Wahala a Nenli 23:1-21
23 Eyaakha ya neethanu nenli, Yehoyada aahooniherya olipa murima ni aahipaka nivarihano ni maxeefi a atthu 100, eyo piiyo, Azariya mwaana a Yerohami, Iximayeli mwaana a Yehohanani, Azariya mwaana a Obede, Maaseya mwaana a Adaya ni Elixafati mwaana a Ziikiri.
2 Nuumala-vo, awo yaahirowa oYuda wootheene ni yaahaathukumanya alevi a ipooma sootheene sa oYuda ni ahooleli a imusi sa atthu a Isarayeli. Okathi yaaphiyale aya oYerusalemu,
3 muloko wootheene waahipaka nivarihano ni mwene mpaani mwa Muluku eekeekhai. Nuumala-vo, Yehoyada aahaaleela wiira:
“Mwiiwe! Mwaana a mwene onrowa olamulelaka, ntoko Yehova aaleihenrye awe aahimyaka anamwane a Davidi.
4 Etthu munrowa anyu opaka tiila: Munrowa okawana ikurupu tthaaru: ekurupu emosa ya anamukuttho ni alevi, enrowa ovaraka nihiku na esaabadu, enrowa okhala makwarta;
5 ekurupu ekina enrowa okhalaka empa ya mwene, ekurupu ekina enrowa okhalaka vamukhora wa alisenso, nave atthu ootheene anrowa okhalaka vanivateni na empa ya Yehova.
6 Muhimuhiye nnakhala mutthu mmosa okelaka empa ya Yehova, ahikhanle paahi anamukuttho ni alevi yaawo anivara muteko. Awo anookela empa eyo okhala wiira ekurupu ya atthu ooreerihiwa, nave atthu ootheene ahaana weettela ele Yehova oniruma awe.
7 Alevi ahaana omurukurerya mwene khula mpantta, khula mutthu okunxe ene ikaruma sawe sa ekhotto. Ole onrowa okela mpaani muhaana omwiiva. Mukhaleke ni mwene khula opuro onrowa awe”.*
8 Alevi ni atthu ootheene a oYuda, yaahiira siiso ntoko namukuttho Yehoyada aarumme awe. Khula mmosa aahaathukumanya alopwana awe, ale yaavara esaabadu ni ale yahaavara esaabadu, okhala wiira namukuttho Yehoyada khaamwanrye atthu a ikurupu iye saavara muteko.
9 Vano namukuttho Yehoyada aahaavaha maxeefi awo a atoropa 100 mavaka, iskuutu saamukhaani ni iskuutu soovilikeya saari sa mwene Davidi, saapwehiwe mpaani mwa Muluku eekeekhai.
10 Owo aahimuruma khula mutthu okhala opuro awe, khula mmosa okunxe ene ikaruma sawe sa ekhotto, okhuma moono woolopwana wa empa mpakha moono woothiyana wa empa, ohoolo wa altaari ni ohoolo wa empa, ootheene aya amurukurenrye ene mwene.
11 Moottharelana, awo yaahimukumiherya ota mwaana a mwene, anwariha ekhara, anvahererya eroolu yaarina nlamulo na Muluku. Nuumala-vo, yaahimukhaliha mwene, nave Yehoyada ni anaawe yaahimuthanla. Nto yaahihimya wiira: “Mwene okhaleke mahiku ootheene!”
12 Okathi Ataliya aiwale awe onyakula wa atthu yaatthimaka ni amuttottopelaka mwene, moowakuveya aahirowa mpaani mwa Yehova, opuro yaari aya atthu awo.
13 Vano, Ataliya aahimoona mwene eemenle ene waattamela epilaari awe, vamukhora. Makhulupale ni ale yoopa malope, yaari ni mwene, nave atthu ootheene yaanitteeliwa murima ni yaanoopa malope. Alipa-oowiipa yiira ekunxe ene ikaruma sa isipo yiipaka isipo. Siiso, Ataliya aahikhera ikuwo sawe onakhuwela oriki: “Koorukunuweliwa! Koorukunuweliwa!”
14 Namukuttho Yehoyada, aahaaruha maxeefi yaahoolela anakhotto 100, yaawo yaathanliwe wiira yaahooleleke anakhotto, oriki: “Mmukumihe muthiyana ole eriyari ya atoropa, akhala mutthu onimutthara, mmwiive ni espaata!”* Namukuttho owo aahihimya wiira: “Muhimwiive muthiyana owo mpaani mwa Yehova”.
15 Awo yaahinvara, nto okathi yaaphiyale aya empa ya mwene Vamukhora wa Ikhavalo, moowaakuveya yaahimwiiva weiwo.
16 Moottharelana, Yehoyada, aahimwiiriha mwene ni atthu ootheene, opaka nivarihano nuuwo, wiira atthu awo yaarowa okhalaka atthu a Yehova.
17 Nuumala-vo atthu ootheene yaahirowa empa* ya Bayaali, apwexakasa empa eyo, yaapwexakasa altaari, epwexakasa ilatarato sawe ni amwiiva Matani, namukuttho a Bayaali ohoolo wa altaari.
18 Yehoyada aahaapweha anamukuttho ni alevi, wiira awehaweheke empa ya Yehova, yaawo Davidi aathanlenle awe ikurupu wiira avareke muteko empa ya Yehova, anvahaka mukuttho woopahiwa Yehova, ntoko silempwale aya nlamulo na Moise, atteeliwe ene murima ni yiipaka isipo, siisaale yaalakiheriwa aya ni Davidi.
19 Nave-tho aahaapweha makwarta vamukhora wa empa ya Yehova, wiira ahimuhiye okelaka nnakhala mutthu mmosa aarina mwiikho.
20 Vano, owo aahaakuxa maxeefi yaahoolela anakhotto 100, atthu ootthaaciri, anamalamulela a atthu ni atthu ootheene a elapo ele, wiira amuhoole mwene okhuma empa ya Yehova arowaka empa ya mwene, aviraka ephiro ya mukhora muulupale. Nto yaahimukilaathiha mwene veehiceni ya omwene.
21 Siiso atthu ootheene a elapo ele yaahitteeliwa murima, nave epooma ele waahikhala murettele, okhala wiira Ataliya aahiiviwa ni espaata.
Inoota
^ Eheeberi, “okathi onkhuma awe ni okathi onkela awe”.
^ Aahiiso, “xoowa”.
^ Aahiiso, “etemplo”.
