyuwo. Nyuwo mookikhanyererya okhala siiso, maana khamulavunle itthu sooloka kipanke aka. Miyo nkihiyo mwaamukhaanixa waavikana arummwa anyu, yaawo anikhala ntoko toolokexa, hata nyuwo muhikoonaka okhala etthu.
12 Tthiri, koowooniheryani ithoonyeryo sinooniherya wira ka murummwa. Koopaka eyo ni ovilela wuulupale, ni ithoonyeryo, ni miiriirya ni miteko sootikiniha.
13 Etthu emosa paahi ewiirihaleni okhala ooyeva ovikana miloko sikina, tiila: Khiivo etthu koovekenlyaakani. Kiireke koottheka mwaha wa etthu eyo? Akhala wira ti siiso, weeso mukilevelele.
14 Mwiiwe! Ela ekwaha ya neeraru kiilokihenrye aka wira kirwe kooxukuryeni, nave nkiniphavela woovekelani etthu. Miyo nkiniphavela okhalana mireerelo sanyu, masi kiniphavela woowehani. Atthu khanlipelela wira anamwane yaasukeryeke mihakhu axipapaya ni aximamaya, masi axipaapa ni aximaama, tanaasukerya mihakhu anaaya.
15 Miyo kinoohakalala omaliha itthu sotheene kirina aka mwaha wa nyuwo, hata okumi aka. Niireke nkiniphwanela ophentiwa vanceene ni nyuwo, siisaale kinoophentaakani?
16 Masi, nnaamwi kihoovekenleni etthu, nyuwo munihimya wira “kihoowokani” ni kihoovarani “muntaphani”.
17 Kiireke koottottela mureerelo itthu sanyu, kaarumeelaka ale kaarumme aka orwa wa nyuwo?
18 Koomutumererya Tito orwa wa nyuwo, ori ene ni munna ole mukina. Niireke Tito oottottela mureerelo itthu sanyu? Nnaari! Hiyo nihooniherya okhala oowiiraana, kiira? Nave hiyo ninnipaka itthu simosa-ru, khahiyo siiso?
19 Woonasa wene, nyuwo munuupuwela wira hiyo nnimwiixaakiha, masi khahiyo siiso. Ohiya-vo, ntoko atthu animutthara Kristu, hiyo ninnilavula ekeekhai vamaithoni va Muluku. Axinnaka oophentiwa, itthu sotheene nimpaka ahu, nniirela woolipihani.
20 Tthiri, kinnoova wira karwa wa nyuwo, kinrowa woophwanyani ni mweettelo woovirikana ni ole kaaphavela aka, nave moonelo aka onrowa okhala woovirikana ni ole mwaaphavela anyu. Masi, kinnoova ophwanya onyakulihana, nrima, oviruwa, okawanyeya, wootheryana, waapana, wiixinnuwiha ni ohiiwanana.
21 Woonasa wene, okathi kinitthikela aka iwo, Muluku aka onookiiriha wuuliwa muru eriyari anyu. Pooti wira kinooriipiwa murima okhala wira atthu anceene kharukununxe murima mwaha wa itampi apanke aya khalai. Awo khaturunke muupuwelo aya wa opaka itthu soohiloka, orupihana woohiloka* ni okhalana mweettelo woohiloka onooniherya ohuuliwa muru.*
Inoota
^ Ekereku, porneía. Nwehe Moolumo Ootthokiheriwa.
^ Ekereku, aselgéia. Nwehe Moolumo Ootthokiheriwa ani: “Mweettelo Woohiloka Onooniherya Ohuuliwa Muru”.
