aRoma 4:1-25
4 Nihimye exeeni sa muhavinre ahu Abrahamu?
2 Vaakhanle wira Abrahamu aahithokoreriwa okhala naxariya mwaha wa etthu aapanke awe, owo aamukhalana mathowa oowiittottopa, masi ohiya ohoolo wa Muluku.
3 Yoolepa enihimya exeeni? Enihimya wira: “Abrahamu aahimwaamini Yehova, nto owo aahithokoreriwa okhala naxariya”.
4 Akhala wira mutthu onivara muteko onniliviwa, khonliviwa mwaha wa oreera murima wuulupale wa patarau awe, owo oniliviwa mwaha woowi onniphwanelela.
5 Masi okathi mutthu onimwaamini awe Muluku, ohilipanaka miteko paahi, Muluku onnimuthokorerya mutthu owo okhala naxariya mwaha wa waamini wawe. Muluku tonaathokorerya anatampi okhala anaxariya.
6 Eyo ti etthu Davidi aahimmye awe wira mutthu onithokoreriwa okhala naxariya ni Muluku, ohikhanle mwaha wa miteko sawe, mutthu owo onnihakalala. Davidi aahimmye wira:
7 “Oohakalala taale aleveleliwe miteko saya sootakhala, ni siliyaliwe* itampi saya.
8 Oohakalala tuule Yehova ohinikontari awe etampi awe”.
9 Niireke anihakalala paahi taale oowinnuwihiwa? Wala, ale oohinnuwihiwa nave annihakalala? Hiyo noohimya wira: “Waamini wa Abrahamu, waahithokoreriwa okhala exariya”.
10 Nto, okathi xeeni waamini wawe waathokoreriwe aya okhala exariya? Niireke iira innuwihiwe ene, aahiiso ohinatthi winnuwihiwa? Owo iira ohinatthi winnuwihiwa.
11 Nave, owo aahaakhela esinaale, eyo piiyo, winnuwihiwa. Vano winnuwihiwa iwo waari ntoko ekanyeryo ya* exariya, mwaha wa waamini aarina awe ohinatthi winnuwihiwa. Eyo ehiiraneya, wira Abrahamu okhale tiithi a atthu otheene oowaamini, yaawo nlelo ahinnuwihiwe. Siiso, awo anoothokoreriwa okhala anaxariya.
12 Tivo, Abrahamu tori tiithi a atthu otheene oowinnuwihiwa, nave khahiyo atthu oowinnuwihiwa paahi, masi-tho naale anitthara ephiro yowaamini, yeeyo tiithi ihu Abrahamu aatthanre awe ohinatthi winnuwihiwa.
13 Veekeekhai, Abrahamu aahiiso osuulu* awe khiyaaleiheriwe waakhela olumwenku mwaha wa weettela nlamulo, masi yaaleiheriwe mwaha wa okhalana exariya enrwa mwaha wowaamini.
14 Vaakhanle wira atthu yaarowa waakhela itthu saaleiheriwe mwaha wa weettela Nlamulo, weeso waamini khiwaarowa okhalana efaita, nave ele yaaleiheriwe awe Abrahamu, yaarowa okhala ethiru.
15 Mweekeekhai, Nlamulo ninnikumiherya oviruwa wa Muluku, masi naahikhale nlamulo, khivaniweryaneya otthekela nlamulo nlo.
16 Abrahamu aahaakhela ele yaaleiheriwe awe mwaha wa waamini wawe. Eyo ehiiraneya mwaha wa oreera murima wuulupale wa Muluku. Siiso, osuulu* awe wotheene onoophwanya tthiri ele yaaleiheriwe, ohiya paahi ale aneettela Nlamulo, masi-tho ale anitthara waamini wa Abrahamu, yoowo ori tiithi a atthu otheene.
17 (Ti siiso sinihimya aya Soolempwa wira: “Miyo kihoothanlani wira mukhale tiithi a maloko manceene”.) Abrahamu aahooniherya waamini iwo ohoolo wa Muluku, yoowo onaahihimuxa alipa-ookhwa ni onilavula itthu nlelo sihiiraneyale, sinakhala ntoko sihiiraneya.*
18 Abrahamu khaalipelela waayara anamwane. Masi mwaha wa nlipelelo aarina awe, owo aanaamini wira aamukhala tiithi a maloko manceene, ntoko Muluku aahimmye awe oriki: “Osuulu* anyu onrowa waatta siisa”.
19 Nnaamwi waamini wawe wahaavukunwe, Abrahamu aanisuwela wira khaawerya waayara anamwane (okhala wira aarina iyaakha soowiiraka 100). Nave-tho, aanisuwela wira Sara khaawerya oyara, mwaha woowi aahitepa wuuluvala.
20 Masi mwaha wa ele Muluku aamuleihenrye awe, owo khaahoverya aahiiso khaahiyale waamini. Ohiya-vo, waamini wawe waahimulipiha, ni aahinvuwiha Muluku.
21 Nave, owo aanikupali tthiri wira Muluku aarowa opaka ele aaleihenrye awe.
22 Tivonto, mwaha wa waamini wawe “owo aahithokoreriwa okhala naxariya”.
23 Masi, moolumo oowi “aahithokoreriwa okhala”, khiyaalepeliwe Abrahamu paahi.
24 Moolumo awo, noolepeliwa-tho hiyo, okhala wira nnoothokoreriwa okhala anaxariya mwaha wa omwaamini Muluku, yoowo omuhihimunxe Yesu Pwiya ahu, mookhwaani.
25 Owo oovahereriwa wira okhwe mwaha wa itampi sahu, nave oohihimuxiwa wira onihimye okhala anaxariya.
Inoota
^ Aahiiso, “sikhuneeliwe”.
^ Aahiiso, “nlipiheryo na”.
^ Ekereku, “mmiso”.
^ Ekereku, “mmiso”.
^ Aahiiso, woonasa wene: “onnikhaliha itthu sihikhanle”.
^ Ekereku, “mmiso”.
