Marko 12:1-44
12 Yesu aahipacerya waalaleerya atthu ni malikanyiho, oriki: “Mulopwana mmosa aahikhalana ematta awe ya ewuuva. Aahitekelela ematta yotheene ni aahithipa nipuro naanyakattiwa ewuuva. Nave-tho aahiteka empa yoorakamela osulu* mmatta-mmo. Nuumala-vo, aahaahiyerya alimi, khurowa elapo ekina.
2 Waaphiyale aya okathi woohepha, mwaneene ematta aahimuruma murumeyi awe orowa okumana ni alimi ale, wira aakhele epantta ya mihokorokho sawe.
3 Vano, alimi ale yaahinvara murumeyi owo, emmana, ni emoomola matata-ru.
4 Nave, aahimuruma murumeyi mukina, nto awo yaahimmana vamuru ni yaahinveeha.
5 Mwaneene aahimuruma murumeyi mukina-tho, awo khumwiiva. Nave-tho, aahaaruma arumeyi anceene, vano alimi ale yaahaamana, akina yaahiwiiva.
6 Nuumala-vo, mwaneene ematta ya ewuuva, aahimuruma mwanawe amphentexa awe wira akumane ni alimi ale, oriki: ‘Awo anoomuttittimiha mwanaka’.
7 Masi alimi ale yaahihimeeryana wira: ‘Ola tonrowa ohalana ematta ela. Nrowe nimwiive, itthu sotheene sikhale sawihu’.
8 Nto awo yaahinvara, khumwiiva, amurihela ota wa ematta ya ewuuva.
9 Vano mwaneene ematta onrowa opaka exeeni? Owo onimoorwa owiive alimi ale, nto ematta ele aavahe atthu akina.
10 Niireke nyuwo khamunasome yoolepa, eni: ‘Nluku alipa-ooteka empa yaakhontte aya, nookhalihiwa nluku nuulupale na alisenso?’*
11 Khamunasome-tho wira, ‘Nluku nlo ninkhuma wa Yehova, ni ti nootikiniha vamaithoni vahu’?”
12 Okathi alipa-oowiixuttiha Nlamulo ni makhulupale a anamukuttho yaiwale aya malikanyiho awe, yaaniphavela onvara. Masi yaanoova muttitthi wa atthu, okhala wira yaanisuwela wira Yesu aahilavula nlikanyiho nla aahimyaka yaawo. Nto awo yaahimuhiya, anarowa.
13 Vano yaahaaruma afarisi akina vamosa ni atthu yaamutthara Herodi, wira yanvare Yesu ni moolumo awe.
14 Vaaphiyale aya, yaahimuleela wira: “Mwiixuttihi, noosuwela wira okathi wotheene munilavula ekeekhai ni muniixuttiha ekeekhai ya Muluku, ni khamunimuthanla mutthu, okhala wira khamuniweha makhalelo a atthu. Niireke vannireerela omuliva mpoosito Seesari wala nnaari?
15 Nliveke aahiiso nihiliveke?” Osuwelaka muupuwelo aya wootakhala, Yesu aahaakoha wira: “Xeeni munikeehererya anyu? Muruuhe etenaario,* kiwehe”.
16 Awo yaahimuruuhela etenaario* emosa. Nto, Yesu aahaakoha wira: “Elatarato ela ni nsina nilempwale-va, ti yawani?” Awo yaahaakhula wira: “Ti ya Seesari”.
17 Vano, Yesu aahaahimeerya wira: “Weeso, munvaheke Seesari ekhanle ya Seesari, nave munvaheke Muluku ekhanle ya Muluku”. Nto awo yaahitikinihiwa vanceene ni moolumo awe.
18 Asaduki, yaawo anihimya wira alipa-ookhwa khanihihimuxiwa, yaahimwaattamela Yesu, anamukoha yiiraka:
19 “Mwiixuttihi, Moise oolepa wira: Mulopwana akhwa, khimuhiya mwaarawe ohiyaranne mwaana, munnawe ohaana omuthela naamukhweli owo, wira omuyarele anamwane ole okhwiiye.
20 Nto yaahikhala axinna 7. Ole oopacerya aahimuthela mwaarawe, masi mulopwana owo aahikhwa ohiyaranne mwaana.
21 Nave a nenli aahimuthela naamukhweli owo, nto mulopwana owo aahikhwa ohiyaranne mwaana. Yaahiiraneya-tho ni munnawe a neeraru.
22 Alopwana ale 7, yaahikhwa ahiyaranne mwaana. Wookiseryani waya, muthiyana ole aahikhwa.
23 Vano, okathi anrowa aya ohihimuxiwa alipa-ookhwa, tuuvi onrowa omukuxa muthiyana owo? Maana alopwana ale 7, yaahimuthela”.
24 Yesu aahaahimeerya wira: “Nyuwo khamunsuwela Soolempwa nnakhala owerya wa Muluku. Tivo muniiwoka anyu.
25 Okathi alipa-ookhwa anrowa aya ohihimuxiwa, alopwana khanrowa othelaka, nnakhala athiyana khanrowa otheliwaka, masi anrowa olikanaka ni malaikha ari wiirimu.
26 Vano, mwaha woohihimuxiwa wa alipa-ookhwa, khamunasome muliivuruni mwa Moise ele Muluku aamuhimenrye awe vamiiwani* waapatta mooro, iiraka: ‘Miyo ka Muluku a Abrahamu, Muluku a Isaakhi ni Muluku a Yakobe’?
27 Owo khahiyo Muluku aalipa-ookhwa, masi Muluku a atthu akumi. Tivo, nyuwo munniiwoka vanceene”.
28 Aahikhala vaavale, mulipa-oowiixuttiha Nlamulo mmosa, yoowo aawiriyana etthu yaalavuliwa. Tivonto, nuumala wiiwa moota Yesu aatthokihenrye awe mwaha ole, aahimukoha oriki: “Tiivi eri yooruma yuulupalexa ya Nlamulo?”
29 Yesu aahaakhula wira: “Yooruma yoopacerya tiila: ‘Mukiwiriyane, nyuwo atthu a Isarayeli. Yehova Muluku ahu, ori mmosa paahi, Yehova.
30 Nave, mumphenteke Yehova Muluku anyu ni murima anyu wotheene, ni okumi* anyu wotheene, ni muupuwelo anyu wotheene, ni ikuru sanyu sotheene’.
31 Yooruma ya nenli, tiila: ‘Mumphenteke mukhwiinyu ntoko siniiphenta anyu’. Khiivo yooruma ekina enivikana sooruma iya”.
32 Mulipa-oowiixuttiha Nlamulo, aahimuhimeerya Yesu wira: “Vaareera, Mwiixuttihi, moolavula ekeekhai: ‘Muluku ori mmosa paahi, khuuvo-tho muluku mukina’;
33 nave omphenta Muluku ni murima ahu wotheene, ni osuwela wahu wotheene, ni ikuru sahu sotheene ni omphenta mukhwiihu ntoko siniiphenta ahu, ti etthu yuulupalexa ovikana mikuttho sotheene soopahiwa ni mikuttho sikina”.
34 Yesu voonale awe wira mulipa-oowiixuttiha Nlamulo aahaakhula saana, aahimuhimeerya wira: “Khamurakamenle Omwene wa Muluku”. Vano khuuvo aawerya omukoha-tho etthu.
35 Masi, nlelo Yesu iixuttihaka mutemplo, aahihimya wira: “Alipa-oowiixuttiha Nlamulo aniwerya sai ohimya wira Kristu ti mwaana a Davidi?
36 Eettihiwaka ni munepa woowaarya, Davidi oohimya wira: ‘Yehova oomuleela Pwiya aka wira: “Mukilaathi moono aka woolopwana, mpakha miyo waapweha awanani inyu vathi va inawu sanyu”’.
37 Davidi onnimuhimya owo okhala Pwiya, nto vaniweryaneya sai Kristu okhala mwaana a Davidi?”
Vano muttitthi ole muulupale wa atthu waanisiveliwa wiiwa itthu Yesu aalavula awe.
38 Nlelo iixuttihaka, Yesu aahihimya-tho wira: “Mwiikasoope ni alipa-oowiixuttiha Nlamulo. Awo waasivela weetta awanre ene malaya oorakama ni okhomasiwa ni nttittimiho mapuro oowaatta atthu.*
39 Nave waasivela okilaathi mapuro oohoolo* musinagoga,* ni mapuro oosuwanyeya ofestani.
40 Awo anniiya mireerelo sa anaamukhweli, nave annipaka mavekelo oorakama wira yooniwe ni atthu. Ophukeliwa waya onrowa okhala wuulupalexa”.
41 Yesu aahikilaathi vakhiviru va ikaaxa saaheliwa musurukhu, nto aaniweha muttitthi ole wa atthu orihelaka musurukhu ikaaxa iye. Athaaciri anceene yaanirihela musurukhu munceene.
42 Vano aahirwa muthiyana naamukhweli, oothoiwa, khurihela musurukhu miili waarina efaita vakhaani.*
43 Yesu aahiwiihana awiixutti awe, aahimeerya wira: “Kinooleelani ekeekhai wira, muthiyana ole naamukhweli oothoiwa, oovaha musurukhu munceene waavikana atthu otheene.
44 Mweekeekhai, otheene ale aavaha musurukhu waahala, masi naamukhweli ole, ni othoiwa wawe, oovaha musurukhu wotheene aarina awe, eyo piiyo, itthu sotheene aalipana awe”.
Inoota
^ Ola opuro waawehawehiwa ematta, wira alatarau aahiiso inama sihikele mmatta.
^ Aahiiso, “mathipelo”.
^ Musurukhu maluku ene wa eparatha wa oRoma. Nwehe Moolumo Ootthokiheriwa.
^ Musurukhu maluku ene wa eparatha wa oRoma. Nwehe Moolumo Ootthokiheriwa.
^ Onihimmwa mwiri mwaamukhaani orina miiwa.
^ Nwehe Moolumo Ootthokiheriwa ani: “Okumi”.
^ Aahiiso, “mmamerkaatuni”.
^ Aahiiso, “opuro wooreerexa”.
^ Nwehe Moolumo Ootthokiheriwa.
^ Ekereku, “ileepita piili”. Ileepita piili, waari musurukhu waaliviwa mutthu aavara muteko etthu yoowiiraka minuutu 10.
