Masaalimu 135:1-21
135 Mmuttottopele Yah!*
Muttottopele nsina na Yehova;Mmuttottopele, nyuwo arumeyi a Yehova,
2 Nyuwo munivara muteko* mpaani mwa Yehova,Vate va empa ya Muluku ahu.
3 Mmuttottopele Yah, okhala wiira Yehova tooreera murima.
Mwiipeke isipo muttottopelaka nsina nawe, okhala wiira ti vooreera.
4 Yah oomuthanla Yakobe wiira okhale awawe,Nave oomuthanla Isarayeli wiira okhale nloko nawe nimmusivelexa.
5 Miyo kinnisuwela oratteene wiira Yehova ti muulupale;Pwiya ahu ti muulupalexa waavikana amuluku ootheene.
6 Yehova onnipaka itthu oniphavela awe,Wiirimu ni vathi, mphareya ni iphareya sootheene soowiixa.
7 Owo onniiriha meeku* owela osulu, akhumaka omalenle elapo;Onniiriha etari woopa* okathi enirupa aya epula;Onnikumiha epheyo, opuro onisuka awe.
8 Owo aahiwiiva anamwane oopacerya oyariwa a wExiitu,Nave-tho aahiiva inama soopacerya ototholiwa.
9 Owo aahipaka itthu sootikiniha ni miiriirya wExiitu,Aahipaka miiriirya iyo ohoolo wa Farawo, ni arumeyi awe ootheene.
10 Aahipwetexa maloko manceene,Ni aahiwiiva mamwene oowerya.
11 Sihoni, mwene a amori,Oogi, mwene a oBaxani,Ni omwene wootheene wa oKanaani.
12 Aahaavaha elapo aya atthu awe, wiira ekhaleke yawaya,Aahaahiyerya atthu awe a nloko na Isarayeli.
13 Yehova, nsina nanyu ninnikhala mahiku ootheene.
Yehova, ovuwa wanyu* onnikhala mpakha maloko ootheene.
14 Yehova onoowaakiha atthu awe,Nave onoowoonela othunku arumeyi awe.
15 Ilatarato sa maloko, ti sa eparatha ni sa eweero,Iyo sipakiwe ni apinaatamu.
16 Sookhalana eyano, masi khasiniwerya olavula;Sookhalana maitho, masi khasiniwerya woona;
17 Sookhalana maaru, masi khasiniwerya wiiwa.
Iyo khasinimumula.
18 Atthu apanke ilatarato iyo, anrowa olikanaka ni seiyo,Vamosa ni atthu ootheene aniroromela seiyo.
19 Nyuwo atthu a Isarayeli, mmuttottopele Yehova.
Nyuwo emusi ya Aroni, mmuttottopele Yehova.
20 Nyuwo emusi ya Levi, mmuttottopele Yehova.
Nyuwo munimoova Yehova, mmuttottopele Yehova.
21 Yehova ottottopeliwe oSiyoni,Yoowo onikhala oYerusalemu.
Mmuttottopele Yah!
Inoota
^ Aahiiso, “Aleluya!” “Yah” ti enamuna yookhuveya ya nsina na Yehova.
^ Aahiiso, “muneemela”.
^ Aahiiso, “etthapwe”.
^ Aahiiso, woonasa wene: “Onnipaka iphaka para”.
^ Aahiiso, “nsina nanyu”.
