Luka 23:1-56
23 Vano, muttitthi wotheene wa atthu waahivenya, onamuroiha Yesu wa Pilato.
2 Atthu awo yaahipacerya omuhimyana itthu Yesu, ariki: “Nomphwanya mulopwana ola aahapuxaka atthu ahu, aakhoottiheryaka oliva mpoosito wa Seesari, ni aihimyaka okhala mwene Kristu”.
3 Pilato aahimukoha wira: “Niireke nyuwo mwa Mwene a ayuda?” Yesu aahaakhula oriki: “Ti nyuwo munihimya”.
4 Pilato aahaahimeerya makhulupale a anamukuttho ni mittitthi sa atthu wira: “Miyo nkinimphwanyana mulattu mulopwana ola”.
5 Masi awo, yaahithipelela ariki: “Owo onnaahapuxa atthu, owiixuttihaka oYudeya wotheene, okhuma oGalileya mpakha nno”.
6 Nuumala wiiwa eyo, Pilato aahikoha akhala wira Yesu aari mugalileya.
7 Vaasuwenle awe wira Yesu aakhuma muttetthe waalamuleliwa ni Herodi, aahimuroiha wa Herodi owo, yoowo aari oYerusalemu mahiku ale.
8 Okathi Herodi aamoonale awe Yesu, aahitteeliwa murima vanceene. Okhuma khalai, aaniphavela onweha Yesu, okhala wira aahiiwa olavuliwaka vanceene. Nave, Herodi aaniphavela onweha opakaka miiriirya ohoolo wawe.
9 Siiso, Herodi aahimukoha itthu sinceene, masi Yesu khaakhunle etthu.
10 Makhulupale a anamukuttho ni alipa-oowiixuttiha Nlamulo, yaaheemela anamuhimyana itthu Yesu, ananariwe ene.
11 Nto Herodi vamosa ni atoropa awe, yaahimunyohola. Nave yaahinveeha anwarihaka nlaya nooreera, amuttikiherya wa Pilato.
12 Nihiku nenlo, Herodi ni Pilato yaahikhala apatthani, okhala wira ehinatthi wiiraneya eyo, awo yaari awanani.
13 Pilato aahaathukumanya makhulupale a anamukuttho, anamalamulela ni atthu otheene,
14 aahimeerya wira: “Mookiruuhela mulopwana ola muhimyaka wira onaahapuxa atthu. Vano koomukoha oratteene ohoolo wanyu, masi nkimphwanyanne mulattu ni itthu sinimuhimyana anyu.
15 Tthiri, nnakhala Herodi khomphwanyanne mulattu, tivo, ookittikiherya miyo. Mukiiwe! Mulopwana ola khopanke etthu enimwiiriha ophwanela wiiviwa.
16 Nto kinrowa omuhukhumu, nuumala-vo, kimutaphuleke”.
17 *——
18 Masi muttitthi wotheene waanikhuwela oriki: “Mmwiive! Nave munitaphulele Baraba!”
19 (Mulopwana owo aahitthukweliwa mukhatteya mwaha wa onvirikanya kuvernu waakhumelenle opooma, ni mwaha wa owiiva atthu.)
20 Pilato aahilavula-tho ni atthu ale, okhala wira aaniphavela omutaphula Yesu.
21 Nto awo yaamutepa okhuwela ariki: “Okhomeliwe vamwirini! Okhomeliwe vamwirini!”*
22 Pilato aahaakoha-tho ekwaha ya neeraru, oriki: “Mwaha wa xeeni? Mulopwana ola otthenke-ni? Nkimphwanyanne mulattu onimwiiriha ophwanela wiiviwa. Kinrowa omuhukhumu, nuumala-vo, kimutaphuleke”.
23 Nto awo yaahithipelela akhuwelaka vaalupale ahimyaka wira okhomeliwe.* Atthu ale yaahikhuwela vanceene mpakha
24 Pilato opaka ele yaaphavela aya.
25 Pilato aahimutaphula mulopwana yamphavela aya, yoowo aatthukweliwe mukhatteya mwaha wa onvirikanya kuvernu ni owiiva atthu. Nto aahaavahererya Yesu wira amwiiriheke etthu yaaphavela aya.
26 Vano, amuroihaka Yesu, yaahinvara mulopwana mmosa a oKirene, aihaniwa Simoni, aakhuma omatta. Nto yaahimukuxiha mwiri wa nihaaxeryo* wa Yesu, wira omutthareke ottuli.
27 Muttitthi muulupale wa atthu waanimutthara Yesu, waahela muhina athiyana, yaawo yaimana vapeeto yooniheryaka oriipiwa murima ni yaamunlela Yesu.
28 Yesu aahirukunuwa aawehaka athiyana awo, onahimya wira: “Nyuwo athiyana a oYerusalemu, muhikinleleke miyo. Ohiya-vo, nwunleleke aniinyu,
29 okhala wira anoophiya mahiku atthu anrowa aya ohimyaka wira: ‘Oohakalala athiyana yaale ahiniyara, ni ale ahinayare ni ale ahinamwaamwihe mwaana!’
30 Nto atthu anoopacerya wiirelaka miyaako: ‘Munimorele!’ Nave animwiirelaka mattumuxa: ‘Munikhuneele!’
31 Vakhala wira annipaka itthu iya mwiri nlelo ori ene mukithi, exeeni enrowa wiiraneya, mwiri owo wanyaala?”
32 Nave-tho, yaahaakuxa atakhali anli wira yawiive vamosa ni Yesu.
33 Nuumala ophiya nipuro niihaniwa Muru Ohanle Makhuva-ru, yaahimukhomela Yesu vamwirini, vamosa ni atakhali awo, mmosa moono awe woolopwana, mukina moono awe woothiyana.
34 Yesu aahihimya wira: “Tiithi, mwaalevelele, maana khanisuwela etthu aniira aya”. Nave-tho, yaahaavererya eparakha malaya awe wira akawane.
35 Atthu yaaheemela ananwehexexa. Masi ahooleli yaanimutheya, ahimyaka wira: “Ola oowerya owoopola atthu akina. Vano, aari Kristu othanliwe ni Muluku, mmuhiye aixoopole”.
36 Hata atoropa yaaninveeha, anarwa onvaha eviinyu yoonyuunya,
37 ahimyaka wira: “Nyuwo mwaari Mwene a ayuda, mwiixoopole”.
38 Yaahikhala-tho moolumo yaalempwe vasulu vawe, yaahimya so: “Ola Mwene a ayuda”.
39 Mutakhali mmosa aakhomeliwe opuro yoole, aahipacerya onveeha Yesu, oriki: “Nyuwo mwaari Kristu, mwiixoopole mmansinyu, nave-tho munoopole hiyo!”
40 Mutakhali mukina aahaakhula ompwapwelaka mukhwaawe, ohimyaka wira: “Nyuwo nnakhala khamunimoova Muluku? Ehukhumu erina anyu, enoolikana ni yawawe.
41 Ehukhumu yaakhenle ahu, ti yookhalela mwaha wa etthu nipanke ahu. Masi mulopwana ola, khopanke etthu yootakhala”.
42 Nuumala-vo, aahihimya wira: “Yesu, mukuupuwele mwaphiya Moomweneni mwanyu”.
43 Nto Yesu aahimuhimeerya wira: “Olelo, kinooleelani ekeekhai wira, munrowa okhala ni miyo mParayiisu”.
44 Yaattamelaka 12 oora,* elapo ele yotheene yaahikhumelela ewiriphi* mpakha 15 oora,*
45 maana nsuwa naahihiya waarya. Nave-tho, ekortiina ya mutemplo yaahikhereya eriyari, okhuma osulu mpakha vathi.
46 Nto Yesu aahikhuwela ni nsu noowiiwanyeya, ohimyaka wira: “Tiithi, kinnoovahereryani okumi aka* mmatatani mwanyu”. Ohimyaka-ru siiso, aahikhwa.*
47 Nto, mukhulupale a anakhotto, nuumala oweha etthu yaakhumelenle, aahipacerya onvuwiha Muluku, oriki: “Tthiri, mulopwana ola aari naxariya”.
48 Mittitthi sa atthu saathukumanne wira siwehe itthu siiraneya, nuumala woona ele yaakhumelenle, saahitthikela owaani simanaka vapeeto, sooniheryaka oriipiwa murima.
49 Nave otheene ale yaamusuwela Yesu, waahela muhina athiyana, yaawo yaamutthara okhuma oGalileya, yaaheemela ottaiwene, anaweha itthu siiraneya.
50 Vano, aahikhala mulopwana mmosa aihaniwa Yosefe, yoowo iirela mpantta etripunaale ya etiini ya ayuda. Owo aari naxariya ni ooreera murima.
51 (Owo khaaphavenle ni khaamukhalihenrye palano aya a omwiiva Yesu.) Mulopwana owo aari a wArimathaya, epooma ya oYudeya. Nave aanilipelela Omwene wa Muluku.
52 Mulopwana owo aahirowa wa Pilato, onvekela murutthu wa Yesu.
53 Yosefe owo aahikuruxa murutthu wa Yesu vamwirini, ovitikelela ni ekuwo ya eliinyu yooreera, ni aahivitha mmahiye masya, yaathimpwale vamwala, yaawo nlelo yahaavithiwe mutthu.
54 Vano, naari nihiku naalokiheriwa aya esaabadu. Nto vaahanle wiila, nave esaabadu yaahala opacerya.
55 Athiyana yaamutthanre Yesu okhuma oGalileya, yaahirowa oweha mahiye, khuweha moota murutthu awe waavithiwe aya.
56 Nave awo yaahitthikela owaani wira yaalokiherye makhura oowunkhela. Masi, saabadu yaahimumula ntoko yooruma yaahimya aya.
Inoota
^ Eversiikulu ela enniphwanyaneya aBiibiliya akina, masi kheniphwanyaneya soolempwa ni matata sinceene sootthuneya sa ekereku.
^ Aahiiso, “Iiviwe vamwirini! Iiviwe vamwirini!”
^ Aahiiso, “iiviwe vamwirini”.
^ Nwehe Moolumo Ootthokiheriwa.
^ Ekereku, “ewoora ya neethanu namosa [nuumala nsuwa okhuma]”.
^ Aahiiso, “elapo ele yotheene yaahiriipela”.
^ Ekereku, “ewoora ya neethanu naxexe [nuumala nsuwa okhuma]”.
^ Aahiiso, “ikuru sa okumi”. Ekereku pneuma.
^ Aahiiso, “aahimumula ekwaha yookiserya”.
