Luka 7:1-50
7 Okathi Yesu aamalihale awe waaleela itthu iya atthu ale, aahiphiya oKafarnawu.
2 Vano, aahikhala weiwo mukhulupale mmosa a anakhotto, aarina murumeyi awe amphentexa awe. Murumeyi owo aahiwereiwa vanceene, onahala okhwa.
3 Okathi mukhulupale owo vaiwale awe olavuliwaka Yesu, aahaaruma makhulupale makina a ayuda orowa okumana ni Yesu, wira yanvekele wira ampenuxe murumeyi awe.
4 Atthu awo yaahirowa omphwanya Yesu, anamuxonttela amuthipelelaka: “Owo onniphwanela wira mmukhaliherye,
5 okhala wira onniphenta nloko nahu, ni ti yoowo otenke esinagoga* ahu”.
6 Siiso, Yesu aahirowa ni yaawo. Masi ohalaka ophiya etthoko eyo, mukhulupale owo aahaaruma apatthani awe omuleela Yesu wira: “Atokweene, ahixanke, maana miyo nkiniphwanela wira iwo akele mpaani mwaka.
7 Tivo, nnakhala miyo nkoonale oreerela orwa okumana ni iwo. Masi alavule paahi, wira murumeyi aka openuwe, nto owo onookhala saana.
8 Tthiri aakhala atthu anikilamulela, nave-tho miyo kookhalana atoropa kinaaruma aka. Kamwiirela toropa mmosa wira: ‘Murowe iwe!’, owo onnirowa. Nave kamwiirela mukina wira: ‘Murwe!’, owo onnoorwa. Vano karuma epottha aka wira: ‘Nvare ela!’, eyo ennivara”.
9 Nuumala Yesu wiiwa itthu iya, aahitikinihiwa vanceene, onahimeerya muttitthi ole wa atthu waamutthara wira: “Kinooleelani wira, hata wIsarayeli nkinaphwanye waamini wuulupale siisa”.
10 Okathi atthu ale yaarummwale yaatthikenle aya owaani, yaahimphwanya murumeyi owo aawereiwa, ori ene saana.
11 Voohipisa, Yesu aahirowa epooma yaihaniwa Nayini. Nto awiixutti awe yaahimutthara vamosa ni muttitthi muulupale wa atthu.
12 Yesu, ohalaka ophiya vamukhora wa epooma, aahikumana ni atthu yaakunxe murutthu. Owo aari mwaana mwaamulopwana mmoseene, a muthiyana naamukhweli. Nave muttitthi muulupale wa atthu waakhuma opooma, waanimuhoola muthiyana owo.
13 Okathi Pwiya Yesu, anwehale awe muthiyana ole, aahimmorela ikharari, onamuhimeerya wira: “Mmaale wunla”.
14 Vano Yesu aahaattamela nrepa,* khuvara. Atthu yaateexale nrepa nle yaaheemela. Yesu aahiira: “Mmiravo, kinooleelani wira: Nvenye!”
15 Nto namukhwa ole aahivenya, okilaathi, onapacerya olavula. Yesu aahaavahererya mmiravo owo amamawe.
16 Atthu otheene yaahoova vanceene, ananvuwiha Muluku, ariki: “Oonikhumelela profeta muulupale”. Nave yaanihimya wira: “Muluku ohaamorela ikharari atthu awe”.
17 Ehapari ela yaamuhimya Yesu, yaahimwareela oYudeya wotheene ni ilapo sotheene soowaattamela.
18 Vano, awiixutti awe Yohani yaahimuleela itthu iya sotheene.
19 Siiso, Yohani aahaathanla awiixutti awe anli, aaruma orowa okumana ni Pwiya ni omukoha wira: “Nyuwo ti Kristu yoole onimulipelela ahu, aahiiso onimoorwa mukina?”
20 Okathi vaaphiyale aya, alopwana awo yaahimukoha Yesu wira: “Yohani Mpatisa tonirumme wookohani, wira: ‘Nyuwo ti Kristu yoole onimulipelela ahu, aahiiso onimoorwa mukina?’”
21 Ewoora ene yeele, Yesu aahaapenuxa atthu anceene yaawereiwa iretta soovirikana, ni atthu anceene yahoona yaaniwerya woona. Nave aahoomola malaikha ootakhala.
22 Yesu aahiwaakhula wira: “Murowe mwamuleele Yohani itthu siniiwa anyu ni sinoona anyu: Alipa-oohoona, vano annoona. Alipa-oorakala, anneetta oratteene. Anamakokho,* annipenuxiwa. Alipa-oohiiwa, vano anniiwa. Alipa-ookhwa, annihihimuxiwa. Atthu oohaawa, annilaleeriwa ihapari sooreera.
23 Oohakalala tuule ohinihiya waamini mwaha wa miyo”.
24 Nuumala awiixutti a Yohani okhuma, Yesu aahipacerya olavula ni mittitthi iye sa atthu, omuhimyaka Yohani, oriki: “Mwaaronwe woona exeeni woothakoni? Mwaaronwe woona mutathi onittikinyiwa ni epheyo?
25 Nto mwaaronwe woona exeeni? Niireke mwaaronwe onweha mulopwana owanre ene malaya a musurukhu munceene? Atthu aniwara ikuwo sooreerexa ni atthu oopuha, taale anikhala ipa sa mamwene.
26 Vano-nto, mwaarowenle-ni? Mwaaronwe onweha profeta? Aayo! Kinooleelani wira, owo muulupale onvikana profeta.
27 Owo ti yoole aahimmwale ni soolempwa wira: ‘Mwiiwe! Kinnimuruma namitthaka* aka ohoolo wanyu* wira oolokiheryeni ephiro’.
28 Kinooleelani wira, eriyari ya apinaatamu, khuuvo mutthu ori muulupalexa onvikana Yohani. Masi, ole ori mwaamukhaanixa Moomweneni mwa Muluku, ti muulupalexa onvikana owo”.
29 (Okathi atthu otheene ni alipa-ooliviha mpoosito yaiwale aya eyo, yaahimuhimya Muluku okhala naxariya, maana yiira apatisiwe ene ni Yohani.
30 Masi, afarisi ni atthu yaasuwela saana Nlamulo, khiyaaphavela opaka ele Muluku aaphavela awe, okhala wira khiyaapatisiwe ni Yohani).
31 “Vano, kaalikanyihe naani atthu a mahiku ala? Atthu ala ari ntoko aani?
32 Atthu ala ari ntoko anamwane acikhaani akilanthi omerkaatu, anikhuwelelana, yiiraka: ‘Nihoopa iphivi,* masi nyuwo khamwiinale; noowiipelani masipo ooriipiha murima, masi nyuwo khamuriipiwe murima’.*
33 Mwa enamuna emosa-ru, Yohani Mpatisa onnitthukwa ni khoniwurya eviinyu, masi nyuwo munihimya wira: ‘Owo ookhalana nlaikha nootakhala’.
34 Vano Mwaana a mutthu onnoolya ni onniwurya eviinyu, masi nyuwo munihimya wira: ‘Mmooneke mutthu ole, namalya ni oniwurya vootepana, nave owo mpatthani a alipa-ooliviha mpoosito ni anatampi!’
35 Mweekeekhai, ankhili a mutthu annooneya ni itthu sa xariya onipaka awe”.
36 Vano nfarisi mmosa aahithipelela omulattula Yesu wira alye owannyawe. Siiso, Yesu aahirowa owannyawe nfarisi owo, khukilaathi onalya.*
37 Nto epooma ele aahikhala muthiyana mmosa aasuweliwa okhala natampi. Muthiyana owo, aahisuwela wira Yesu aamoolya* owannya awe nfarisi. Vano, aahiruuha ekarafa* ya makhura oowunkhela.
38 Owo aahikokhora aattamenle ene inawu sa Yesu, khupacerya wunla. Vano muthiyana owo, aaninaaniha inawu sa Yesu ni maithori awe, onapuputtha ni ikharari sawe. Nave-tho, aanipexari ni aanihela makhura oowunkhela inawu sa Yesu.
39 Voonale awe ele, nfarisi ole aamulattunle Yesu, aahipacerya wuupuwela, oriki: “Mulopwana ola aari profeta eekeekhai, ammusuwela muthiyana ola oninvara, ni aamusuwela makhalelo awe, wira muthiyana ola natampi”.
40 Masi Yesu aahimuhimeerya nfarisi owo wira: “Simoni, ehaavo etthu eniphavela aka wooleelani”. Simoni aahaakhula oriki: “Mwiixuttihi, muhimyeke!”
41 “Mulopwana mmosa onikophiha musurukhu, aahikopheliwa ni alopwana anli: Mmosa, aamukophenle itenaario* 500, mukina, aamukophenle 50.
42 Okhala wira alopwana ale khiyaarina etthu yoomulivana, aahaalevelela ni murima wotheene. Vano, wa alopwana ale anli, tuuvi onrowa omphentexa mulopwana ole onikophiha musurukhu?”
43 Simoni aahaakhula wira: “Kinoona wira tuule oleveleliwe musurukhu munceene”. Yesu aahimuhimeerya wira: “Muhaakhula saana”.
44 Yesu aahirukunuwa, onanweha muthiyana owo, nto onamuhimeerya Simoni wira: “Munnimoona muthiyana ola? Miyo kookela mpaani mwanyu, nyuwo khamukivanhe maasi oorapihela inawu saka. Masi, muthiyana ola, oorapiha inawu saka ni maithori awe, khipuputtha ni ikharari sawe.
45 Nyuwo khamukivanhe epeexo, masi okathi wotheene kiri aka va, muthiyana ola onnipexari inawu saka.
46 Nyuwo khamukihenle makhura vamuru, masi muthiyana ola oohela makhura oowunkhela inawu saka.
47 Tivonto, kinooleelani wira, itampi sawe sirookhala-ru sinceene,* sotheene sooleveleliwa, maana ookiphenta vanceene. Tthiri ole onileveleliwa vakhaani, oniphenta vakhaani”.
48 Vano, Yesu aahimuhimeerya muthiyana ole wira: “Itampi sanyu sooleveleliwa”.
49 Ale yaakilanthi vamosa ni Yesu ahaamenle ene meesa, yaahipacerya wiikoha ariki: “Ti pani mutthu ola oniwerya olevelela itampi?”
50 Masi, Yesu aahimuhimeerya muthiyana ole wira: “Waamini wanyu wowoopolani. Muroweke ni murettele”.
Inoota
^ Nwehe Moolumo Ootthokiheriwa.
^ Aahiiso, “ecanaisa”.
^ Aahiiso, “anamakuttula; anamaretta”.
^ Aahiiso, “namuhupi”.
^ Ekereku, “vamaithoni vanyu”.
^ Aahiiso, “iflauta”.
^ Aahiiso, “khammanne vapeeto mooniheryaka oriipiwa murima”.
^ Aahiiso, “okilaathi ohamenle ene meesa”.
^ Aahiiso, “aari vameesa”.
^ Ekereku, “ekarafa ya alabastro”. Murinki mwaamukhaani, waapakiwa ni nluku, nenlo naaphwanyaneya waattamela muttetthe wa Alabastron, wExiitu.
^ Musurukhu maluku ene wa eparatha wa oRoma. Nwehe Moolumo Ootthokiheriwa.
^ Aahiiso, “suulupale”.
