Wahala a Nenli 16:1-14
16 Eyaakha ya namiloko miraru ni thanu namosa ya olamulelo wa Asa, Bayexa mwene a wIsarayeli aahirowa otuphela oYuda, onapacerya olipiha muttetthe wa oRama, wiira ohikhale onkhuma nnakhala okela muttetthe wa Asa mwene a oYuda.
2 Asa aahikuxa eparatha ni eweero yaapwehiwe opuro waasukiwa mihakhu sa empa ya Yehova ni mihakhu sa empa ya mwene, onvahererya Beni-Hadadi mwene a oSiiria, yoowo aakhala oDamaasiko, oriki:
3 “Miyo ni nyuwo noopaka nivarihano, nave paapa aka ni paapa anyu yaahipaka nivarihano. Kinnooruuhelani eparatha ni eweero. Muhiye nivarihano mpanke anyu ni mwene Bayexa a wIsarayeli, wiira owo okhume muttetthe aka”.
4 Beni-Hadadi aahinwiriyana mwene Asa ni aahaaruma maxeefi a anakhotto orowa otuphela ipooma sa wIsarayeli. Awo yaahituphela wIyoni, oDani, wAbeli-Mayimi, ni ipooma sootheene sa arumasiya a oNefetali.
5 Okathi Bayexa aiwale awe eyo, moowaakuveya aahihiya muteko awe woolipiha oRama.
6 Mwene Asa aahaakuxa atthu ootheene a oYuda, wiira alovole maluku ni matera a oRama, yaawo Bayexa aatekana awe. Orumeelaka maluku awo ni matera awo, aahilipiha oXeeba ni oMisipa.
7 Okathi owo, Hanani, yoowo aasuwela otaphulela itthu ooniheriwe awe ni Muluku, aahirowa wa mwene Asa a oYuda, onamuhimeerya wiira: “Okhala wiira moomuroromela* mwene a oSiiria, ohiya omuroromela* Yehova Muluku anyu, anakhotto a mwene a oSiiria ahoopowa mmatatani mwanyu.
8 Atthu a wEthiyopia ni a oLibia yaahikhalana anakhotto oowaatta ni ikaaro sa ekhotto ni anakhavalo, kiira? Masi nyuwo mwaahimuroromela Yehova, tivo owo aahoovahereryani mmatatani mwanyu.
9 Maitho a Yehova anniweha oratteene elapo yootheene, wiira ooniherye owerya wawe aakhaliheryaka ale aniroromeleya wa yena ni murima aya wootheene. Masi nyuwo, okhala wiira moopaka etthu yeelolo, okhuma vano orowa ohoolo sinimookhumelelakani ikhotto”.
10 Masi, Asa aahiveeheya ni mulipa ole aasuwela otaphulela itthu ooniheriwe awe ni Muluku, nto aahimurihela mukhatteya, okhala wiira aahinanariwa vanceene nuuwo mwaha wa etthu ele. Okhuma okathi ole, Asa aahipacerya waahaaxa atthu akina.
11 Vano, yoowiiraneya ya Asa, okhuma woopaceryani mpakha wookiseryani, yoolempwa muliivuruni ya mamwene a oYuda ni a wIsarayeli.
12 Eyaakha ya namuloko miraru ni thanu naxexe ya olamulelo awe, Asa aahikhalana muxankiho ni metto sawe, nto aahiwereiwa vanceene. Hata owereiwaka siiso, owo khaamuroromenle Yehova, masi aaroromenle mameetiku.
13 Muhoolo mwaya, Asa aahirowa omumula ni amuhavinre awe, owo aakhwiiye eyaakha ya namiloko mixexe ni emosa ya olamulelo awe.
14 Vano, aahivithiwa mahiye maalupale aathipinhe awe epooma ya Davidi. Nave aahaataleliwa ekhaama yaasanrye makhura a baalsamu ni inamuna soovirikana sa itthu soowunkhela saatakaaheriwe ni eperfume yooreerexa. Nave-tho, waahipattihiwa mooro munceene omasikhoni wawe.*
Inoota
^ Eheeberi, “moolipana”.
^ Eheeberi, “khamulipanne”.
^ Woonasa wene, khonihimmwa opattihiwa mooro wira opahiwe murutthu wa Asa, masi onihimmwa opattihiwa mooro wira sipahiwe itthu sinceene.
