aRoma 6:1-23
6 Vano, nihimye exeeni? Niireke nihaana othipelela opaka etampi wira oreera murima wuulupale wa Muluku otepeke wuncerereya?
2 Nnaari! Hiyo khanneettihiwa-tho ni etampi,* nto ninwerya sai othipelela okhala mutampini?
3 Aahiiso, khamunsuwela wira otheene ahu nipatisiwe mwa Kristu Yesu, noopatisiwa mookhwaani mwawe?
4 Siiso, noovithiwa vamosa nuuwo, okhala wira naapatisiwe wira nikhale nuuwo mookhwaani mwawe. Eyo ehiiraneya wira hiyo-tho nikhalane okumi musya, siisaale Kristu orina awe okumi musya, yoowo Tiithi omuhihimunxe awe orumeelaka owerya wawe.
5 Okhala wira nihiiraana nuuwo, maana nihookhwa ntoko owo, siiso, nihiiraana nuuwo, okhala wira noohihimuxiwa ntoko owo.
6 Noosuwela wira omutthu ahu wa khalai, wookhomeliwa vamwirini vamosa nuuwo, wira okumihiwe owerya wa etampi mweerutthuni mwahu, wira nihikhale-tho ipottha sa etampi.
7 Tthiri, ole okhwiiye ooleveleliwa* itampi sawe.
8 Nave-tho, vakhala wira nihookhwa ni Kristu, ninnikupali wira nnookhala-tho akumi nuuwo.
9 Noosuwela wira vano Kristu ohihimuxiwe awe mookhwaani, khonikhala-khala okhwaaka. Okhwa khoninwerya-tho.*
10 Owo ohookhwa ekwaha emosa paahi wira omalihe etampi, nave khonitthikela-tho okhwa. Masi okumi orina awe vano, onikhalela opaka ele Muluku oniphavela awe.
11 Vamosa-ru, mwiixooneke okhala atthu ookhwa ahinivara etampi, nave-tho mwiixooneke okhala akumi wira mpakeke ele Muluku oniphavela awe, ntoko atthu animutthara Kristu Yesu.
12 Tivo, muhihiye etampi yeettihaka okumi anyu. Muhiiweleleke itthu siniphavela irutthu sanyu, seiyo sinrowa okhwa.
13 Muhivahereryeke erutthu anyu etampi, wira epakeke itthu soohiloka. Ohiya-vo, muhele okumi anyu mmatatani mwa Muluku, ntoko atthu ahihimuxiwe mookhwaani. Muhele erutthu anyu mmatatani mwa Muluku, wira mpakeke itthu sooreera.
14 Nyuwo khamuneettihiwa-tho ni malamulo, masi muhaakhela oreera murima wuulupale wa Muluku, siiso etampi khenoolamulelani-tho ntoko pwiya anyu.
15 Nto nihimye exeeni? Niireke nnoopaka etampi, nihimyaka wira khanneettihiwa-tho ni malamulo, masi nihaakhela oreera murima wuulupale wa Muluku? Nnaari, vahikhale siiso!
16 Niireke khamunisuwela? Vakhala wira munniivahererya ntoko ipottha wira mmwiiweleleke mutthu, nyuwo munnikhala ipottha sa mutthu owo, okhala wira munnimwiiwelela. Niire so, nyuwo mwa ipottha sa etampi eniphwanyiha okhwa, aahiiso mwa ipottha sa wiiwelela oniphwanyiha exariya.
17 Vano nimuxukhureleke Muluku. Khalai mwaari ipottha sa etampi, masi vano munniiwelela ni murima wotheene mwiixuttiho Muluku oovanhaaweni.
18 Tthiri, okhala wira mootaphuliwa okhala ipottha sa etampi, mookhalihiwa ipottha sa Muluku, nto mpakeke itthu sooloka.
19 Masi mwaha wa otteettheya wa erutthu anyu, kinnilavula ni nyuwo kirumeelaka moolumo anisuweliwa ni apinaatamu. Ntoko epottha, nyuwo moovahererya irutthu sanyu miteko soonanara ni miteko sootakhala wira nvareke itthu sootakhala. Masi vano, nvahererye irutthu sanyu itthu sa xariya, wira nvareke itthu soowaarya.
20 Okathi mwaari anyu ipottha sa etampi, nyuwo khimwaakhanyereriwa opaka itthu sooloka.
21 Soowiira sanyu sa okathi ole, saakumihenrye exeeni? Saakumihenrye itthu siniwuulihani muru vano. Tthiri, itthu iyo sinniroiha wookhwaani.
22 Vano mutaphuliwe anyu etampi, mpakeke itthu soowaarya ntoko ipottha sa Muluku. Eyo enimoophwanyihani okumi woohimala.
23 Tthiri, etampi eniliviwa ni okhwa. Masi etthu Muluku onivaha awe, ti okumi woohimala mwa Kristu Yesu, Pwiya ahu.
Inoota
^ Ekereku, “nihookhwa voohimya sa etampi”.
^ Aahiiso, “ohoopoliwa”.
^ Ekereku, “khahiyo-tho pwiya awe”.
