Wahala a Nenli 10:1-19
-
Atthu a Isarayeli annimurukunuwela Robowamu (1-19)
10 Robowamu aahirowa oSikhemi, okhala wiira atthu ootheene a wIsarayeli yaahirowa oSikhemi omukhaliha mwene.
2 Yerobowamu mwaana a Nebathi aahiiwa eyo (owo nlelo aari wExiitu ni aakhala weiwo, okhala wiira aamutthyanwe mwene Salomoni). Nto Yerobowamu aahitthika wExiitu.
3 Atthu yaahiruma wiihaniwa Yerobowamu. Vano, Yerobowamu ni atthu ootheene a wIsarayeli yaahirowa omuhimeerya Robowamu wiira:
4 “Paapa anyu khaareere onihaaxa. Masi nyuwo mwaahinihaaxe, ntoko paapa anyu iirale awe, ni mwakhweiherya okumi ahu, nnimoorumeelakani”.
5 Siiso, Robowamu aahaahimeerya atthu wiira: “Mwakhale mahiku mararu, nuumala-vo mutthikele wenno”. Nto atthu awo yaahirowa.
6 Mwene Robowamu aahaakoha axitokweene yamurumeela paapa awe, Salomoni, okathi aari awe mukumi, oriki: “Miruku xeeni munkivaha anyu wiira kiwaakhule atthu ala?”
7 Awo yaahimwaakhula ariki: “Vakhala wiira munimwaareerela murima atthu ala ni waasiveliha, nwaakhulaka oratteene, awo anookhala arumeyi anyu mahiku ootheene”.
8 Masi, Robowamu khaiwelenle miruku aavahiwe awe ni axitokweene, nto aahaakoha amiravo yannunwe ni yena, yaawo yaari arumeyi awe.
9 Owo aahaakoha amiravo awo oriki: “Miruku xeeni munkivaha anyu wiira niwaakhule atthu ala akihimenrye wiira: ‘Paapa anyu oonikumiherya mixankiho, masi nyuwo mukhweiherye okumi ahu’?”
10 Amiravo yannunwe nuuwo, yaahimuhimeerya wiira: “Etthu mukhanle anyu oowaahimeerya atthu ale, yaawo ahimmye wiira: ‘Paapa anyu ootepa onikumiherya mixankiho, masi nyuwo mukhweiherye okumi ahu’, tiila: ‘Miyo kinootepa woohaaxani ovikana moota paapa aka oohaaxaaweni.
11 Paapa aka aanoohaaxani, masi miyo kinrowa otepaka woohaaxani. Paapa aka aaniwuuputthani ni murepettho paahi, masi miyo kinoowiirelani etthu yootepa otakhala, okhala wiira kinrowa owuuputthakani ni murepettho wooheliwa miiwa’”.
12 Yerobowamu ni atthu ootheene, yaahirowa wa Robowamu nihiku na neeraru, ntoko mwene saahimenrye awe wiira: “Mutthikele wenno yavira mahiku mararu”.
13 Masi, mwene aahiwaakhula atthu ale voohiloka. Siiso, mwene Robowamu aahikhootta miruku aavahiwe awe ni axitokweene.
14 Owo aahitthara miruku aavahiwe awe ni amiravo, aaleela atthu ale wiira: “Miyo kinrowa otepaka woohaaxani. Paapa aka aaniwuuputthani ni murepettho paahi, masi miyo kinoowiirelani etthu yootepa otakhala, okhala wiira kinrowa owuuputthakani ni murepettho wooheliwa miiwa”.
15 Nto mwene khaawiriyanne atthu ale, okhala wiira Muluku eekeekhai tiirinhe wiiraneya eyo, wiira yiiraneye moolumo Yehova aamulenle awe Yerobowamu, mwaana a Nebathi, omurumeelaka Ahiya a oSilo.
16 Okathi aisarayeli ootheene yaawenhe aya wiira mwene khaaphavenle waawiriyana, atthu awo yaahimuhimeerya wiira: “Exeeni erina ahu ni Davidi? Khanrina etthu yoohiyeriwa ni mwaana a Yese. Khoo atthu a Isarayeli, khula mutthu otthikeleke waakokhorela amuluku awe. Khoo Davidi, vano mukhapeleleke etthoko anyu!” Nto, aisarayeli ootheene yaahitthikela owannyeya.
17 Masi, Robowamu nlelo aanaalamulela aisarayeli, yaawo yaakhala ipooma sa oYuda.
18 Moottharelana, mwene Robowamu aahimuruma Hadorami, yoowo aaweherya ale yaavarihiwa miteko sookhanyereriwa, masi aisarayeli yaahinvonyakasa maluku mpakha omwiiva. Mwene Robowamu, aahilokiherya ekaaro awe ya ekhotto yeeyo yaapuruliwa ni inama, otthyawela oYerusalemu.
19 Aisarayeli yaahivirikanya etthoko ya Davidi, ni anniira siiso mpakha olelo-va.
