Wahala a Nenli 24:1-27
24 Yowasi aarina iyaakha 7 okathi aakhalihiwe awe mwene. Owo aahilamulela iyaakha 40 oYerusalemu. Maama awe aihaniwa Zibiya, a oBeri-Xeba.
2 Mahiku ootheene a namukuttho Yehoyada, Yowasi aanipaka itthu sooloka vamaithoni va Yehova.
3 Yehoyada aahimuhaaverya axithiyana anli wiira akhale axaarawe. Nto owo aahaayara anamwane axilopwana ni axithiyana.
4 Muhoolo mwaya, Yowasi aahiphavela ni murima awe wootheene olokiha empa ya Yehova.
5 Nto owo aahaathukumanya anamukuttho ni alevi aahimeerya wiira: “Murowe ipooma sa oYuda ni mwaavekele musurukhu atthu ootheene a wIsarayeli wiira elokiheriweke empa ya Muluku anyu, khula eyaakha. Muhaana opaka eyo moowaakuveya”. Masi alevi, khiyaapanke eyo moowaakuveya.
6 Mwene aahimwiihana namukuttho muulupale Yehoyada onamukoha wiira: “Xeeni muhaavekenle anyu alevi wiira arowe oYuda ni oYerusalemu wiira aruuhe musurukhu wa mpoosito onivekeliwa ni Moise, murumeyi a Yehova ni musurukhu wa mpoosito onivekeliwa nloko na atthu a Isarayeli, wiira oroihiwe etenta* ya Onamoona?
7 Tthiri, anamwane a Ataliya, muthiyana yoowo ootakhala, yaahipwexa empa ya Muluku eekeekhai, arumeela mireerelo sootheene soowaarya saari sa Yehova wiira amukokhorele Bayaali”.
8 Siiso, etthariwaka yooruma ya mwene, yaahipakiwa ekoofiri, epwehiwa mpantta wa ota wa mukhora wa empa ya Yehova.
9 Nuumala-vo, yaahileeliwa atthu ootheene a oYuda ni oYerusalemu wiira amuroihele Yehova musurukhu wa mpoosito waavekeliwa ni Moise, murumeyi a Muluku eekeekhai, aarumme awe atthu a Isarayeli, woothakoni.
10 Makhulupale ootheene ni atthu ootheene yaahitteeliwa murima, nto yaaniruuha soovaha saya anarihela mukoofiri-mmo, mpakha osareya.*
11 Okathi alevi yaaroiha aya ekoofiri eyo wiira anvahererye mwene, anoona wiira waahikela musurukhu munceene mukoofirini-mme, sekretaario a mwene ni namakhaliherya a namukuttho muulupale, yaanirwa anakuxa musurukhu waari mukoofirini-mmo, nuumala-vo yaanittikiherya ekoofiri eyo opuro aya. Eyo ti etthu yaapaka aya khula nihiku, nto yaahithukumanya musurukhu munceene.
12 Moottharelana, mwene ni Yehoyada yaanaavahererya musurukhu owo ale yaaweherya muteko wooteka empa ya Yehova, nto awo yaanaavahererya ale yaapwexa ni olokiherya maluku ni ale yaavara muteko ni matera wiira alokiherye empa ya Yehova. Nave-tho, yaanaavahererya ale yaavara muteko ni eyuuma ni ekoopiri wiira alokiherye empa ya Yehova.
13 Ale yaaweherya muteko owo, yaahipacerya ovara muteko, nave muteko owo woolokiherya empa ya Muluku yaaweherya aya waanirowa ohoolo. Awo yaahilokiherya empa ya Muluku eekeekhai ntoko yaari aya woopaceryani ni yaahilipiha empa eyo.
14 Vaamanle aya muteko owo, yaahiruuha musurukhu waahanle anvahererya mwene ni Yehoyada, nto awo yaahirumeela musurukhu owo wiira apake mireerelo saarumeeliwa empa ya Yehova, mireerelo saavareliwa muteko, mireerelo para soovaha, ikoopho, ni mireerelo sa eweero ni sa eparatha. Vano awo yaanivaha mikuttho soopahiwa empa ya Yehova khula okathi mahiku a Yehoyada.
15 Yehoyada aahuuluvala ni aahihakalala ni iyaakha sinceene sa okumi awe, nuumala-vo, aahikhwa. Owo aarina iyaakha 130 okathi aakhwiiye awe.
16 Nto owo aahivithiwa epooma ya Davidi vamosa ni mamwene, okhala wiira aahipaka itthu sooreera wIsarayeli omuttittimihaka Muluku eekeekhai ni empa ya Muluku.
17 Nuumala Yehoyada okhwa, makhulupale a oYuda yaahirwa akokhora ohoolo wa mwene, nto mwene aahaawiriyana.
18 Awo yaahihiya empa ya Yehova Muluku a amuhavinre aya, anapacerya orumeela miri saakokhoreliwa* ni ilatarato, mpakha Muluku onanariwa ni atthu a oYuda ni a oYerusalemu mwaha wa yoottheka aya.
19 Muluku aanaaruma maprofeta eriyari aya wiira yaattikiherye wa Yehova, nto maprofeta awo yaanaalopola, masi awo yaanikhootta waawiriyana.
20 Munepa wa Muluku waahimukhuruwela Zakariya mwaana a namukuttho Yehoyada, nto owo aaheemela opuro woorakamela osulu ohoolo wa atthu, onaaleela wiira: “Enihimya awe Muluku eekeekhai tiila: ‘Xeeni munihonona anyu sooruma sa Yehova? Nyuwo khamunrowa weetta saana! Mwaha woomunyanyala Yehova, nave owo onimoonyanyalani’”.
21 Masi awo yaahimurukunuwela, nto attharaka yooruma ya mwene yaahinvonyakasa maluku vanivateni na empa ya Yehova.
22 Siiso mwene Yowasi khuupuwenle ophenta woororomeleya ooniheriwe awe ni paapa awe,* Yehoyada, omwiivaka mwanawe, yoowo okathi aakhwa awe aahimmye wiira: “Yehova owehe eyo ni ooliveeni”.
23 Woopaceryani wa eyaakha,* anakhotto a oSiiria yaahirwa owana ni Yowasi, atuphela oYuda ni oYerusalemu. Nto awo yaahaamala-maliha makhulupale ootheene a atthu, nave yaahimuroihela mireerelo saya sootheene mwene a oDamaasiko.
24 Nnaamwi anakhotto a oSiiria yaari vakhaani, Yehova aahaavahererya anakhotto anceene okhala wiira awo yaahimunyanyala Yehova Muluku a amuhavinre aya. Nto awo* yaahimuhukhumu Yowasi.
25 Okathi yaamuhiyale aya (awo yaamuhiyale ovulanle ene vanceene),* arumeyi awe yaahimurukunuwela okhala wiira aahiwiiva anamwane* a namukuttho Yehoyada. Arumeyi awe awo yaahimwiiva vakhaamani vawe. Siiso owo aahikhwa ovithiwa epooma ya Davidi, masi khaavithiwe mahiye yaavithiwa aya mamwene.
26 Atthu yaamurukunuwenle mwene yaari ala: Zabadi, mwaana a muthiyana a wAmoni aihaniwa Ximeyathi ni Yehozabadi mwaana a muthiyana a oMowabi aihaniwa Xiimiri.
27 Itthu sootheene sinaahimya anaawe, moolumo manceene aahimyaniwa awe ni olokiheriwa empa ya Muluku eekeekhai, soolempwa Muliivuruni ya Mamwene. Vano mwanawe, Amaziya, aahikhala mwene nipuro nawe.
Inoota
^ Aahiiso, “eheema”.
^ Aahiiso, woonasa wene: “mpakha atthu ootheene ovaha”.
^ Nwehe Moolumo Ootthokiheriwa.
^ Eyo piiyo, paapa awe Zakariya.
^ Eheeberi, “Nuumala otuphela mwaakha”.
^ Eyo piiyo, atthu a oSiiria.
^ Aahiiso, “orina ene iretta sinceene”.
^ Aahiiso, “mwaana”. Woonasa wene, yaahimmwaka anamwane, onooniherya ottittimihiwa.
