aHeeberi 2:1-18
2 Tivo, nihaana otepa ovaha ephoole itthu niiwale ahu, wira nihikhala-khale nihiyaka waamini.
2 Vakhala wira nuulumo naalavuliwe arumeeliwaka malaikha naahiiraneya tthiri, ni khula mutthu onipaka etampi ni ohiniiwelela ohaakhela ehukhumu mwa xariya,
3 nto ninrowa woopowa sai ohukhummwa, nakhootta ehapari enihimya etthu Muluku opanke awe wira onoopole? Pwiya ahu topacenrye olavula ehapari eyo, nto atthu yiiwale ehapari eyo, aanileela.
4 Nave, Muluku ohooniherya wira etthu ahimmye aya ekeekhai,* ovahaka ithoonyeryo, ovaraka miteko sootikiniha ni miiriirya soovirikana. Nave-tho, ookawa munepa woowaarya, ntoko ophavenle awe.
5 Mweekeekhai, Muluku khorumme malaikha wira elamuleleke elapo enirwa, yeeyo enilavula ahu.
6 Mutthu mmosa aakhalenle onamoona, aahimmye so: “Mutthu ti pani wira mmuupuweleke, aahiiso mwaana a mutthu ti pani wira mmukhapeleleke?
7 Nyuwo moomukhaliha mwaamukhaani ovikana malaikha. Monvaha ovuwa ni nttittimiho, wira okhapeleleke itthu sotheene mpanke anyu.
8 Nyuwo mookhaliha itthu sotheene vathi va inawu sawe”. Okathi aamweemerenrye awe olamulela itthu sotheene, khiivo etthu Muluku aahiyale awe ehilamuleliwaka ni Yesu. Hata vari siiso, nlelo khanninweha Yesu olamulelaka itthu sotheene.
9 Masi ninninweha Yesu, yoowo aakhalihiwe mwaamukhaani ovikana malaikha. Yesu owo, vano oovahiwa ovuwa ni nttittimiho, mwaha wa ohaawa mpakha okhwa. Siiso, mwaha wa oreera murima wuulupale wa Muluku, owo ohookhwa mwaha wa atthu otheene.
10 Itthu sotheene sookhalihiwa wira sinvuwiheke Muluku, nave iyo sinnikhala mwaha wa yoowo. Tivonto, wira anamwane anceene yaakhele ovuwa, vaanireerela wira Murumeyi Muulupale okhalihiwe oomalela, ohaawaka. Muluku onniwoopola omurumeelaka Murumeyi ola Muulupale.
11 Yesu vamosa ni ale aakhalinhe awe oowaarya, otheene aya arina tiithi mmosa-ru. Tivonto ohinuuleliwa awe muru owiirela “axinnawe”,
12 ohimyaka wira: “Kinimwaasuweliha nsina nanyu axinnaka. Eriyari ya muloko, kinrowa woottottopelani ni masipo”.
13 Nave-tho onnihimya wira: “Miyo kinoomuroromela yoowo”. Onnihimya-tho wira: “Mukooneke! Miyo kiri-va ni anamwane, yaawo Yehova okivahale awe”.
14 Tivo, okhala wira “anamwane” awo atthu arina ephome ni erutthu, siiso-tho, owo aahikhala mutthu aarina ephome ni erutthu, wira mwaha wa okhwa wawe, ommala-malihe ole orina owerya wa okumiherya okhwa, eyo piiyo, Diabo,
15 nave wira aataphule otheene ale yaari ipottha okumi aya wotheene, mwaha wa woova okhwa.
16 Mweekeekhai, owo khonikhaliherya malaikha, masi onikhaliherya osuulu* wa Abrahamu.
17 Siiso, owo aahiilikanyiha ni “axinnawe” mwa itthu sotheene. Aahipaka eyo wira okhale namukuttho muulupale oomoriwa ikharari ni oororomeleya, onivara muteko wa Muluku. Nto anwerya ovaha mukuttho wa oleveleliwa itampi sa atthu,* ni owiiriha atthu awo okhala ni murettele ni Muluku.
18 Okhala wira owo aahihaawa okathi eehereriwa awe, nto onoowerya waakhaliherya ale aneehereriwa.
Inoota
^ Aahiiso, “ookhalela onamoona”.
^ Ekereku, “mmiso”.
^ Aahiiso, “mukuttho wira atthu yeemereriwe ni Muluku”.
