Wahala a Nenli 13:1-22
13 Mwaakha wa namuloko neethanu neeraru wa mwene Yerobowamu, Abiya aahikhala mwene a oYuda.
2 Owo aahilamulela iyaakha tthaaru oYerusalemu. Maama awe aihaniwa Mikaya, mwaana mwaamuthiyana a Uriyeli a oXibeya. Nave Abiya ni Yerobowamu yaaniwana ekhotto.
3 Siiso, Abiya aahirowa owana ekhotto ori ene ni anakhotto awe 400.000 ootupa ni oosuwela owana ekhotto. Nave Yerobowamu aahiilokiherya wiira owane nuuwo ni anakhotto awe 800.000 alopwana oosuwela owana ekhotto,* anakhotto ootupa.
4 Vano Abiya aaheemela omwaako Semarayimi, yoowo onikhala muttetthe wa omiyaakoni wa wEfrayimi, onahimya wiira: “Khoo Yerobowamu ni atthu ootheene a Isarayeli, mukiwiriyane.
5 Khamunsuwela wiira Yehova Muluku a Isarayeli onvaha Davidi vamosa ni anaawe omwene wa Isarayeli voohimala, mwaha wa nivarihano na mahiku ootheene?*
6 Masi Yerobowamu mwaana a Nebathi, murumeyi a Salomoni mwaana a Davidi, aahimurukunuwela pwiyawe.
7 Vano alopwana otakhala ni ahirina efaita, yaahitakaahana nuuwo, nto yaahinwerya Robowamu, mwaana a Salomoni, okhala wiira Robowamu owo aari mmiravo ni oowoova, nave khaawerya.
8 “Nyuwo munoona wiira munoowerya owana ni omwene wa Yehova ori mmatatani mwa anamwane a Davidi, maana khamureere waatta nave mookhalana ipooyi seiyo Yerobowamu opanke awe wiira sikhale amuluku anyu.
9 Kiira ti nyuwo nwoomonle anamukuttho a Yehova, osuulu wa Aroni ni alevi, nave mwaathanla anamukuttho anyu, ntoko aniira aya atthu a ilapo sikina? Khula mutthu onruuha epooyi yaamukhaani ni ipwittipwitthi 7 onniwerya okhala namukuttho a amuluku eethiru.
10 Vano hiyo, Muluku ahu ti Yehova, nave khanimunyanyanle. Anamukuttho ahu, osuulu wa Aroni, annimurumeela Yehova, nave alevi anninikhaliherya ovara muteko.
11 Awo anninvaha Yehova mikuttho soopahiwa khula nihiku, voosiisu ni makaaripi, nave annipaha nsenso noowunkhela. Iphaawu sinivahiwa Muluku sinnikhala vameesa a eweero yooreera, nave khula makaaripi, awo annipattiha muthuko wa eweero ni ixamaniya saya. Hiyo ninnivara ele Yehova Muluku ahu onnivekela awe, masi nyuwo moomunyanyala.
12 Vano mwiiwe! Muluku eekeekhai ori ni hiyo ni tonnihoolela. Anamukuttho ari vaava wiira yoopeke malope avahaka esinaale ya ekhotto. Khoo atthu a Isarayeli, muhiwane ni Yehova, Muluku aamuhavinre anyu, okhala wiira itthu khasinrowa oweettelani saana”.
13 Masi, Yerobowamu aahiwiipithela, nto anakhotto a Yerobowamu yaari ohoolo wa oYuda, vano alopwana akina yiipinthe yaari ottuli waya.
14 Okathi alopwana a oYuda yaarukununwe aya, yaahoona wiira awanani aya yaarwa ohoolo ni ottuli. Nto yaahipacerya omukhuwelela Yehova, anamukuttho yoopaka malope voowiiwanyeya.
15 Alopwana a oYuda yaahikhuwela wiira epacerye owana ekhotto, nto okathi alopwana awo yaakhuwenle aya wiira epacerye owana ekhotto, Muluku eekeekhai aahimuxintta Yerobowamu ni atthu ootheene a Isarayeli ohoolo wa Abiya ni wa ayuda.
16 Aisarayeli yaahaatthyawa ayuda, nto Muluku aahaavahererya mmatatani mwaya.
17 Abiya ni alopwana awe yaahiwiiva atthu anceene, tivo alopwana 500.000 oosuwela* owana ekhotto a wIsarayeli yaahikhwa.
18 Siiso, alopwana a wIsarayeli yaahuulihihiwa muru nihiku nle, masi alopwana a oYuda yaahikhala oowerya, maana yaahimuroromela Yehova, Muluku a amuhavinre aya.
19 Abiya aahithipelela omoomola Yerobowamu, nave aahikuxa ipooma iya: oBeteli ni mittetthe saya saamukhaani, oYexana ni mittetthe saya saamukhaani ni wEfrayiini ni mittetthe saya saamukhaani.*
20 Yerobowamu khaatthikenle-tho okhalana owerya mahiku a Abiya. Nuumala-vo Yehova aahimuhukhumu, nto owo aahikhwa.
21 Masi Abiya aanitepa okhala oowerya. Nuuvira okathi, aahikhalana axaarawe 14, aahaayara anamwane axilopwana 22 ni anamwane axithiyana 16.
22 Itthu sikina siiraneyale ni Abiya, miteko sawe ni moolumo awe, soolempwa eriyari ya ikomentaario sa profeta Ido.
Inoota
^ Eheeberi, “oothanliwa”.
^ Eheeberi, “nivarihano na maakha”.
^ Eheeberi, “Oothanliwa”.
^ Aahiiso, “saarukurenrye”.
