Masaalimu 25:1-22
Nsipo na Davidi.
א [aalefe]
25 Khoo Yehova, kinnoovekelani koovahereryakani okumi aka.
ב [beete]
2 Muluku aka, miyo kinnoororomelani;Muhikihiye kuuliwaka muru.
Muhaahiye awanani aka atteeliwaka murima mwaha wa ohaawa waka.
ג [kiimele]
3 Mweekeekhai, khuuvo onoororomelani onrowa wuuliwa muru,Masi ale anaawoka akhwaaya vahikhanle mulattu, tanrowa wuuliwa muru.
ד [taalete]
4 Xontte Yehova, mukisuwelihe iphiro sanyu;Mukiixuttihe iphiro sanyu.
ה [he]
5 Mukiirihe weettela ekeekhai anyu ni mukiixuttihe,Okhala wiira nyuwo mwa Muluku aka munikoopola.
ו [vaawu]
Okathi wootheene, kinoororomelani nyuwo.
ז [saine]
6 Khoo Yehova, muupuweleke wiira nyuwo mwa Muluku oomoriwa ikharari,Nave okathi wootheene, munniwooniherya arumeyi anyu ophenta wanyu woororomeleya.
ח [heete]
7 Khoo Yehova, muhuupuwele itampi kiirale aka kinari mmiravo, nnakhala soottheka saka.
Mukuupuwele mwaha wa ophenta wanyu woororomeleya,Mwaha wa oreera wanyu murima.
ט [teete]
8 Yehova tooreera murima ni ta xariya.
Tivonto oniwiixuttiha awe anatampi ephiro akhanle aya ootthara.
י [iyoote]
9 Owo onooweettiha atthu oomaala wiira avareke itthu sooreera,Nave onoowiixuttiha ephiro awe.
כ [kaafe]
10 Iphiro sootheene sa Yehova ti ophenta weekeekhai ni ororomeleya,Para atthu yaale aneettela nivarihano nawe ni malakiheryo awe.
ל [laamete]
11 Xontte Yehova, mwaha wa nsina nanyu,Mukilevelele etampi aka, hata eri ene yuulupale.
מ [meeme]
12 Ti pani onimoova Yehova?
Owo onoomwiixuttiha mutthu owo ephiro onireerela awe othanla.
נ [nuune]
13 Mutthu owo onimoona itthu sooreera,Nave osuulu awe onimwaakhela elapo.
ס [saameke]
14 Arina ompatthani woolipa ni Yehova taale animoova,Nave onnaasuweliha nivarihano nawe.
ע [aine]
15 Okathi wootheene, miyo kinimuroromela Yehova wiira okikhaliherye,Okhala wiira owo onookumiha inawu saka muntthavini.
פ [pe]
16 Murukunuwe, mukiwehe ni mukireerele murima,Okhala wiira kiri mekhaka ni koovelavela.
צ [tisaate]
17 Mixankiho saka sihincerereya;Mmalihe owereya kinoona aka.
ר [reexe]
18 Moone ohaawa waka ni oxanka waka,Mukilevelele itampi saka sootheene.
19 Moone wiira awanani aka khareere waatta,Ni moone moota anikinyokha aya vanceene.
ש [xiimi]
20 Musuke okumi aka ni mukoopole.
Muhikihiye kuuliwaka muru, okhala wiira kinnitthyawela wa nyuwo.
ת [taawu]
21 Ororomeleya waka ni exariya aka sikikhapelele,Okhala wiira kinoororomelani nyuwo.
22 Khoo Muluku, mmoopole Isarayeli mmaxakhani mwawe mootheene.
