2 aKorinto 2:1-17
2 Miyo koolakela ohooriipihani-tho murima ekwaha ekina enirwa aka wooxukuryani.
2 Akhala wira kinimooriipihani murima, ti pani onrowa okitteeliha murima, ohikhanle ole omuriipihale aka murima?
3 Tivo koolepenlyaakani siiso, wira miyo kaphiya ori anyu, kihiriipiwe murima mwaha wa ale yaakhanle ookitteeliha murima. Tthiri mwaha wa nyuwo otheene, kinnikupali wira etthu enikitteeliha murima, nave ennootteelihani murima otheene anyu.
4 Miyo kihoolepelani epaphelo ni oxanka ni oriipiwa murima ni maithori manceene, kihiphavelaka wooriipihani murima, masi kiphavelaka woosuwelihani wira kinnoophentani vanceene.
5 Akhala mutthu owiirinhe akina oriipiwa murima, khokiriipinhe murima miyo, masi ohooriipihani murima otheene anyu. Nto nkiniphavela olavulasa vanceene mwaha ola.
6 Vaaphiyerya opwapweliwa wawe mulopwana owo ni atthu anceene.
7 Vano, muhaana omulevelela mulopwana owo ni murima wotheene ni ommaaliha, wira ohitepe oriipiwa murima mpakha okhulumuwa.
8 Tivo, kinootumereryani wira mmooniherye wira munnimphenta.
9 Etthu ekina ekiirinhe woolepelani epaphelo ela, tiila: kiniphavela osuwela oratteene, vakhala wira nyuwo munniiwelela mwa itthu sotheene.
10 Akhala wira moomulevelela mutthu mwaha wa etthu emosa, ni miyo koomulevelela. Tthiri, khula etthu kilevelenle aka (akhala wira koolevelela etthu), kihiira siiso wira mphwanye mureerelo vamaithoni va Kristu.
11 Siiso, khaninrowa oweriwa* ni Satana, maana khanintikhina itthu siniphavela awe.*
12 Nuumala ophiya oTrowade wira kalaleye ihapari sooreera sa Kristu, ni ovahiwa eparakha yuulupale* wira kivare muteko wa Apwiya,
13 kaahixanka vanceene, okhala wira nkamphwannye munnaka Tito. Tivo, kaahaalaxerya awiixutti a weiwo, kinarowa oMasedonia.
14 Oxukhureliwe Muluku, yoowo onnihoolela ntoko anakhotto anitthika okhottoni axinttale ene ni Kristu. Osuwela wa Muluku onninkhela saana, nave owo onnirumeela muteko onivara ahu wira owiirihe atthu a mapuro otheene woona wunkhela iwo!
15 Hiyo nimmulaleya Kristu, ninlikana ni etthu yoowunkhela ohoolo wa Muluku. Wunkhela iwo, onnaaphwanya ale anrowa woopowa ni ale anrowa opwetexiwa.
16 Wa ale anrowa opwetexiwa, onnaaphwanya wunkhela wa okhwa, oniroiha wookhwaani. Nave wa ale anrowa woopowa, onnaaphwanya wunkhela wa okumi, oniroiha wookumini. Vano, ti pani oniphwanelela tthiri ovara muteko ntoko ola?
17 Hiyo ninniphwanelela, maana khaninlikana ni atthu anceene, yaawo animpakela nakoso* nuulumo na Muluku. Masi ntoko awiixutti a Kristu, hiyo ninnilavula ekeekhai vamaithoni va Muluku, nirummwale ene ni Muluku yoowo.
Inoota
^ Aahiiso, “owokiwa”.
^ Aahiiso, “olavilavi awe”.
^ Ekereku, “koohuleliwa mukhora muulupale”.
^ Aahiiso, “aniphwanyerya eluukuru”.
