Wahala a Nenli 2:1-18
-
Olokiheriwa itthu para otekiwa etemplo (1-18)
2 Salomoni aahiruma otekiwa empa yaarowa okhalana nsina na Yehova ni epalaasio awe.
2 Salomoni aahaalepa alopwana 70.000 wiira akhale anamuteko,* 80.000 wiira apwexeke ni alokiheryeke maluku omiyaakoni, 3.600 wiira yaaweheryeke anamuteko awo.
3 Nave-tho Salomoni aahiruma oleeliwa Hirami mwene a oTiiro wiira: “Mukiirele etthu emosa-ru mmwiirenle anyu paapa aka, Davidi, okathi mwaamuroihenle anyu matera a eseeturu wiira oteke empa aarowa awe okhalaka.
4 Vano miyo kinteka empa enrowa okhalana nsina na Yehova Muluku aka, wiira oreeriheliwe yoowo, nipahiweke nsenso ohoolo wawe, nave-tho okathi wootheene sipwehiweke iphaawu sinivahiwa Muluku ni mikuttho soopahiwa, voosiisu ni makaaripi, iSaabadu, khula mweeri musya, nave okathi wa efesta ya Yehova, Muluku ahu. Ela ti etthu enirummwa aya Isarayeli opaka mahiku ootheene.
5 Empa enrowa aka oteka enrowa okhala yuulupale, okhala wiira Muluku ahu ti muulupalexa waavikana amuluku ootheene.
6 Ti pani oniwerya omutekela empa Muluku? Hata wiirimu, niire so, wiirimu wootheene khoniphiyerya okhala. Vano miyo ka pani wiira kimutekele empa? Etthu eniwerya aka opaka, omutekela opuro onivahiwa mukuttho ohoolo wawe.
7 Mukiruuhele mutthu onisuwela ovarihela muteko eweero, eparatha, ekoopiri, eyuuma, ekuwo ya ekoore violeeta, nliinya nooxeerya ni nliinya nooriipelela, ni onisuwela opattha ilatarato. Owo onrowa ovaraka oYuda ni oYerusalemu vamosa ni atthu aka anisuwela ovara muteko owo, yaawo athanliwe ni paapa aka Davidi.
8 Nave-tho mukiruuhele matera a eseeturu, a xuniiperu ni a sandalu, okhala wiira koosuwela oratteene wiira arumeyi anyu annisuwela saana wiikittha miri sa oLiibano. Arumeyi aka anrowa ovaraka vamosa ni arumeyi anyu,
9 wiira akilokiherye matera manceene, okhala wiira empa enrowa aka oteka ti yuulupalexa.
10 Eyoolya enrowa aka waavaha arumeyi anyu ni ale anrowa othukumanyaka matera ni wiikittha miri, tiila: ikooro* 20.000 sa etiriku, ikooro 20.000 sa esevaata, ipaathi* 20.000 sa eviinyu ni ipaathi 20.000 sa makhura”.
11 Vano, Hirami mwene a oTiiro aahimuroihela Salomoni epaphelo ela yaahimya wiira: “Mwaha woowi Yehova onnaaphenta atthu awe, ohookhalihani mwene aya”.
12 Moottharelana, Hirami aahihimya wiira: “Ottottopeliwe Yehova Muluku a atthu a Isarayeli, yoowo opanke erimu ni elapo, mwaha wa onvaha mwene Davidi mwaana a miruku, yoowo orina ankhili ni osuwela ni onrowa omutekela empa Yehova ni wiitekela epalaasio awe.
13 Vano miyo kinnooruhelani Hirami-Abi, yoowo onisuwela saana opattha ilatarato.
14 Owo mwaana a muthiyana a oDani, masi paapa awe aari mulopwana a oTiiro. Owo onnisuwela saana ovarihela muteko eweero, eparatha, ekoopiri, eyuuma, maluku, matera, ekuwo ya ekoore violeeta, nliinya nooripelela, etesiitu yooreera ni ekuwo yooxeerya. Onniwerya opaka khula muthinto wa ilatarato ni idesenyo onivahiwa awe. Nave onrowa ovaraka muteko vamosa ni atthu anyu anisuwela opattha ilatarato, hoothe ni atthu anisuwela opattha ilatarato a pwiyaka Davidi, paapa anyu.
15 Vano nyuwo pwiyaka, mwaaruuhele arumeyi anyu etiriku, esevaata, makhura, ni eviinyu ntoko muleihenrye anyu.
16 Hiyo nnimwiikittha miri sa oLiibano, moovarihana ni mwaattelo muniphavela anyu. Nuumala-vo, nnimooruuhelani nivirihaka mphareya ntoko ekalawa mpakha oYope. Nto munookuxa weiwo muroiheke oYerusalemu”.
17 Moottharelana Salomoni aahaakontari anamurwa ootheene yaakhala elapo ya wIsarayeli, ntoko iirale awe paapa awe, Davidi. Nto aahaaphwanya atthu 153.600.
18 Vano owo aahaathanla atthu 70.000 wiira akhale anamuteko,* 80.000 wiira apwexeke ni olokiherya maluku omiyaakoni, nave 3.600 wiira yaawehaweheke anamuteko.
Inoota
^ Aahiiso, “anaphwaatti”.
^ Ekooro emosa yaakhala iliituru 220. Munwehe Apendise B14.
^ Epaathi emosa yaakhala iliituru 22. Munwehe Apendise B14.
^ Aahiiso, “anaphwaatti”.
