Wahala a Nenli 31:1-21
31 Vaamanle aya itthu iya sootheene, aisarayeli ootheene yaari opuro ole yaahirowa ipooma sa oYuda, apwexakasa ipilaari saakokhoreliwa, yiikittha miri saakokhoreliwa* ni apwexakasa mapuro oorakamela osulu yaakokhoreliwa amuluku eethiru ni altaari a oYuda wootheene ni oBeniyamini, vamosa ni wEfrayimi ni oManase, mpakha omala-maliha itthu iyo sootheene. Nuumala-vo, aisarayeli yaahitthikela ipooma saya, khula mutthu opuro aakhala awe.
2 Moottharelana, Ezekiya aahipaka ikurupu sa anamukuttho ni ikurupu sa alevi, wiira avareke miteko saya. Awo yaanivaha mikuttho soopahiwa ni mikuttho sa opatthani. Nave yaanivara muteko, amuxukhurelaka ni amuttottopelaka Muluku vamukhora wa nivate na Yehova.
3 Mwene aahivaha mpantta mmosa wa mireerelo sawe wiira sivahiweke mikuttho soopahiwa, ohela muhina soovaha sa voosiisu ni sa makaaripi, mikuttho soopahiwa sa khula esaabadu, khula mweeri musya ni mikuttho sa ifesta, moovarihana ni ele elempwale Nlamulo na Yehova.
4 Nave-tho, owo aahaaruma atthu yaakhala oYerusalemu waavaha mpantta yaaphwanela aya anamukuttho ni alevi. Owo aahipaka eyo okhala wiira aaphavela wiira anamukuttho ni alevi avareke oratteene muteko aya ntoko nlamulo na Yehova naahimya aya.
5 Amalaka-ru wiiwa yooruma ela, aisarayeli yaahiruuha mihokorokho sinceene soopacerya, eviinyu ya niinaano, makhura, oravo ni mireerelo sootheene sa mmatta. Awo yaahiruuha mpantta wa namuloko wa itthu sinceene.
6 Atthu a wIsarayeli ni a oYuda yaakhala ipooma sa oYuda, nave yaahiruuha mpantta wa namuloko wa ipooyi ni ipwittipwitthi ni mpantta wa namuloko wa itthu soowaarya, seiyo saareeriheliwe Yehova, Muluku aya. Siiso awo yaahithukumanya mireerelo sinceene saavahiwe.
7 Mweeri wa neeraru yaahipacerya othukumanya itthu saavahiwa, nto mweeri wa neethanu nenli yaahimaliha othukumanya itthu iyo.
8 Okathi Ezekiya ni makhulupale yaaphiyale aya, aweha itthu iye saathukumanyiwe, yaahimuttottopela Yehova ni yaahaareeliha atthu awe, aisarayeli.
9 Ezekiya aahaakoha anamukuttho ni alevi itthu iye saathukumanyiwe,
10 nto namukuttho muulupale Azariya, a etthoko ya Sadoki, aahimuhimeerya wiira: “Okhuma nihiku atthu apacenrye aya ovaha itthu iya empa ya Yehova, atthu annoolya mpakha ovona, nto sinnihala itthu iya soowaatta, okhala wiira Yehova onnaareeliha atthu awe. Tivo sinihala aya itthu iya soowaatta”.
11 Siiso, Ezekiya aahaaruma wiira yaalokiherye arumasiya a empa ya Yehova, nto awo yaahaalokiherya.
12 Nlelo saaniruuhiwa soovaha, ipantta sa namuloko ni itthu soowaarya. Vano, mulevi Konaniya taaweherya itthu iyo sootheene, nave munnawe, Ximeyi, taamukhaliherya.
13 Yehiyeli, Azaziya, Nahathi, Asaheli, Yerimothi, Yozabadi, Eliyeli, Iximakiya, Mahathi ni Benaya ti yaamukhaliherya Konaniya ni munnawe, Ximeyi, ntoko yaarummwale aya ni mwene Ezekiya. Vano Azariya, taaweherya empa ya Muluku eekeekhai.
14 Kore, mwaana a Imina, kwarta mulevi aakhala vamukhora wa mpantta onikhuma nsuwa, taaweherya itthu saavahiwa Muluku eekeekhai. Nto owo aanaakawela anamukuttho itthu saavahiwa Yehova ni itthu soowaaryaxa.
15 Owo aakhaliheriwa ni Eedeni, Miniyamini, Yexuwa, Xemaya, Amariya ni Xekaniya, yaawo yaakhala ipooma sa anamukuttho. Awo yaahiroromeliwa waakawela itthu simosa-ru axinnaya ni ikurupu saya, akhale aalupale wala acikhaani.
16 Ohiya soovaha iya, saahikhala itthu yaavahiwa alopwana yaarwa khula nihiku ovara muteko empa ya Yehova ni ovara miteko sa ikurupu saya. Elista ya masina aya yaahela muhina axilopwana yaarina iyaakha tthaaru orowa ohoolo.
17 Elista ya masina a anamukuttho yaapakiwe moovarihana ni imusi saya, ntoko yaari aya ya alevi yaawo yaarina iyaakha 20 orowa ohoolo, moovarihana ni miteko sa ikurupu saya.
18 Elista ya masina aya yaahela muhina anaaya ootheene, axaaraya, anaaya axilopwana, anaaya axithiyana ni muloko aya wootheene, okhala wiira awo yaanireeriheliwa itthu soowaarya, maana waari muteko yaaroromeliwe aya.
19 Nave-tho yaahela muhina osuulu wa Aroni, anamukuttho yaakhala mapuro saakukhuliwa inama saarukurenrye ipooma saya. Ipooma sootheene, alopwana yaahithanliwa masina aya wiira yaavaheke itthu axilopwana ootheene a imusi sa anamukuttho ni alevi ootheene yaalempwale masina aya.
20 Ezekiya aahipaka etthu ela oYuda wootheene, nave khaahiyale opaka itthu sooloka ni sookhalela, ni ororomeleya ohoolo wa Yehova Muluku awe.
21 Muteko wootheene aavanre awe wiira omurumeele Muluku awe, okhale muteko waavarihana ni empa ya Muluku eekeekhai, aahiiso waavarihana ni Nlamulo ni sooruma, aapanke ni murima awe wootheene, nto itthu saahimweettela saana.
Inoota
^ Nwehe Moolumo Ootthokiheriwa.
