Mamwene a Nenli 25:1-30
25 Eyaakha na neethanu neexexe ya olamulela wa Sedekiya, mweeri wa namuloko, nihiku 10 na mweeri owo, mwene Nabukodonosori a oBabilonia, aahirowa oYerusalemu ni anakhotto awe ootheene. Owo aahimaka opuro owo wiira otuphele, ni aahiteka exiri yaarukurerya epooma yootheene.
2 Nto, epooma ele yaahirukureriwa mpakha eyaakha ya namuloko namosa ya mwene Sedekiya.
3 Nihiku na neethanu neexexe na mweeri wa neexexe, yaahikhumelela etala yuulupale epooma ele, nto atthu a elapo ele khiyaarina yoolya.
4 Vano, ixiri sa epooma saahiphweeya nto anakhotto ootheene yaahitthyawa nuuhiyu aviraka mukhora waari eriyari ya ixiri piili, waattamela exarti ya mwene, nlelo atthu a oKhaldeya arukurenrye ene epooma. Mwene aaronwe ephiro ya wAraba.
5 Masi, anakhotto a oKhaldeya yaahimoomola mwene, anvara opuro woowaataleya wa woothakoni wa oYeriko, nto atoropa awe ootheene yaahimwara-mwareya.
6 Moottharelana, yaahimukuxa mwene, amuroiha wa mwene a oBabilonia, oRibla, nave yaahimulamula.
7 Awo yaahiwiiva anamwane a Sedekiya ohoolo wawe. Nuumala-vo, Nabukodonosori aahisyoola maitho a Sedekiya, omutthukwa ni ikwirinti sa ekoopiri, omuroiha oBabilonia.
8 Mweeri wa neethanu, nihiku na neethanu nenli na mweeri owo, eyo piiyo, eyaakha ya namuloko ni thanu naxexe ya mwene Nabukodonosori a oBabilonia, Nebuzaradani xeefi a makwarta, murumeyi a mwene a oBabilonia, aahiphiya oYerusalemu.
9 Owo aahipaha empa ya Yehova, empa ya mwene ni ipa sootheene sa oYerusalemu. Nave-tho, aahipaha ipa sootheene sa alopwana oottittimihiwa.
10 Vano, ixiri saarukurenrye oYerusalemu saahipwexakasiwa ni anakhotto ootheene a oKhaldeya, yaawo yaari ni xeefi a makwarta.
11 Nebuzaradani xeefi a makwarta, aahaaroiha weepotthani atthu yaahiiwale epooma ele, ale yaamutthyanwe mwene a oBabilonia, ni atthu akina yaahanle.
12 Masi, xeefi a makwarta aahaahiya atthu akina ootepexa ohaawa a elapo ele, wiira avareke miteko imatta sa ewuuva ni avareke miteko sookhanyereriwa.
13 Atthu a oKhaldeya yaahipwexakasa ipilaari sa ekoopiri sa empa ya Yehova, vamosa ni ikarinyu, epasiya yuulupale ya ekoopiri yaaheliwa maasi yeeyo yaakhala empa ya Yehova, akuxa ekoopiri ene aroiha oBabilonia.
14 Nave-tho, awo yaahikuxa itthu saaheliwa ettuurwa, ipoxolo, itisora saathikilaniwa ntthampo noovya, ikoopho ni mireerelo sootheene sa ekoopiri saavareliwa muteko mutemplo.
15 Xeefi a makwarta aahikuxa ixamaniiya ni itixela saari sa eweero yooreera ni eparatha yooreera.
16 Ekoopiri ya ipilaari piili, epasiya yuulupale ya ekoopiri yaaheliwa maasi, ikarinyu, seiyo Salomoni aapanke awe wiira sirumeeliweke empa ya Yehova, khivaaweryaneya osuweliwa olemela waya.
17 Khula epilaari, orakama waya waari wa ikoovatu* 18, nave vasulu vaya naahikhala nlipiheryo na ekoopiri. Orakama wa nlipiheryo nlo waari wa ikoovatu tthaaru, nave areeti ni ilatarato sa muhokorokho oniitthaniwa roma saarukuryenrye nlipiheryo nlo, sootheene saari sa ekoopiri. Epilaari ya nenli, vamosa ni areeti aya yaamulikana ni ekhwaaya.
18 Nave-tho, xeefi a makwarta aahimukuxa mukhulupale a anamukuttho Seraya, namukuttho a nenli Sefaniya ni makwarta mararu.
19 Aahimukuxa-tho mukhulupale a epooma yoowo aari kumantanti a atoropa, atthu athanu yanvaha miruku mwene yaawo yaari opooma, sekretaario a xeefi a anakhotto yoowo aakeliha etoropa atthu a elapo ele ni alopwana 60 a elapo ele yaawo nlelo yaari opooma.
20 Nebuzaradani xeefi a makwarta, aahaakuxa atthu awo aaroiha wa mwene a oBabilonia, oRibla.
21 Mwene a oBabilonia aahiwiiva atthu awo, oRibla, elapo ya oHamati. Siiso, atthu a oYuda yaahikuxiwa elapo aya aroihiwaka weepotthani.
22 Mwene Nabukodonosori a oBabilonia, aahimuthanla Gedaliya, mwaana a Ahikami, mwaana a Xafani, wiira aahooleleke atthu aahiyale awe elapo ya oYuda.
23 Okathi maxeefi ootheene a anakhotto ni alopwana aya yaasuwenle aya wiira mwene a oBabilonia aahimuthanla Gedaliya, moowaakuveya yaahirowa wa Gedaliya, oMisipa. Atthu awo yaari: Iximayeli, mwaana Netaniya; Yohanani, mwaana a Kareya; Seraya mwaana a Tanihumethi, a oNetofa; ni Yaazaniya, mwaana a Maakati. Awo yaari vamosa ni alopwana aya.
24 Gedaliya aahaaleiherya awo vamosa ni alopwana aya, oriki: “Muhoove okhala arumeyi a atthu a oKhaldeya. Mukhaleke elapo ela ni mmurumeeleke mwene a oBabilonia, nto itthu sootheene sinooweettelani saana”.
25 Mweeri wa neethanu nenli, Iximayeli mwaana a Netaniya, mwaana a Elixama, yoowo aari a nloko na mamwene,* aahirowa oMisipa vamosa ni alopwana 10. Awo yaahimutuphela Gedaliya, amwiiva vamosa ni ayuda akina ni atthu a oKhaldeya yaari nuuwo.
26 Nuumala-vo, atthu ootheene, okhuma acikhaani mpakha aalupale, waahela muhina maxeefi a anakhotto yaahikhuma anarowa wExiitu, okhala wiira yaaniwoova atthu a oKhaldeya.
27 Eyaakha ya namuloko miraru ni thanu na piili, Yoyakini mwene a oYuda ori ene weepotthani, mweeri wa namuloko ni piili, nihiku 27 na mweeri owo, eyaakha yeeyo Evili-Merodaki aakhanle awe mwene a oBabilonia, aahimutaphula mukhatteya Yoyakini, mwene a oYuda.
28 Owo aanilavulana saana ni aahimuhela opuro wootepaxa ottittimiheya waavikana mamwene makina yaari ni yena oBabilonia.
29 Yoyakhini aahirula ikuwo sawe sa okhatteya, onalya vameesa va mwene mahiku ootheene a okumi awe.
30 Okathi wootheene, owo aanaakhela yoolya aavahiwa awe ni mwene, nihiku ti nihiku, eyo piiyo, mahiku ootheene a okumi awe.
Inoota
^ Ekoovatu emosa enikhala isentiimeturu 44.5. Munwehe Apendise B14.
^ Eheeberi, “osuulu wa mamwene”.
