Esteeri 9:1-32
9 Nihiku 13 na mweeri wa namuloko ni piili, eyo piiyo, mweeri wa Adari,* okathi yooruma ya mwene ni nlamulo naarowa aya otthariwaka, nihiku awanani a ayuda yaalipelela aya waawerya, yaahiiraneya etthu ekina: ayuda ti yaawenrye awanani aya.
2 Ayuda yaahithukumana ipooma saya, iprovinsia sootheene sa mwene Asuwero, wiira yaatuphele ale yaarowa ophavela owiiriha etthu yootakhala. Nto khuuvo aawenrye okhala wiira atthu ootheene yaanoova vanceene.
3 Makhulupale ootheene a iprovinsia, masaatrapa, makuvernatoro ni ale yaakhapelela anakoso a mwene yaahaakhaliherya ayuda, okhala wiira yaanimoova Mordekayi.
4 Mordekayi aahikhala oowerya etthoko ya mwene,* nave ovuwa wawe waahimwareela iprovinsia sootheene, okhala wiira khula okathi aanikhala oowerya.
5 Ayuda yaahaatuphela ni espaata awanani aya ootheene, yaahiwiiva ni yaahaapwetexa. Yaahiwiiriha awanani aya khula etthu yaaphavela aya.
6 Nave opuro woolipihiwa wa oSusa ayuda yaahiwiiva ni yaahaapwetexa alopwana 500.
7 Nave yaahimwiiva Parixandata, Dalifoni, Asipata,
8 Porata, Adaliya, Aridata,
9 Parimaxata, Arisayi, Aridayi ni Vayizata,
10 anamwane 10 a Hamani mwaana a Hamedata, nwanani a ayuda. Masi nuumala owiiva, awo khiyaakunxe mireerelo saya.
11 Nihiku nenle, mwene aahileeliwa nummuru na atthu yaiviwe opuro woolipihiwa wa oSusa.
12 Mwene aahimuhimeerya pwiyamwene Esteeri wiira: “Opuro woolipihiwa wa oSusa ayuda aawiiva ni ahaamala-maliha alopwana 500 ni anamwane 10 a Hamani. Vano, exeeni epakinwe iprovinsia sikina sa mwene? Exeeni muniphavela anyu? Miyo kinimoovahani. Muniphavela oveka exeeni? Munoovahiwa”.
13 Esteeri aahaakhula wiira: “Mwene oona oreerela, eemererye wiira ayuda yaawo ankhala oSusa awiive awanani aya meelo, ntoko yiirale aya olelo, ni yaathomeye anamwane 10 a Hamani vamwirini”.
14 Vano mwene aahiruma wiiriwa siiso. Nave naahilaleiwa nlamulo oSusa, nto anamwane 10 a Hamani yaahithomeiwa.
15 Ayuda yaakhala oSusa yaahithukumana-tho nihiku 14 na mweeri wa Adari awiiva alopwana 300 oSusa, masi khiyaakunxe mireerelo saya.
16 Ayuda akina, yaawo yaakhala iprovinsia sa mwene, nave-tho yaahithukumana ni yaahoopola ikumi saya. Awo yaahaatthyawa awanani aya, nave yaahiwiiva atthu 75.000 yaawo yaanyokha, masi khiyaakunxe mireerelo saya.
17 Eyo yiiraneyale nihiku 13 na mweeri wa Adari, nto atthu yaahimumula nihiku 14 nave yaahikhaliha nihiku nlo, nihiku na efesta ni na otteeliwa murima.
18 Ayuda yaakhala oSusa, yaahithukumana nihiku 13 ni nihiku 14 na mweeri wa Adari. Vano nihiku 15 yaahimumula, nave yaahikhaliha nihiku nlo, nihiku na efesta ni na otteeliwa murima.
19 Tivo ayuda yaakhala ipooma sikina, yaahiiriha nihiku nle 14 na mweeri wa Adari nenlo naari nihiku na otteeliwa murima, na ifesta ni na otthapa, wiira nikhale nihiku na oroihelana yoolya.
20 Mordekayi aahilepa itthu iyo siiraneyale, aaroihela ikarta iyo ayuda ootheene yaakhala iprovinsia sootheene sa mwene Asuwero, ale yaakhala vakhiviru ni ale yaakhala ottaiwene.
21 Mordekayi aahaaruma atthu awo wiira yuupuweleke nihiku 14 na mweeri wa Adari, vamosa ni nihiku 15, khula mwaakha,
22 okhala wiira mahiku awo, ayuda yaahimumula ohaaxiwa ni awanani aya, nave mweeri owo oriipiwa waya murima waahikhalihiwa otteeliwa murima, nave wunla waya waahikhalihiwa nihiku nootthapa. Awo yaahaana wuupuwela mahiku awo ntoko mahiku a efesta, otteeliwa murima, okathi wooroihelana yoolya ni waavaha itthu alipa-oohaawa.
23 Nave ayuda yaaheemererya ohihiya otthapa yaapacenrye aya, ni opaka ele Mordekayi aalepenle awe.
24 Tthiri Hamani mwaana a Hamedata, a wAgagi, yoowo aanyokha ayuda ootheene, aahilakela waapwetexa ayuda ni aahinvonya puri, eyo piiyo, esorti, wiira owoopopihe ni aapwetexe.
25 Masi okathi Esteeri aaronwe awe ohoolo wa mwene, mwene aahiruma olempwa wiira: “Palano awe ootakhala aapakenle awe ayuda, ommorele yena”. Nto Hamani vamosa ni anaawe yaahithomeiwa vamwirini.
26 Tivo mahiku ale yaahivahiwa nsina noowi Puriimi nenlo ninkhuma nuulumo noowi puri.* Siiso mwaha wa itthu sootheene saalempwale mukartani, itthu yoonale aya ni itthu saawiiranenle,
27 ayuda yaahoona wiira awo, osuulu aya, ni atthu ootheene yaatakaahanne naawo, yaahaana otthapela mahiku awo manli ni weettela itthu saalempwale saahimyaka yaawo, okathi waathanliwe, khula mwaakha.
28 Mahiku awo yaahaana wuupuweleliwa ni otthapeliwa ni maloko ootheene, moovarihana ni khula emusi, khula eprovinsia ni khula epooma. Ayuda khiyaakhanle oohiyererya otthapela mahiku a Puriimi, nave osuulu aya khiwaakhanle oomala-maliha wuupuweleliwa mahiku awo.
29 Muhoolo mwaya, pwiyamwene Esteeri, mwaana a Abihayili, vamosa ni Mordekayi muyuda, yaahilepa ikarta saalavula sa mahiku a Puriimi, yeemereryaka ni okhulupale aya wootheene.
30 Ikarta iyo yaahiroiheliwa ayuda ootheene yaari iprovinsia 127 saalamuleliwa ni mwene Asuwero, ni moolumo a murettele ni eekeekhai,
31 seemereryaka wiira yaahaana otthapela mahiku a Puriimi, okathi waathanliwe, ntoko Mordekayi muyuda ni pwiyamwene Esteeri yaalakihenrye aya wiira yaahaana opaka, nave ntoko awo ni osuulu aya yoonale aya wiira yaahaana weettela, ohela muhina otthukwa ni opaka mavekelo ooxonttela.
32 Nto yooruma ya Esteeri yaaheemererya mwaha owo wa Puriimi, nave eyo yaahilempwa muliivuruni.
Inoota
^ Munwehe Apendise B15.
^ Aahiiso, “epalaasio”.
^ “Puri” onitaphulela “esorti”. Pluraale aya, “Puriimi”, waahikhalihiwa nsina na efesta yaatthapeliwa ni ayuda mweri wa namuloko ni piili kalendaario oowaarya. Munwehe Apendise B15.
