aFilipi 4:1-23
4 Tivonto, axinnaka, miyo kinnoophentani ni kihinkheliwa ni nyuwo. Otteeliwa waka murima ni etthuvo* aka, ti nyuwo. Mwiilipiherye weetta siisa mwa Apwiya.
2 Kinnimutumererya Evodia ni Sintikhe okhalana muupuwelo mmosa-ru, onivarihana ni Apwiya.
3 Ni nyuwo-tho, mpatthani aka oororomeleya kinvarana aka muteko, kinnoovekelani wira muhihiye waakhaliherya axithiyana awo. Tthiri awo, vamosa ni Klementi ni akina, anniimananiha* olaleya ihapari sooreera ni miyo. Masina a atthu awo otheene, aalempwa muliivuruni mwa okumi.
4 Okathi wotheene, mutteeliweke murima mwa Apwiya. Kinoohimya-tho wira: Mutteeliweke murima!
5 Waathokorerya wanyu akina, osuweliweke ni atthu otheene. Apwiya ari vakhiviru.
6 Muhixankeke ni khula etthu, masi mwa itthu sotheene, munvekeleke ni omuxonttela Muluku, vamosa ni omuxukhurela, mmusuwelihaka itthu muniveka anyu.
7 Siiso, murettele wa Muluku, yoowo onvikana osuwela wotheene wa apinaatamu, onoosuka mirima sanyu ni miyuupuwelo sanyu, mwa Kristu Yesu.
8 Nto, axinnaka, muhihiye othokorerya* itthu sotheene siri seekeekhai ni sirina efaita yuulupale; sotheene siri sa xariya ni sooloka; sotheene siri soophenteya ni soottittimiheya; sotheene siri sookhalela ni soottottopeleya.
9 Mpakeke itthu mwiixuttale anyu ni miyo, ni mweemerenrye anyu, nave-tho iye mukiiwale anyu ni moonale anyu kivaraka. Nto Muluku a murettele, onookhala ni nyuwo.
10 Ntoko murumeyi a Pwiya, kootteeliwa murima vanceene okhala wira mootthikela wooniherya wira munnikuupuwela. Khahiyo wira mwaarookiliyala, masi mwaha woowi khimwaarina eparakha ya okikhaliherya.
11 Khahiyo ovelavela onkiiriha olavula siiso, maana kihiixutta ohakalala ni makhalelo aka.
12 Miyo kinnisuwela okhalana itthu vakhaani ni soowaatta. Okathi wotheene ni itthu sotheene, kihiixutta esiiri ya okhalana yoolya ni ovoliwa etala, okhalana itthu sinceene ni othoiwa.
13 Tthiri, kinniwerya sotheene mwaha wa ole onkivaha ikuru.
14 Masi, muhiira saana okikhaliherya moohaawani mwaka.
15 Mweekeekhai, nyuwo afilipi moosuwela wira nuumala wiiwa ihapari sooreera ekwaha yoopacerya, okathi kaakhuma aka oMasedonia, khuuvo muloko mukina okikhalihenrye. Nyuwo paahi mphavenle okawana soovaha ni soowaakhela.
16 Okathi kaari aka oTesaloonika, mwaahikiruuhela itthu saakithowa, ohiya vamosa, masi vanli.
17 Khahiyo wira kiniphavela otthuveliwa, masi kiniphavela mihokorokho sinincererya muhakhu* anyu.
18 Vano, kookhalana voowaatta itthu sotheene sinikithowa, maana Epafrodito ookiruuhela soovaha sanyu. Iyo siri ntoko yoovaha yoowunkhela ni mukuttho wooloka onimusivela Muluku.
19 Tivonto, Muluku aka, onimoovahani itthu sotheene sinoothowani, ottharihelaka mihakhu sawe soovuwa mwa Kristu Yesu.
20 Nto Muluku, Tiithi ihu, ovuwihiwe mahiku otheene ni voohimala. Amen.
21 Mwa nsina na Kristu Yesu, mwaavahe makhomaso aka otheene ale oororomeleya.* Axinna ari ni miyo, annookhomasani.
22 Otheene ale oororomeleya,* vanceenexa ale a etthoko ya Seesari, annookhomasani.
23 Oreera murima wuulupale wa Pwiya Yesu Kristu, okhale ni nyuwo mwaha wa oreera wanyu murima.
Inoota
^ Ekereku, “ekhara”.
^ Aahiiso, “anniwanela”.
^ Aahiiso, “wuupuwelela”.
^ Eyo piiyo, muhakhu womunepani.
^ Ekereku, “ale oowaarya”.
^ Ekereku, “ale oowaarya”.
