Luka 8:1-56
-
Athiyana yaamutthara Yesu (1-3)
-
Nlikanyiho na mulipa-oomisa (4-8)
-
Nthowa naya Yesu aalavula awe ni malikanyiho (9, 10)
-
Otthokiheriwa wa nlikanyiho na mulipa-oomisa (11-15)
-
Muthuko khonikhuneeliwa (16-18)
-
Amamawe ni axihima awe Yesu (19-21)
-
Yesu onnimaaliha epheyo yuulupale (22-25)
-
Yesu onnoomolela malaikha ootakhala mukuluweni (26-39)
-
Mwaana mwaamuthiyana a Jairo; muthiyana onnivara malaya a ota a Yesu (40-56)
8 Nuuvira okathi vakhaani, Yesu aanirowa ipooma sotheene ni mittetthe sotheene, aalaleeryaka atthu ni olaleyaka ihapari sooreera sa Omwene wa Muluku. Owo aari vamosa ni arummwa 12.
2 Nave yaahikhala athiyana akina, yaawo yaakumihiwe malaikha ootakhala ni yaapenuxiwe iretta saya. Athiyana awo taala: Maria, aihaniwa Madalena, yoowo aakumihiwe malaikha 7 ootakhala;
3 Yohana, mwaarawe Khusa, yoowo aari murumeyi a Herodi; Susana ni athiyana akina anceene, yaawo yaamukhaliherya Yesu ni awiixutti awe, arumeelaka mireerelo saya.
4 Vano, okathi muttitthi muulupale wa atthu waathukumanne aya poromosa ni atthu yaarwiiye ipooma sotheene, Yesu aahilavulana orumeelaka nlikanyiho:
5 “Mulipa-oomisa aahirowa omisa ipyo sawe. Omisaka siisaale, ipyo sikina saahimorela mukerekhere mwa estaraata, sinyakeliwa, nto axipalame* yaahikhuura.*
6 Ipyo sikina saahimorela vamalukuni. Nuumala omela, saahuuma, maana khisaarina maasi.
7 Ipyo sikina saahimorela vamiiwani. Nto miiwa iyo saahinnuwa vamosa ni ipyo iyo, sinakhoottiherya wunnuwa.
8 Masi ipyo sikina-tho, saahimorela etthaya yooreera, nto nuumala wunnuwa, saahiima mihokorokho 100, ovikana ele yaaliwe”. Nuumala ohimya itthu iya, Yesu aahilavula ni nsu noowiiwanyeya, oriki: “Ole oniphavela wiiwa, iiweke”.
9 Masi awiixutti awe yaahimukoha ele yaataphulela aya nlikanyiho nne.
10 Yesu aahaahimeerya wira: “Nyuwo muheemereriwa wiiwexexa isiiri sa Muluku sinihimya Omwene awe, masi atthu akina, aniixuttihiwa ni malikanyiho, wira hata awehaka, aweheke mahala. Nave-tho, nnaamwi yiiwaka, ahiiwexexeke etthu ene.
11 Nlikanyiho nla nintaphulela ela: Epyo ti nuulumo na Muluku.
12 Ipyo saamorenle mukerekhere mwa estaraata, taale aniiwa, nuumala-vo Diabo onnoorwa, onawaakha nuulumo na Muluku vamurimani vaya wira ehaamini wira yoopoliwe.
13 Ipyo saamorenle vamalukuni, taale aniira yiiwaka-ru nuulumo na Muluku, aneemererya atteeliwe ene murima, masi khanikhalana mitathaari. Awo anaamini okathi vakhaani, masi yeehereriwaka, annihiya waamini.
14 Epyo yaamorenle vamiiwani, taale aniiwa nuulumo, masi mwaha wa oxankiheya, mihakhu, ni ophavela opuha, itthu iya sinnaavuvurya voomalela, ahinawerya okumiherya mihokorokho.
15 Epyo yaamorenle etthaya yooreera, taale aniira yiiwaka-ru nuulumo ni murima wotheene, annikumiherya mihokorokho avilelaka mixankiho.
16 “Khuuvo onipattiha muthuko onakhuneela ni mwaapu aahiiso onapweha vathi va ekhaama. Masi, onipweha osulu-sulu, wira ale anikela mpaani yooneke okokola.*
17 Tthiri, khiivo etthu yiipithihiwe, ehinrowa wooniheriwa. Nnakhala khiivo etthu evithiwe saana, ehinrowa osuweliwa aahiiso ehinrowa wooniheriwa.
18 Tivonto, nwiriyaneke oratteene, maana ole orina etthu, onimuncereriwa. Vano ole ohirina etthu, hata ele onuupuwela awe wira ookhalana, onimwaakhiwa”.
19 Vano amamawe ni axihima awe Yesu yaahiphiya, masi khiyaawerya omwaattamela, mwaha wa muttitthi wa atthu.
20 Nto Yesu aahileeliwa wira: “Amaminyu ni axihima anyu, ari vate vale, aniphavela woowehani”.
21 Yesu aahiwaakhula oriki: “Amamaka ni axihima aka taala aniiwa nuulumo na Muluku, eneettela”.
22 Nihiku nimosa, Yesu ni awiixutti awe yaahiwela ekalawa, aahimeerya wira: “Nrowe nilapuwele ekhopela ekina ya ntthiya”. Nto awo yaahivenya, anarowa.
23 Masi okathi ekalawa yeetta aya, Yesu aahirupa. Vano, yaahikhumelela epheyo yuulupale vantthiyani, nto ekalawa aya yaahipacerya osareya maasi, enahala vakhaani osama.
24 Awo yaahirowa onvenxa Yesu, ariki: “Mwiixuttihi, Mwiixuttihi, nihanle okhwa!” Nto owo aahivenya, opwapwela epheyo ni mawimpi. Vano, epheyo yaahimaala, ni waahikhumelela omaaleleya.
25 Nuumala-vo, Yesu aahaahimeerya wira: “Waamini wanyu ori vai?” Masi awiixutti yaahoova ni yaahitikinihiwa vanceene, anakohana, yiiraka: “Mulopwana ola ti pani? Owo onniruma hata epheyo ni maasi, nto iyo sinnimwiiwelela”.
26 Yesu ni awiixutti awe yaahiphiya okerekhere wa ntthiya, muttetthe wa oXeraasa, yoowo waari ekhopela ekina, oluluwanya oGalileya.
27 Yesu akhuruwaka-ru mukalawani, mulopwana mmosa a epooma ele, yoowo aavariwe ni nlaikha nootakhala, aahirwa vaari awe. Waahivira okathi munceene mulopwana owo ohiwaraka ikuwo. Nave khaakhala vate, masi aakhala omahiye.
28 Mulopwana owo omoonaka-ru Yesu, aahikhuwela vanceene, okokhora ohoolo wawe, onahimya wira: “Exeeni erina anyu ni miyo, nyuwo Yesu, Mwaana a Muluku Muulupalexa? Kinooxonttelani wira muhikihaaxe”.
29 (Tthiri Yesu aaniruma nlaikha nne nootakhala wira nimukhume mulopwana owo. Nlaikha nle naahinvara ikwaha sinceene,* nave aamakela otthukiwa ni ikwirinti miyoono ni metto, onawehawehiwa oratteene. Masi owo aanikwasa ikwirinti iyo, oneettihiwa ni nlaikha nlo nootakhala, nimuroihaka mapuro yahaavira-viriwa.)
30 Yesu aahimukoha wira: “Nsina nanyu ti pani?” Nto owo aahaakhula oriki: “Nsina naka, ka Muttitthi”, maana aahivariwa ni malaikha manceene ootakhala.
31 Malaikha ale ootakhala yaahimuxonttela Yesu wira ohirume orowa mulittini moowiixa.
32 Nave, naahikhala nikoto nuulupale na ikuluwe naalya omwaako. Malaikha awo ootakhala, yaahimuxonttela Yesu wira oweemererye okela mukuluweni. Nto Yesu aaheemererya.
33 Vano, malaikha awo yaahimukhuma mulopwana owo, khukela mukuluweni. Nto, nikoto nle naahitthimakela oneri,* khimorela mphareya, nisama.
34 Masi alipa-oolyiha ikuluwe voonale aya ele yiiraneyale, yaahitthyawasa, khurowa olaleya opooma ni mmuttettheni.
35 Vano atthu yaahirowa woona etthu yaakhumelenle. Awo yaahirwa vaari Yesu, khimoona mulopwana owo, yoowo aakumihiwe malaikha ootakhala, owanre ene ikuwo ni ori ene saana, okilanthi ene vaari Yesu. Nto atthu yaahoova vanceene.
36 Ale yoonale etthu ele, yaahaaleela atthu awo moota mulopwana ole aavariwe ni malaikha ootakhala, aapenuxiwe awe.
37 Atthu anceene a muttetthe wa oXeraasa, yaahinvekela Yesu wira okhume mulaponi mwaya, maana yaanoova vanceene. Nto Yesu aahikela mukalawani wira oroweke.
38 Vano, mulopwana owo aakumihiwe malaikha ootakhala, aahithipelela omuxonttela Yesu wira omutthare, masi Yesu aahimuruma otthikela owaani, oriki:
39 “Mutthikele owaani, mwaaleeleke atthu otheene itthu Muluku owiirenlyaweni”. Siiso, mulopwana owo aahirowa, onalaleya epooma yotheene etthu Yesu aamwiirenle awe.
40 Okathi Yesu aatthikenle awe oGalileya, muttitthi wa atthu waahimwaakhela saana, okhala wira otheene aya yaanimulipelela.
41 Okathi ene yoowo, aahiphiya mulopwana mmosa iihaniwa Jairo, yoowo aari mukhulupale aahoolela musinagoga.* Aahikokhora ohoolo wa Yesu, onamuxonttela Yesu wira orowe vatthokoni vawe,
42 okhala wira mwanawe mwaamuthiyana mmoseene, yoowo aarina iyaakha soowiiraka 12, aahala okhwa.
Okathi Yesu aarowa awe, mittitthi suulupale sa atthu saanimphunya.
43 Vano, aahikhala muthiyana mmosa aavinre iyaakha 12 ephome awe eyiiheyaka. Nto khuuvo aawerya ompenuxa.
44 Owo ahimwaattamela Yesu ottuli wawe, ovara vathi va nlaya nawe na ota. Niinaano-ru, ephome awe yaahimaala oyiiheya.
45 Vano, Yesu aahikoha wira: “Ti pani okivanre?” Okhala wira atthu otheene yaanikhootta, Pedru aahaakhula: “Mwiixuttihi, munnoona wira atthu ala ahoorukureryani ni annoophunyani”.
46 Masi Yesu aahihimya wira: “Ohaavo okivanre, maana koosuwela wira sookikhuma ikuru”.
47 Nuumala muthiyana ole woona wira aahisuweliwa, aahirwa ottettemelaka, okhoroma ohoolo wa Yesu, onaahimeerya atthu otheene nthowa naamwiirinhe ovara nlaya na Yesu, ni moota aapenuxiwe awe niinaano-ru.
48 Masi Yesu aahimuleela muthiyana ole wira: “Mwanaka, waamini wanyu ohookhalihani saana. Muroweke ni murettele”.
49 Nlelo Yesu olavulaka, aahirwa mulopwana mmosa aakhuma vatthokoni va Jairo, onahimya wira: “Mwaninyu ohookhwa. Muhimuukhule-tho Mwiixuttihi”.
50 Nuumala Yesu wiiwa moolumo ale, aahimuhimeerya Jairo wira: “Muhoove etthu, mwaamini paahi, nto owo onookhala mukumi”.*
51 Okathi Yesu aaphiyale awe vatthokoni vale, khaaweemerenrye atthu akina okela mpaani nuuwo. Aamweemerenrye paahi Pedru, Yohani, Yakobo ni apapawe ni amamawe mwaana ole.
52 Masi atthu otheene yaanimunlela mwaana ole ni wiimana vapeeto,* mwaha wooriipiwa murima. Nto Yesu aahiwiirela: “Mmaale wunla, okhala wira ola khokhwiiye, masi onoorupa”.
53 Vano, atthu ale yaahipacerya omutheya voonyoholela, maana awo yaahisuwela wira aahikhwa.
54 Yesu aahinvarela ntata mwaana ole, onamwiihana, oriki: “Mwanamwane, nvenye!”
55 Nto mwaana ole aahitthikela okhala mukumi, khivenya niinaano-ru. Vano Yesu aahiruma wira mwaana ole ovahiwe yoolya.
56 Apapawe ni amamawe mwaana ole, yaahitteeliwa murima vanceene, masi Yesu aahaaleela wira ahimuleele mutthu, ele yiiraneyale.
Inoota
^ Aahiiso, “axinuuni”.
^ Aahiiso, “athupa”.
^ Aahiiso, “waarya”.
^ Aahiiso, woonasa wene: “naahinvara okathi munceene”.
^ Aahiiso, “oxepani”.
^ Nwehe Moolumo Ootthokiheriwa.
^ Ekereku, “onimoopowa”.
^ Aahiiso, “vatthirima”.
