Wahala a Nenli 11:1-23
11 Okathi Robowamu aaphiyale awe oYerusalemu, moowaakuveya aahaathukumanya atthu a etthoko ya Yuda, ya Beniyamini, ni anakhotto oosuwela owana ekhotto 180.000, wiira yawane ni atthu a Isarayeli, aphavelaka omuttikiherya omwene Robowamu.
2 Xemaya mulopwana a Yehova, aahiiwa moolumo a Muluku eekeekhai, yaawo yaahimya wiira:
3 “Mwamuhimeerye Robowamu, mwaana a Salomoni, mwene a oYuda ni atthu ootheene a Isarayeli ari oYuda ni oBeniyamini, wiira:
4 ‘Enihimya awe Yehova, tiila: “Muhirowe owana ni axinninyu. Khula mmosa a nyuwo, otthikeleke owannyawe, okhala wiira ti miyo kikumihenrye etthu ela”’”. Nto atthu awo yaahiiwelela moolumo a Yehova, yaahitthika, nto khiyaaronwe owana ni Yerobowamu.
5 Robowamu aakhala oYerusalemu, nave aahiteka ipooma soolipihiwa oYuda.
6 Siiso, owo aahiteka oBetelehemu, wEtami, oTekowa,
7 oBethi-Suri, oSoko, wAdulami,
8 oGathi, oMarexa, oZifi,
9 wAdorayimi, oLakixi, wAzeka,
10 oSoreya, wAiyaloni ni Hebroni. Iya saari ipooma soolipihiwa saari oYuda ni oBeniyamini.
11 Nave-tho, owo aahilipiha ipooma iyo, aapweha makumantanti, nave aahaaroihela yoolya, makhura ni eviinyu.
12 Aahilipiha ipooma sootheene oroihaka iskuutu suulupale ni mavaka. Owo aahilipiha vanceene ipooma iyo. Nto khaahiyale olamulela oYuda ni oBeniyamini.
13 Vano anamukuttho ni alevi yaawo yaakhala wIsarayeli wootheene, yaahihiya mittetthe saya, anarowa omukhaliherya Robowamu.
14 Alevi yaahihiya mapuro yaalyiha aya inama saya ni imatta aya anarowa okhala oYuda ni oYerusalemu, okhala wiira Yerobowamu ni anaawe yaahaahiiha orumeela ntoko anamukuttho a Yehova.
15 Moottharelana, Yerobowamu aahaathanla anamukuttho awe a mapuro oorakamela osulu anikokhoreliwa amuluku eethiru, a malaikha ootakhala anlikana ni ipuri ni ilatarato sa ipooyi aapanke awe.
16 Nave atthu ootheene a mahimo a Isarayeli, yaawo yamphavela Yehova, Muluku a Isarayeli ni murima aya wootheene, yaahaatthara anamukuttho ni alevi oYerusalemu wiira yanvahe mukuttho Yehova, Muluku a amuhavinre aya.
17 Awo yaahiviriha iyaakha tthaaru alipihaka omwene wa oYuda ni amukhaliheryaka Robowamu mwaana a Salomoni, okhala wiira yaaneetta iphiro sa Davidi ni sa Salomoni iyaakha tthaaru.
18 Muhoolo mwaya, Robowamu aahimuthela Mahalathi. Owo aari mwaana mwaamuthiyana a Yerimothi, mwaana a Davidi, nave aari mwaana mwaamuthiyana a Abihayili, mwaana mwamuthiyana a Eliyabi, mwaana a Yese.
19 Nuuvira okathi muthiyana owo aahimuyarela Robowamu anamwane ala: Yewuxi, Xemariya ni Zahami.
20 Muhoolo mwaya, Robowamu aahimuthela Maaka, musulwaawe Absalomi. Nuuvira okathi, muthiyana owo aahimuyarela Robowamu anamwane ala: Abiya, Atayi, Ziza ni Xelomithi.
21 Robowamu aanimphenta vanceene Maaka, musulwaawe Absalomi, waavikana axaarawe akina ni athiyana akina. Owo aarina axaarawe 18 ni athiyana akina* 60. Nave aahaayara anamwane axilopwana 28 ni anamwane axithiyana 60.
22 Siiso Robowamu aahimuthanla Abiya, mwaana a Maaka, wiira okhale xeefi ni muhooleli eriyari ya axinnawe, okhala wiira aaphavela omukhaliha mwene.
23 Vano, Robowamu aahipaka etthu mwa miruku, aroiha* anaawe akina mittetthe sootheene sa oYuda ni sa oBeniyamini, ipooma sootheene soolipihiwa, aavaha yoolya yinceene ni owaaverya athiyana anceene wiira akhale axaaraya.
