Wahala a Nenli 22:1-12
22 Vano, atthu yaakhala oYerusalemu, yaahimukhaliha Akhaziya, mwaana mwaamukhaani a Yorami, mwene nipuro nawe, okhala wiira ekurupu ele ya alavilavi yaarwaale ni atthu a wArabia muttetthe ole, yaahiwiiva anamwane ootheene aalupale a Yorami. Siiso, Akhaziya, mwaana a Yorami, aahipacerya olamulela oYuda.
2 Akhaziya aarina iyaakha 22 okathi aakhanle awe mwene, nave aahilamulela mwaakha mmosa oYerusalemu. Maama awe aihaniwa Ataliya, musulwaawe* Omiri.
3 Nave-tho, owo aanitthara ephiro ya atthu a etthoko ya Akhabi, okhala wiira maama awe tanvaha miruku wiira opakeke itthu sootakhala.
4 Nave owo aanipaka itthu sootakhala vamaithoni va Yehova, ntoko yiira aya atthu a etthoko ya Akhabi, okhala wiira awo ti yanvaha miruku nuumala paapa awe okhwa, wiira opwetexiwe.
5 Owo aahitthara miruku saya, nave aahirowa ni Yorami mwaana a mwene Akhabi owana ni Hazayeli, mwene a oSiiria, oRamothi-Xileyaadi. Nto alipa yaavonya mattheere yaahinvulaliha Yorami.
6 Owo aahitthikela oYezireyeli, wiira apenuwe makhwatta aavulalihiwe awe, okathi aawana awe oRama ni mwene Hazayeli a oSiiria.
Akhaziya* mwaana a Yorami, mwene a oYuda aahirowa oYezireyeli omuxukurya Yorami mwaana a Akhabi, okhala wiira aahivulalihiwa.*
7 Masi Muluku aahimukumiherya maxakha Akhaziya mwaha woomuxukurya Yorami. Okathi aaphiyale awe, owo vamosa ni Yorami yaahirowa okumana ni Yehu, musulwaawe* Nimixi, yoowo aathanliwe ni Yehova wiira aamala-malihe atthu a etthoko ya Akhabi.
8 Okathi Yehu aapacenrye awe waamala-maliha atthu a etthoko ya Akhabi, aahaaphwanya makhulupale a oYuda ni anamwane a axinnawe Akhaziya, yaawo yaari arumeyi awe Akhaziya, owiivakasa.
9 Nuumala-vo, owo aahirowa omwaavya Akhaziya. Alopwana awe yaahimphwanya oSamariya weiwo aipinthe awe, nto yaahimukuxa amuroiha wa Yehu. Moottharelana, awo yaahimwiiva, anvitha okhala wiira yaanihimya wiira: “Ola musulwaawe Yosafati, yoowo amphavenle Yehova ni murima awe wootheene”. Nto khuuvo mutthu a etthoko ya Akhaziya aarina owerya wiira okhale mwene.
10 Okathi Ataliya, maama awe Akhaziya, aawenhe awe wiira mwanawe aahikhwa, owo aahiwiiva atthu ootheene a nloko na mamwene* a etthoko ya Yuda.
11 Masi, Yehoxabathi, mwaana mwaamuthiyana a mwene, aahimukuxa Yowasi mwaana a Akhaziya omukumiha eriyari ya anamwane a mwene yaarowa wiiviwa, omwiipithiha ekwaartu ya muhina ni murumeyi awe. Yehoxabathi mwaana mwaamuthiyana a mwene Yorami (aari mwaarawe namukuttho Yehoyada ni murokorawe Akhaziya), aahiwerya omwiipithiha mwaana owo wiira ohiiviwe ni Ataliya.
12 Mwaana owo aahikhala naawo iyaakha 6, iipithihiwe ene empa ya Muluku eekeekhai, okathi Ataliya aalamulela awe elapo eyo.
Inoota
^ Eheeberi, “mwaana mwaamuthiyana a”.
^ Soolempwa sikina sa eheeberi sinihimya wira “Azariya”.
^ Aahiiso, “anwereiwa”.
^ Eheeberi, “mwaana a”.
^ Eheeberi, “osuulu wootheene wa mamwene”.
