Masaalimu 49:1-20
Para tiretoore a isipo. Nsipo na osuulu wa Kora.
49 Nyuwo atthu a maloko ootheene, mwiiwe etthu ela.
Nyuwo atthu anikhala olumwenku wootheene, nvahe ephoole,
2 Akhale aalupale ni acikhaani,Athaaciri ni amasikhini.
3 Eyano aka enoolavula moolumo anooniherya okhalana ankhili,Nave itthu kinuupuwelaka aka vamurimani vaka, sinimooniherya okhalana miruku.
4 Kinoovaha ephoole muhapo mmosa;Kinootthokiherya ethale aka, kimoopaka viola.
5 Miyo nkinrowa woova okathi sinrowa aya okiphwanya mixankiho,Okathi atakhali anrowa aya okirukurerya, aphavelaka okiiriha etthu yootakhala.
6 Ale aniroromela muhakhu aya,Ni ale aniittottopa mwaha wa mihakhu saya sinceene,
7 Khuuvo oniwerya omoopola munnawe,Aahiiso onvaha Muluku etthu, wiira omoopole munnawe.
8 Etthu yaarowa aya ovaha wiira yoopole okumi aya, ti ya efaita yinceene,Vahinikhala-khala aya aweryaka ovaha.
9 Awo khaniwerya omoopola munnaya, wiira okhaleke mahiku ootheene ni ohiwehe mahiye.
10 Awo anniweha wiira hata asuweli annookhwa;Nave-tho alolo ni atthu ahirina miruku annookhwa,Ni annaahiyerya muhakhu aya atthu akina.
11 Vamurimani vaya, awo aniphavela wiira ipa saya sikhaleke mahiku ootheene,Nave mapuro anikhala aya, ahimaleke mpakha maloko a ohoolo.
Imatta saya anniitthanela nsina naya.
12 Masi mutthu, hata ori ene oottittimiheya, khonrowa okhalaka mahiku ootheene;Owo khorina efaita yuulupale ovikana inama; ootheene aya annookhwa.
13 Ela ti ephiro ya alolo,Vamosa ni ale anaatthara, yaawo anaasivela moolumo aya eethiru. (Selahi)
14 Awo animookhwa, siisaale ipwittipwitthi sinrowa wiiviwa.
Okhwa, tonrowa okhala makampusi aya;Voosiisu, anaxariya animwaalamulelaka.
Awo anoomala-mala;Omahiye,* tonrowa okhala owannyeya.
15 Masi Muluku onookoopola Mmahiye,*Owo onookivarelela. (Selahi)
16 Muhixanke mwaha wa mutthu onithaaciri,Mwaha wa wuncerereya mihakhu sawe vatthokoni vawe,
17 Okhala wiira okathi onikhwa awe, khiivo etthu onrowa awe okuxa;Nnakhala muhakhu awe khonimutthara.
18 Okathi ori awe mukumi, owo onniittottopa.
Atthu annimuttottopela mutthu okathi onithaaciri awe.
19 Masi, woomalelani waya, onimookhwa ntoko akhwiiye aya amuhavinre awe,
Khanrowa-tho woona okokola.
20 Mutthu yoole ohinsuwela etthu ela, hata ori ene oottittimiheya,Khorina efaita yuulupale ovikana inama; ootheene aya annookhwa.
