Masaalimu 51:1-19
Para tiretoore a isipo. Nsipo na Davidi, nenno iipale awe okathi profeta Natani aaronwe awe okumana nuuwo, nuumala Davidi orupa ni Bati-Xeeba.
51 Xontte Muluku, mukireerele murima, mwaha wa ophenta wanyu woororomeleya.
Muttipihe itampi saka, mwaha wa omoriwa wanyu ikharari wuulupale.
2 Mukirapihe mwaha wa yoottheka aka,Mukireerihe mwaha wa etampi aka.
3 Miyo kinnisuwela oratteene soottheka saka,Nave okathi wootheene, etampi aka eri mmuupuweloni mwaka.
4 Kihootthekelani nyuwo, kihootthekelani nyuwo paahi;Kihiira itthu sootakhala vamaithoni vanyu.
Tivonto, nyuwo mookhalana erasau mwaalavulaka.Nave ophukela wanyu ti wa xariya.
5 Mweekeekhai, miyo kiyariwe kirina ene etampi,Amaama akirupanle kirina ene etampi.*
6 Koosuwela wiira vannoosivelani mwaawehaka wiira murima wa mutthu wookhalana ekeekhai;Mukiixuttihe okhalana murima orina ankhili.
7 Murapihe itampi saka, murumeelaka makukhu a mwiri oniihaniwa isopo, wiira kikhale ooreera;Mukirapihe, wiira kikhale ooreera saana.
8 Mukiirihe owiiwa atthu anikhuwela mwaha wa otteeliwa murima,Wiira kitteeliwe murima, nnaamwi muntale ene makhuva aka.
9 Muhiwehexexeke itampi saka,Muttipihe itampi saka sootheene.
10 Khoo Muluku, mukivahe murima wooreera,Mukiirihe ophavelaka opaka itthu sooreera, okathi wootheene.
11 Muhikoomole ohoolo wanyu;Nave muhikaakhe ikuru sanyu soowaarya.
12 Mukittikiherye otteeliwa murima kaarina aka, okathi mwaakooponle anyu;Mukiirihe ophavelaka owiiwelelani.
13 Kinoowiixuttiha anatampi iphiro sanyu,Wiira awo atthikele wa nyuwo.
14 Khoo Muluku, ti nyuwo munikoopola. Mukilevelele mwaha wa omwiiviha mutthu,Siiso, kinoolaleyaka exariya anyu kitteeliwe ene murima.
15 Xontte Yehova, muhule eyano aka,Wiira eyo yoottottopeleni.
16 Nyuwo khamuniphavela mukuttho, vaakhanle wiira munniphavela, miyo kaamoovahani;Nyuwo khenoosivelani yoovaha para opahiwa.
17 Muluku onnaakhelela mikuttho sa atthu yaale ariipiwe murima mweekeekhai;Muluku, nyuwo khamunrowa omukhootta mutthu oriipiwe murima ni okhulumunwe.
18 Mpake etthu yooreera para oSiyoni;Muteke ixiri sa oYerusalemu.
19 Siiso, sinimoosivelakani mikuttho sinivahiwa mwa xariya,Mikuttho para opahiwa ni mikuttho sinivahiwa ntero nene;Valtaari vanyu, sinrowa ovahiwaka ipooyi.
Inoota
^ Aahiiso, “ka natampi okhuma okathi amaama akirupanle aya”.
